sonin.mn
Хүүхдийг бор хоолонд зөв оруулах нь таны хүүхдийн хоолны дуршил, ходоодны өнгөр, биеийн эсэргүүцэл гэх мэт олон зүйлд нөлөөтэй. 
Дэлхийн эрүүл мэндийн байгууллага, Монгол улсын Эрүүл мэндийн яам, Америкийн хүүхдийн эмч нарын нийгэмлэг хүүхдийг эхний 6 сар зөвхөн хөхөөр хооллохыг зөвлөж байна. Эхний 6 сар хөхний сүү эсвэл хүүхдийн тэжээл шаардлагатай бүхий л шингэн ба шимт бодисоор хангана. Иймд ус болон бусад шингэн өгөх шаардлага байдаггүй. Харин 6 сартайгаас хойш хөхний сүү/хүүхдийн тэжээл хүүхдийн хоол болон ундны хэрэгцээг бүрэн хангахгүй тул нэмэлт хоол өгч эхлэх хэрэгтэй. Нэмэлт хоолыг 5-6 сартайгаас өгч эхлэх нь тохиромжтой боловч эхийн сүүндээ бүрэн цадаж байвал шаардлагагүй. Тэгвэл хүүхдээ бор хоолонд орох цаг нь болсон гэдгийг хэрхэн яаж  мэдэх вэ ? Энэ маш амархан.
 
• Хэлээрээ түлхэх рефлекс арилна. Амьдралын эхний хэдэн саруудад хүүхдийн хэлний үзүүрт ямар нэг хоол тавихад шууд хэлээрээ түлхэж гаргадаг. Энэ нь нярай хүүхдийг хахахаас хамгаалдаг төрөлхийн рефлекс юм. Энэхүү рефлексийн нэг илрэл нь хүүхэд эхний хэдэн сар хэлээ байнга булталзуулдаг явдал билээ. 
• Өвөр дээр, эсвэл сандал ширээнд сайн суудаг болно. Толгойгоо эгц сайн даах нь чөлөөтэй залгих боломж бүрдүүлнэ.
• Хөхөндөө эсвэл угжиндаа цадахгүй, ойр ойрхон өлсөнө. Хоол хараад идэх дур хүсэл төрж буй нь мэдэгдэнэ.
 
Эдгээр шинжүүд илэрч буй бол хүүхэддээ нэмэлт хоол өгч эхэлж болно. Хүүхэд бүрийн нэмэгдэл хоол идэхэд бэлэн болох нас өөр өөр байдаг. Нэмэлт хоолонд оруулах дэс дараа буюу заавал эхлэх хоол гэж байхгүй. Өнөөдрийн байдлаар ийм тийм хоолноос заавал эхлэх ёстой, 2 дахь нь тэр, ингэснээрээ хүүхдийн өсөлт хөгжил, эрүүл мэндэд сайнаар нөлөөлнө гэсэн нотлогдсон зүйл үгүй байна. Өөрөөр хэлбэл ямар ч хоолноос эхэлж болно гэсэн үг. Гэхдээ олон ихэвчлэн ээжүүд хүүхдээ доорхи дарааллаар бор хоолонд оруулдаг болох нь судалгаагаар батлагджээ.
 
НЭГДҮГЭЭР АЛХАМ / ГЭДСЭНД ӨНГӨР ТОГТООХ/
 
 Хүүхдийн анхны хоол нь эхийн сүү болон тэжээл байдаг бөгөөд үүний дараа ходоодонд өнгөр хамгийн сайн тогтоох чадвартай хүнс бол цагаан будаа юм. Цагаан будааны төрөл бүрийн кашийг нэмэлтээр өгч болох бөгөөд хэрэв та залхуурахгүй бол гэртээ цагаан будааны шүүс, цагаан будааны зутанг хүүхдэдээ бэлдэж өгвөл ходоодны өнгөр маш сайн тогтох ба хэр баргийн хордлого, суулгалтад өртөхгүй, өртсөн ч бусад хүүхдүүдээс бага өвдөх болно. Будааны шүүсийг 2-3 халбагаар өгч дасган, 50гр хүртэл нэмэгдүүлэх бөгөөд хүүхдэд аюулгүй зөөлөн халбага, бэлтгэсэн байх хэрэгтэй шүү.
 
ХОЁРДУГААР АЛХАМ / ХОДООДЫГ НЬ ДАСГАХ/
 
Будааны шүүс, зутанг 7 хоног өгч дасгасны дараа таны хүүхдийн тухайн сард идэж болох хүнсний ногоонуудаас сонгон нухаж өгч болно. Хамгийн анхны өгч болох тохиромжтой ногоо бол лууван. Түүнчлэн бусад ногооны талаар судлан 7, 7 хоногоор шинэ ногоонуудаа дарааллуулан өгөх хэрэгтэй. Ногоог дангаар нь болон будааны зутантай хольж өгч болно. Мөн 2-3 халбагаар 100 гр хүртэл өдөрт 1-2 таслан өгнө. Төрөл бүрийн амттай каш, жимс, нухашнаас өмнө ногооны төрлүүдийг хүүхдэд идүүлэн сургаснаар ногоо иддэг, дуршил сайтай байх болно.
 
ГУРАВДУГААР АЛХАМ /ЗӨВ ЗУРШИЛТАЙ БОЛГОХ/
 
Үүний дараа мөн тухайн сард өгч болох жимснүүдээс сонгон авж нухаж өгнө. Мөн 7,7 хоногоор бага багаар өгөх бөгөөд жимсийг болгоомжтой өгөх хэрэгтэй. Жишээ нь манай хүүхдэд лийр тийм ч сайн тохирдоггүй анх 2-3 халбагыг өгөхөд бөөлжиж байсан бөгөөд одооч лийр идэхээр өтгөн нь шингэрдэг. Хоолонд оруулах энэ үе, дэс дараалал таны хүүхдэд юу тохирох тохирохгүйг мэдэх хамгийн тохиромжтой үе юм.
 
ДӨРӨВДҮГЭЭР АЛХАМ / ХЭВШҮҮЛЭХ/
 
Энэ дарааллаар 7.7 хоногоор шинэ орцуудыг туршсны дараа амттай каш, махны шөл, бантан болон бусад хоолнуудыг дараалан өгөх хэрэгтэй. Анхаарах: Зөгийн бал болон үхрийн сүүг 1 нас хүртэл өгөхгүй байх нь судалгаагаар нотлогдсон.
 
 
Эх сурвалж:  "Эрүүл мэндийн жор" сонин