sonin.mn
Цаатан түмний аж амьдрал, ёс заншил, өв уламжлалыг уран сайхны аргаар олон нийтэд таниулах зорилготой “Содура”уран сайхны кино энэ сарын 20-нд нээлтээ хийнэ. Киноны гол дүр Содурагийн дүрийг бүтээсэн жүжигчин Ч.Очгэрэлтэй уран бүтээлийнх нь талаар цөөн хором ярилцлаа.
 
-Таны гол дүр бүтээсэн “Содура” уран сайхны кино нээлтээ хийхэд бэлэн болжээ. Сэтгэгдлээсээ хуваалцана уу?
 
-Би маш их догдолж байна. Гэхдээ киноныхоо нээлтийг хүлээж буй энэ мөчид бидэнд томоохон гарз тохиолоо. Киноны маань нэгэн шигтгээ болсон, чадварлаг жүжигчин Амбий ах маань бурхны орон руу явчихлаа. Бид киноныхоо нээлтийг тэсэн ядан хүлээж байгаа боловч ийм гунигт явдал тохиолдсон болохоор сэтгэл гундуухан л байна.
 
-“Содура” кино дөрвөн улирлын зураглалыг агуулснаараа ихээхэн онцлогтой. Тэр дундаа Монголын үзэсгэлэнт байгаль, ан амьтныг тусгаснаараа дэлгэцийн бусад бүтээлээс ялгарах болов уу?
 
-Тийм ээ. Бид хоёр жилийн хугацаанд киноныхоо зураг авалтыг хийсэн. Тайгын амьдралын дөрвөн улирлыг гаргаж өгснөөрөө онцлогтой бүтээл болсон гэж бодож байна. Баяр жаргалтай, инээд хөөртэй сайхан өдрүүдээс гадна шантрах, хөнгөн гуниглах үе ч тохиолдож байлаа. Тэр болгонд кино багийнхнаасаа, миний эргэн тойронд байсан тэр мундаг хүмүүсээс үлгэр дууриалал авч “Би заавал чадах ёстой” гэж өөрийгөө зоригжуулж, хурцалдаг байсан. Одоо эргээд харахад П.Цэрэндагва ах, Л.Мэндбаяр эгч, Амбий ах гээд олон сайхан жүжигчдээс надад үлдсэн зүйл үнэхээр их байна.
 
-Цаатнуудын талаар та өмнө нь сонсч байсан байх. Яг бодит байдалд очоод ямар сэтгэгдэл төрсөн бэ?
 
-Аливаа юм бүхэн хоёр талтай. Сурч боловсрох, хөгжих тал дээр тэд хоцрогдсон байсан нь харамсалтай санагдсан ч ёс заншил, соёлоо хадгалан авч үлдэж цаатан уламжлалаа хадгалж үлдсэн тэднээр бахархах сэтгэл маш их төрсөн. Гэхдээ дэлхийн хаана ч байхгүй энэ сайхан ахуй орчин устаж алга болох аюул нүүрлэсэнд миний хувьд маш харамсалтай санагдсан.
 
-Хоёр жилийн хугацаанд Содура хэмээх тайгын охины дүрд амьдарсан. Содура таныг хэрхэн өөрчилсөн бэ?
 
-Би хотын хүүхэд. Анх очиход бэрхшээлтэй зүйл их тохиолдсон. Сүүлдээ би дүрдээ ороод жинхэнэ хөдөөний бүсгүй болсон шүү дээ. Би Монгол хүний хувьд гадны биш өөрийн орны сайхан газруудаар аялж үзэхийг хүссэн. Үнэхээр хэний ч гар хүрээгүй тийм л сайхан байгалийг харж мэдэрсэндээ миний хувьд их баяртай байгаа. Одоо ч заримдаа зураг авалт хийсэн газраа санадаг шүү.
 
-Та киноныхоо дууг дуулсан. Энэ талаар сонирхуулна уу?
 
-Уг нь би жүжигчин биш. Харин дуулах маш дуртай. Анх UBS телевизээс зохион байгуулсан “Universe Best Songs” наадамд оролцсоноор энэхүү сайхан кинонд тоглох үүд хаалгыг маань нээсэн. Энэ миний хувьд хоёр дахь нь юм. Өмнө нь “Мартагдашгүй намар” кинонд тоглож байв. Мөн энэ сайхан киноны дууг дуулсандаа маш баяртай байгаа. Маш гэгээлэг, хайрын сайхан дуу болсон. Үнэхээр ая, үг хоёр эвлэсэн сайхан уран бүтээл байгаа.
 
-Уран бүтээлийн санал хэр ирж байна. Тоглохоор төлөвлөсөн кино бий юү?
 
-Уран бүтээлийн санал хэд хэд ирсэн. Гэхдээ ойрын хугацаанд кинонд тоглох бодол алга.
 
Б.Ундармаа
Эх сурвалж: