sonin.mn
Сэтгэгдэл (0)
Улаанбаатар /МОНЦАМЭ/. Газар хөдлөлтийн идэвхитэй бүсэд оршдог Монгол Улсад энэ төрлийн судалгаа шинжилгээ хийдэг боловсон хүчин дутмаг байна хэмээн “Монголын одон орон, геофизикийн судалгаа 2017” олон улсын хуралд оролцогчид онцлов.
 
Монгол Улсад Одон Орон, Геофизикийн Хүрээлэн /ООГХ/ үүсгэн байгуулагдсаны 60 жилийн ойг тохиолдуулан “Монголын одон орон, геофизикийн судалгаа 2017” олон улсын хурал өнөөдөр Чингис хаан зочид буудалд нээлтээ хийлээ.
 
Гурван өдөр үргэлжлэх уг хуралдаанд Монгол, ОХУ, АНУ, Франц, Өмнөд Солонгос, Швейцарь, Герман, Англи, Чили, Турк, Тайвань, Хятад зэрэг 13 орны 200 орчим эрдэмтэн судлаач оролцож байна. Хурлыг Шадар Сайд У.Хүрэлсүх, БСШУС-ын сайд Г.Чулуунбаатар, ШУА-ын Ерөнхийлөгч Д.Рэгдэл, ШУА-ийн ООГХ-ийн захирал С.Дэмбрэл нар нээж мэндчилгээ дэвшүүллээ.
 
“ШУА-ийн харьяа ООГХ  байгуулагдсанаас хойш 60 жил өнгөрчээ. Энэ хугацаанд уг хүрээлэн нар, дэлхийн физик судлал, газар хөдлөлт болон соронзон судлал гэсэн гурван төрлөөр дэлхийн хэмжээний судалгаа шинжилгээ хийдэг томоохон байгууллага болтлоо хөгжжээ” хэмээн ШУА-ийн ООГХ-ийн захирал С.Дэмбэрэл онцлов.
 
Францын Страсбургийн Их сургуулийн Профессор Антон Шлупп “Би Монголд анх 1992 онд ирж байсан юм. Түүнээс хойш жил бүр тасралтгүй ирж судалгаа шинжилгээ хийсээр 25 жил өнгөрчээ. Монгол улс хүчтэй газар хөдлөлтийн бүсэд оршдог учир энэ чиглэлээр судалгаа шинжилгээ хийдэг эрдэмтэд маш хэрэгтэй байгаа. Миний бие дөрвөн монгол эрдэмтний судалгааг удирдсан. Тэд маань бүгд профессор цол хүртсэн. Өнөөдөр Монголын ШУА хийсэн ажлыг минь үнэлж хүндэт доктор цол олгосонд талархаж байна” хэмээв.
 
Харин ОХУ-ын Зүүн Хойд Холбооны Их сургуулийн Профессор Гриб Николаевич “Манай сургууль Монголын ШУА, ООГХ-тэй олон жил хамтран ажиллаж байна. Би монголд өмнө нь олон удаа судалгаа шинжилгээ хийхээр ирж байсан. Энэ удаагийн хуралд “Газар хөдлөлтөнд тэсвэртэй барилга угсралт” сэдвээр илтгэл тавихаар хүрэлцэн ирлээ. Хурлаа дуусгаад үзэсгэлэнт Монгол орноор аялахаар эхнэр, ач хүүгээ дагуулан ирсэн” хэмээн сэтгэгдлээсээ хуваалцлаа.
 
Дашрамд дурдахад ШУА-ийн харьяа ООГХ нь 200 орчим ажилтантай томоохон  байгууллага бөгөөд түүнээс 90 гаруй нь орон нутаг дахь газар хөдлөлт судлалын станцууд дээр ажилладаг ажээ.
 
Л.Нандиа
Эх сурвалж: Монцамэ агентлаг