МОСКВА. /RIA Novosti/. Америкийн “SpaceX” хувийн компанийн сансарт ачааны “Dragon” хөлгийн Олон улсын сансрын станц /ОУСС/ руу үйлдэх ээлжит нислэг энэ сарын 20-нд болно. Энэ тухай тус улсын Агаарын нислэг, сансрын уудмыг шинжлэн судлах үндэсний төвөөс /НАСА/ мэдээлжээ.
“Dragon” хөлгийг Флорида муж улсын Канаверал хошууны сансрын буудлын зэргэлдээ оршдог Агаарын цэргийн хүчний баазаас “Falcon 9” зөөгч-пуужингийн тусламжтайгаар хөөргөх ажээ. Хэрэв ямар нэг шалтгаанаар пуужингийн хөөргөлтийг хойшлуулбал, хоёр дахь удаагийн оролдлогыг есдүгээр сарын 21-нд хийж магадгүй байна.
НАСА агентлагийн мэдээлснээр, уг хөлөг хүнсний бүтээгдэхүүн, эн түрүүнд шаардлагатай эд зүйлс, мөн сансрын 3D-принтер зэрэг шинжлэх ухааны туршилтуудыг явуулах материалууд бүхий нийт 2,5 тонн ачааг ОУСС-д хүргэх ажээ.
Д.Жаргал
Эх сурвалж: "Монцамэ" агентлаг
Сэтгэгдэл0