sonin.mn
Сэтгэгдэл (0)
Улаанбаатар /МОНЦАМЭ/. Монгол Улсын тамирчид олимпийн наадмаас анхны медаль хүртсэний түүхт 50 жил, олимпийн анхны аварга төрсний 10 жилийн ойг тохиолдуулан Монголын олимпийн медальтнуудын холбоо /МОМХ/-ноос лхагва гарагт МОНЦАМЭ агентлагийн Мэдээллийн төвд хэвлэлийн бага хурал хийлээ.
Монгол Улсын баг тамирчид 1968 оны Мехикогийн олимпийн наадмаас эхлэн өнгөрсөн 50 жилийн хугацаанд зуны олимпийн наадмаас 25 тамирчин 26 медалийг аваад байгаа билээ.
Энэхүү түүх ойг тэмдэглэхтэй холбогдуулан МОМХ-ноос олимпийн анхны медальтнуудын нэг Мехикогийн олимпийн хүрэл медальт, Монгол Улсын гавьяат тамирчин, улсын өсөх идэр начин Төмөрийн Артаг агсны хөшөө болон 1980 оны Москвагийн зуны олимпийн мөнгөн медальт, гавьяат тамирчин Жамцын Даваажав агсны гэрэлт хөшөөг төрсөн нутагт нь босгохоор болжээ.
Хөшөөг нь босгох энэ тамирчдын төрөлх нутаг болох Увс, Булган аймгийн Засаг дарга нар, ИТХ-ын дарга, тухайн аймгаас сонгогдсон УИХ-ын гишүүдэд хандаад байгаа гэж МҮМХ-ны нарийн бичгийн дарга, “Барселон-1992” олимпийн наадмын хүрэл медальт, гавьяат тамирчин Н.Баярсайхан энэ үеэр мэдээллээ.
Хэвлэлийн бага хуралд Т.Артаг агсны гэргий Д,Баярлах, Ж.Даваажав агсны төрөлх нутаг Булган аймгийн Тэшиг сумын Нутгийн зөьлөлийн гүйцэтгэх захирал Г.Эрхэмбаяр нар оролцлоо.
МОМХ-ноос Монгол Улсын тамирчид олимпийн наадмаас анхлан медаль хүртсэний түүхт 50 жилийн ой, анхны олимпийн аваргууд төрсний 10 жилийн ойн хүрээнд тодорхой ажлуудыг хийхээр төлөвлөжээ. Тухайлбал, цэвэр мөнгөн зоос гаргах, олимпийн медальт тамирчдын болон түүхт ойд зориулсан цуврал марк гаргах, олимп, дэлхийн медальтнуудын тухай ном гаргах, мөн баримтат кино болон ТВ нэвтрүүлэг, шторк хийхээр ажиллаж байгаа аж.
 
Д.Өлзий
Эх сурвалж: Монцамэ агентлаг