Монгол Улсын Ерөнхий сайд С.Баяр МҮЭХ-ны тэргүүлэгчид болон салбар хороо, аймаг, нийслэлийн ҮЭ-ийн хорооны дарга нарыг хүлээн авч уулзан эдийн засгийн хүндрэл, санхүүгийн хямралын үед төр, засгааас авч байгаа арга хэмжээ болон хэрэгжүүлэхээр төлөвлөж буй ажлынхаа талаар мэдээлэл хийж харилцан санал солилцлоо.
МҮЭХ-ны С.Ганбаатар Ерөнхий сайдад хандаж санхүү, эдийн засгийн хүндрэл хямралын буруутан нь хөдөлмөрчид битгий байгаасай хэмээгээд төрийн албан хаагчдын цалинг 20 хувиар бууруулна гэсэн шийдвэрээ эргэж хараасай, гурван талт хэлэлцээрийн болзлоо харгалзан цахилгаан дулааны үнийг нэмэхгүй байхыг бодолцоорой хэмээн хүслээ.
Ерөнхий сайд: -Монгол Улсад эдийн засгийн бууралт, санхүүгийн хүндрэл бэрхшээл нүүрлэчихээд байна. Дэлхий дахинд нүүрлэж эхэлсэн бодит хямралын хаялага нь манай улсад 2008 оны тавдугаар сараас мэдрэгдэж аж ахуйн нэгжүүдэд зээл олгох явдал эрс саарч эхэлсэн. Манай Засгийн газар 2008 оны есдүгээр сарын 19-нд байгуулагдаад энэ хямрал бэрхшээлийн үед ард иргэдийн хууль ёсны эрх ашгийг хөндүүлэхгүй, хүндрэл бэрхшээлд өртүүлчихгүй байхын төлөө хийх ажлынхаа талаар хуулийн төсөл боловсруулаад УИХ-д өргөн барьсан. Иргэдийн мөнгөн хадгаламжийг төрөөс баталгаажуулж эрсдлээс хамгаалах арга хэмжээ авсан нь зөв алхам боллоо гэж гадаадын санхүүгийн байгууллага болон мэргэжилтнүүд, манай иргэд үнэлж байна. Гэвч”Эрдэнэт” үйлдвэрийн үйл ажиллагаа саарч, ашиг орлого нь багасч, Төмөр замын ачаа тээврийн хэмжээ буурах гэх мэтээр олон салбарт бэрхшээл үүссэн нь хямралыг даван туулахад  хүндрэл үүсгэлээ. Иймээс хямралыг даван туулах төлөвлөгөө болон төсвийн тодотголоо УИХ-д өргөн барилаа. Юуны өмнө дотоод нөөц бололцоогоо сайн ашиглахыг зорьж байна. Төсвийн алдагдал 6 хувьтай байхаар тусгагдсан бол одоогийн байдлаар 10-13 хувьд хүрэх төлөв байна.
Бэрхшээлийг даван туулахын тулд хөрөнгө оруулалтыг багасгах, урсгал зардал буюу бараа үйлчилгээний зардлыг бууруулах, төрийн өндөр албан тушаалтан болон төрийн албан хаагчдын цалинг 20-30 хувиар танах гэх мэт олон арга замаар төсвийг тэнцвэржүүлэх бодлого баримталж байна.
Манай Засгийн газар энэ хямралын үед юуны өмнө иргэдээ хоол хүнсээр хомсдуулахгүй байх, гэрэл дулааны үнийг нэмэгдүүлэхгүй бас дутаахгүй байх, ажлын байрны цомхотголд өртүүлэхгүй байх, банк санхүүгийн тогтолцоог хэвийн болгож, мөнгөний эргэлтийг хурдасгах, дотоодын үйлдвэрлэгчид болон малчдадаа дэмжлэг үзүүлэхийн төлөө бүх бололцоогоо дайчлан ажиллахыг чармайж байна хэмээн ярилаа. Дараа нь Засгийн газар ҮЭ-ийн байгууллагын хамтын ажиллагааны талаар саналаа хэлж гурван талт хэлэлцээрийн үр дүнгээ дүгнэх, дараагийн хэлэлцээрт бэлтгэх талаар үүрэг өгөв.
Уулзалтад НХХ-ийн сайд Т.Ганди оролцсон бөгөөд уулзалтын төгсгөлд ҮЭ-ийн холбоодын зарим дарга Ерөнхий сайд С.Баяр, сайд Т.Ганди нарт санал тавьж хариулт авч байсан.