Хаврын синдром эхэлж улс төрийн хүчнүүд үймэн бужигнаж эхэлсэн энэ цаг дор манай улсын ууган улс төрийн хүчин болох МАХН-ын бага хурлын тов зарлагдлаа. МАХН бага хурлаа IY сард хийхээр товлосон агаад Ерөнхий нарийн бичгийн дарга У.Хүрэлсүхийн хэлснээр уг бага хурлаар хамтарсан Засгийн газрын үйл ажиллагаанд дүн тавих аж. Мөн УИХ-ын сонгуулийн мөрийн хөтөлбөрийн хэрэгжилт, сахилга дэг журмын талаар ч хэлэлцэх юм гэсэн. Түүнээс гадна хамгийн чухал нь тус бага хуралд МАХН-ын дарга С.Баяр биечлэн оролцох ба тэрбээр халаагаа хэнд өгөхөө аль хэдийнэ шийдчихээд байгаа төдийгүй намын хуралд оролцогсодыг хамтарсан Засгийн газрын эсрэг үг дуугарахгүй байлгах ажиллагаагаа аль хэдийнэ эхэлчихсэн гэсэн. Хэдийгээр тэрбээр энд өөрийн биеэр байхгүй ч техник технологийн дэвшлийг ашиглаад асуудлаа алсаас удирдаж буй нь тодорхой.

Гэхдээ энэ удаа намын хурлын төлөөлөгчдийн дунд эрхэм даргын үгэнд орж хүсэлд нийцүүлэхгүйгээр хамтарсан Засгийг газар дор ортол муулах санааг өвөрлөж буй хүмүүс бий ч, хаацайлан өмгөөлөх нэгэн ч бас бий гэдэг нь ойлгомжтой. Эцэст нь тэмдэглэхэд эрхэм улс төрчдийн холиосон бантангийн засаглал ямар дүн авах нь нэг их чухал биш мэт ээ.

Ж.Энхбаяр гишүүний эсрэг номдол гаргажээ

Говь-Алтай аймгийн тавдугаар тойргоос УИХ-д сонгогдсон Жадамбаа генералын хүү Энхбаяр амралтаараа төрөлх нутгаа зорьсон гэх сураг дуулдсан. Хотын их утаанаас ангижирч эх нутгаадаа тэмцсэн тэрбээр нэлээд сүр дуулиантай яваа бололтой. Тодруулбал тэрбээр аймгийнхаа удирдлагуудтай уулзахдаа Иргэдийн төлөөлөгчдийн хурлын дарга Ш.Эрдэнэбат гээч нөхөрт нударганы амт өгч орхисон бололтой юм билээ. Тэд тусламжийн барааг хаана, аль суманд хүргах талаар ярилцсан ч маргалдаад шийдэлд хүрч ч-даагүй аж. Тэгээд л эрхэм түшээ хэл амаар ойлголцохгүй юмыг амарчлаад нударгаар шийдчихсэн нь тэр юм байх.

За ямартаа ч Ш.Эрдэнэбат дарга төрийн түшээд түншүүлсэндээ гоморхон шүүх цагдаад хандан гомдол гаргачихаад байгаа гэсэн. Уг нь тэрбээр эр улс ажлаас болж аль маргалдахыг тэр гэхэв хэмээн шийр зааж, уучлал гуйхыг нь хүлээсэн ч өнөөх түшээ гуай таг чиг алга болчихсон аж. Хүлээж цөхсөн тэрбээр төрийн түшээг өмнөө сөхрүүлж, толгойг нь гудайлгах хүсэл нь биелээгүй бас ядаж байхад нүүр, нүд нь хөх няц болсонд гоморхоод мэддэг чаддагаар нь хэрэг явдлын учрыг олуулахаар шийдсэн нь тэр гэнэ лээ.

Манай холбоонд Ц.Нямдорж сайд ч элсэж болно

Улс төрийн томоохон хүчнүүд хагарч бутрах нь сайны ёр биш. Хэдийгээр өдгөө төр засаг барьж буй улстөрчдийн эсрэг дуугарч, зөв зүйтэй зүйл ярьж шаардлага тавьж буй нь таатай ч үнэн хэрэгтээ өөрсдөө хоосон үлдсэндээ шаралхсан байдаг нь гашуун боловч үнэн. За ямартаа ч АН буюу Алтан гадас фракцын эсрэг байгуулагдлаа хэмээн хардагдаад байгаа Монголын ардчилсан хүчний зүүний холбоо тун удахгүй анхдугаар бага хурлаа хийх гэж байгаа гэнэ. Тус холбооны дэд ерөнхийлөгч            С.Эрдэнэ “Н.Алтанхуягийн эсрэг байгуулагдсан холбоо гэж үзэж болохгүй” хэмээн мэдэгдсэн ч Алтан гадасынхныг аргамжих төлөвлөгөөтэй буйгаа нуугаагүй. Түүгээр ч барахгүй тэрбээр манай холбоо гишүүнчлэлийн хувьд нээлттэй. Терийн бус байгууллага учраас журамтай танилцаад хүлээн зевшөөрсөн хүн бүхэн элсэж болно. Өөрөөр хэлбэл Ц.Нямдорж сайд ч элсэж болно шүү дээ хэмээн айлджээ. Түүний айлдварыг сонссон Хууль зүйн сайд багтартлаа уурлан гудамжны хулигааны байгуулсан холбоонд элсэх нь бүү хэл хажуугаар нь ч гарахгүй” хэмээн ам тангараг өргөсөн сураг дуулдлаа.

З.Урсгал