Борооны дараах мөөг шиг олширсон хувийн эмнэлгүүдийг цэгцлэх цаг нь болжээ. Байр болгоны нэгдүгээр давхарт болсон болоогүй хувийн эмнэлгүүд нээгдэн иргэдийн халаасыг цэвэрхэн гэгч нь сэгсэрч байгаа нь нууц биш.
Ийн хэлэхийн учир нь өнөөдөр хамгийн их эрэлт хэрэгцээтэй байгаа цэцэрлэгийн асуудлыг нэн түрүүнд шийдэх хэрэгтэй гэсэн олон эцэг эхчүүдийн хүсэлтийг хүргэх гэсэнтэй холбоотой юм.
Бид өнгөрсөн он жилүүдэд их, дээд сургуульд хүүхдээ оруулах гэж уртаас урт дараалал үүсгэдэг байсан. Тэгвэл одоо эцэг эхчүүд цэцэрлэгийн гадаа шаагилдан, бачуурч хаана хэнд хандахаа мэдэхгүй хэдэн багш нарыг нь элдвээр хэлж бас зарим нь арга эвийг нь олчих санаатай тэднийг царайчлах аж.
Өмнө нь эцэг эхчүүд ар өврийн хаалга хэрэглэж арав таван төгрөг өгч хүүхдээ цэцэрлэгийн бараа харуулдаг байсан бол энэ жил иймэрхүү найраа огт байхгүй болсон тухай олон хүн хэлж байсан.
Бидний энэ удаагийн зорилго өмнө нь цэцэрлэг байсан газрууд одоо яагаад хувийн эмнэлэг болчихов гэдэгт буй юм. Тухайлбал, цагийн сайханд Хан-Уул дүүргийн XV хорооны нутаг дэвсгэрт байрлах 250-иад хүүхдийн хүчин чадалтай цэцэрлэг өнөөдөр “Арано” гэх нэртэй шүдний эмнэлэг болсон байна. Уг нь төр, засаг анхнаасаа хуваарилалтаа зөв хийж, алсын хараатай ажилласан бол өнөөдөр цэцэрлэгийн асуудал эцэг, эхчүүдийн толгойны өвчин болохгүй байсан нь ойлгомжтой.
Орос ах нарын барьж өгсөн энэхүү цэцэрлэгийн байрыг 2001 онд хувьчилсан байна. Тус хорооны оршин суугчдын хэлж буйгаар “Хотын дарга асан Ц.Батбаярын үед цэцэрлэг хувьчлагдаж байжээ. Уг нь манай дүүргийн гурван хорооны хүүхдүүд тус цэцэрлэгт хүмүүжиж цэцэрлэг олдохгүй асуудал огт гардаггүй байсан.
Үнэндээ одоо энд шүдний эмнэлэг биш цэцэрлэг хэрэгтэй байгааг холбогдох албаны хүмүүс ойлгох хэрэгтэй. Тэртэй тэргүй байшингийн тохой булан бүрт л болсон болоогүй нүдний, шүдний, эмэгтэйчүүдийн гэх эмнэлгүүд олноор бий болсон байхад зарим эмнэлгийг хааж улсынх биш юм аа гэхэд хувийн цэцэрлэг болгож эцэг, эхчүүдийн дарамтыг бага ч болов хөнгөлөх хэрэгтэй шүү дээ.
Тиймээс цэцэрлэг байсан газруудыг суллаж өгвөл гэртээ цоожтой үлдсэн хүүхдүүд цэцэрлэгт хүмүүжиж олон эцэг, эхийн магнай тэнийн баярлах байх” гэв.
Байдал ийм байхад төр яагаад өөрийн мэдлийн обьектоо эргүүлэн авч болохгүй гэж. Дээрх цэцэрлэгийн байрыг орос ах нар бидэнд үнэгүй барьж бэлэглэж өгсөн гэдгийг хэн хүнгүй л мэднэ. Цэцэрлэгийн барилга зөвхөн үүгээр дуусахгүй.
Сүхбаатар дүүргийн VI хорооны нутаг дэвсгэрт байрлах сувиллын ясли цэцэрлэгийн нэг корпусыг “Монзакира” эмнэлэг эзэгнэжээ.
Уг нь тус сувиллын ясли цагийн сайханд мөн л дангаараа цэцэрлэг байсан байна. Гэтэл их хувьчлалын үед бас л энэ цэцэрлэгийг эрх мэдэлтнүүд мөнгөтэй эрхэмд зарснаас өнөөдөр сувиллын ясли айлын зайнд хөөгдчихгүйхэн шиг толгой хорогдож байгаа нь хөөрхийлтэй.
Ер нь яагаад улсын мэдэлд байсан энэ олон цэцэрлэгийг хувийн эмнэлэгт өгөх болов гэдгийг сонирхож явахад зарим албан тушаалтнууд “Тухайн он жилүүдэд цэцэрлэг шиг хэрэггүй юм байгаагүй. Учир нь тэр үед цэцэрлэгт явдаг хүүхдийн тоо эрс буурсан учраас алдагдалд оруулахгүйн тулд хувийн хэвшлийнхэнд хувьчлах болсон. Одоо цэцэрлэгийн эрэлт хэрэгцээ нэмэгдмэгц төр өмчөө авъя гэж хэлж болохгүй. Уг нь төр боломжгүй үедээ хувийн хэвшлийнхэнд зарсан шүү дээ” хэмээн хээв нэг хэлж байсан хүнтэй ч таарсан юм.
Энэ талаар Нийслэлийн Өмчийн харилцаан газрын мэргэжилтэн Ч.Шинэхүү “Таны асууж байгаа хоёр цэцэрлэг хоёулаа хувьчлагдсан. Яг хэзээ хувьчлагдсан болон ямар шугамаар яаж хувьчлагдсан талаар хэлж мэдэхгүй байна. Энэ хувьчлалтай холбоотой асуудлыг бид архиваас шүүж үздэг учраас одоо амаараа ийм байна гэж хэлэх боломж байхгүй. Ямартай ч цэцэрлэгийн барилга хувийн хэвшилд хувьчлагдсан гэдэг нь үнэн” гэлээ.
Яагаад цэцэрлэг ийм их эрэлт хэрэгцээтэй болов оо. Зөвхөн жилд төрж байгаа эмэгтэйчүүдийн тоо арван мянгаар өсч байна гэсэн статистк судалгаа бий. Уг нь төрөөс Монголын үрс маш олон болтугай гэх бодлого баримталж энэхүү ерөөл нь биеллээ олоод эхэлтэл улс нь цэцэрлэгийнхээ тоог нэгээр ч нэмэхгүй хэрнээ хувийн хэвшлийнхэнд ийнхүү найр тавин тэдний халаасыг түнтийлгэх хэрэг байна уу гэж хэлэх хүн ч олон байна.
Нийслэлийн боловсролын газрын дарга Ц.Отгонбагана “Нийт цэцэрлэгийн насны хүүхдийн дөнгөж 60 хувь нь л цэцэрлэгт хамрагдаж бусад нь гэртээ хүмүүжиж байгаа энэ үед төрийн шийдвэр гаргах зам нь гишүүд сонгуулийн амлалтаа биелүүлэхийг хараад суухгүйгээр өнөөдөр албан байгууллагууд ажилчдынхаа хүүхдийг авдаг цэцэрлэгийг дэргэдээ байгуулах нь асуудлыг шийдэх гарц.
Мөн “ААН-үүдийг дэргэдээ цэцэрлэг байгуулах ажлыг уриалж байгаа. Хуульдаа ч тусгасан байдаг. Өнөөдөр таван байгууллага дэргэдээ сургууль, цэцэрлэг байгуулаад явж байна. Энэ үйл ажиллагаа цаашдаа идэвхжих байх” гэв.
Эндээс харахад Монгол Улсын бүхий л аймаг сумдад цэцэрлэг нэн хэрэгцээтэй болжээ. Өөрөөр хэлбэл, хувийн хэвшлийн эмнэлгийг цөөлж байшингийн тохой булан бүрт цэцэрлэг байгуулъя гэсэн саналтай олон хүн нэгдэх сураг ч чих дэлсэв.
Эрэлт хэрэгцээ нь байгаа учраас цэцэрлэгийн бизнес Монголд хэрэгтэй гэсэн үг. Тиймээс цэцэрлэг байгуулах бизнесийг төрөөс дэмжих шаардлагатай байна. Уг нь төр, засгийг цэцэрлэг байгуулаад өгөөч гэж олон эцэг, эхчүүд санал өгч байсан боловч төрийн түшээд тэдний энэ саналыг нь үл огоорсон.
Тэгвэл хэн нэгний эрүүл мэндээр бизнес хийж мөнгө олдог эмч нарт биш цэцэрлэг байгуулах хүсэлтэй байгаа зарим иргэдийг нөхцөл бололцоогоор нь хангачихвал ард түмэнд хамгийн их хэрэгтэй зүйлийн нэг болох нь дамжиггүй.
Р.Саруул
Эх сурвалж:
Сэтгэгдэл0
ОРХОН АЙМАГТ ДАМБАОЧИР ГЭЖ НЭГ ДАРУУЛГА ҮГҮЙ НӨХӨР ХҮҮХДИЙН ЦЭЦЭРЛЭГИЙН БАЙШИНГ ХУВИЙН КОМПАНИЙН КОНТОР БОЛГОСНОО ЭРГҮҮЛЖ ӨГВӨЛ ТААРНА.