Орчин үеийн Сингапур улсыг босгосон ерөнхий сайд агсан Лигийн дурсамж номд ингэж бичиж.

"...Америкийн том корпорацын CEO нарт Сингапурт хөрөнгө оруулах итгэл төрүүлэхийн тулд Онгоцны буудлаас тэдний буусан зочид буудал, зочид буудлаас миний өргөө хүртэлх зам толигор, бут, модоор хүрээлэгдсэн байх ёстой гэж би бодож байлаа..."

Манай онгоцны буудлаас хотын төв орох зам ямар байдгийг санацгаая. Сая харин арай гэж зассан. Гэхдээ үзэгдэх орчин чухал. Баруунд ихэвчлэн том самбар эсвэл өндөр мод тарьж гэр хорооллоо нуудаг. Санаандгүй биш л юм байна. Гэхдээ харамсалтай нь Яармагийн шинэ зам нь дундаа 4-5 гэрэл дохиотой. Манайхны юмыг дандаа дутуу сэтгэдгийн тод жишээ. Дэлхийн ямар ч эрүүл улсад нисэх буудлаасаа хотын төв орох замдаа явган хүний гарцан дээр гэрэл дохио асаадаггүй номтой. Явган зорчигчоо нэг бол зам доогуур эсвэл дээгүүр нь хөндлөн гаргадаг.  

"...Хөрөнгө оруулагч нарт итгэл төрүүлэх нь маш чухал...Нью Йоркийн эдийн засгийн клубт очиж 80 гаруй томоохон корпорацийн CEO нарт илтгэл тавихдаа би маш тодорхой тоо баримттай ярьж, асуусан асуултад нь бүрэн төгс хариулж чадсан юм..."

Манайхан сүүлийн үед ийм оролдлого хийж байгаа. Гэхдээ гадныхан энэ мэт арга хэмжээний талаар ихэвчлэн тохуурхаж л ярих юм билээ. Бас сүүлийн үед манай улс төрчдийн хэлний чадварын талаар видеонууд тархаад байсан уу үгүй юу. Зүгээр нэг хувь хүн биш, 21-р зуунд улс удирдах хүмүүс гэдгийг нь бодоорой.

"...Америкийн том корпорациудын CEO нар яаж боддог, хөрөнгө оруулахдаа юуг чухалчилж үздэгийг бид маш сайн судалдаг байв..."

Манайхны соёл нь хүний хүсэл эрмэлзлийг сонирхох биш харин өөрийн эрх ашгийг хангахад илүү оршдог. Хүний юу сонирхож хүсэж буйг огт сонин биш. Тийм соёлтойгоор гадны хөрөнгө оруулалт татна гэж гонж.  

"...Манай Хөрөнгө оруулалтын агентлаг Америк Европийн том корпорациуд руу тасралтгүй холбоо барьж Сингапурт ирэхийг урьж байв. Тэд ихэнхдээ Сингапур гэж улс байдгийг ч мэддэггүй байсан. 50 компанитай утсаар яриад 1 компанийг Сингапурт авчрах хүртлээ манай ажилтнууд цөхрөлтгүй ажилладаг байв..."

Ингэхэд энэ номыг нь орчуулсан билүү.
Орчуулаагүй бол сайн санаат хүмүүс минь мөнгө төгрөг босгож яаралтай орчуулж 2016 оны сонгуульд орох гэж байгаа улс төрч нартаа өгье. Улс төр гэж юу байдаг талаар ядаж ганц хоёр санаа авцгааг.

"...Эхлээд Texas Instruments, дараа нь Hewlett Packard гээд араасаа цуварч 1970 онд эдийн засгийн яаж хөл дээр нь босгох вэ гэж өдөр шөнөгүй ажиллаж байсан Сингапур 1980 он гэхэд дэлхийн хамгийн том электрониксийн экспортлогч нарын нэг нь болсон билээ..."


Өлзийбаярын Ганзориг