КИЕВ. /Xinhua/. БНХАУ-ын Засгийн газар орчин үеийн тоног төхөөрөмжөөр тоноглогдсон түргэн тусламжийн 50 машиныг Украинд хандивласан байна.
Түргэн тусламжийн машиныг шилжүүлэн өгөх санамж бичигт БНХАУ-аас Украинд суугаа Элчин сайд Дү Вэй болон Украины Эрүүл мэндийн сайдын үүрэг гүйцэтгэгч Ульяна Супрун нар гарын үсэг зуржээ.
БНХАУ болон Украины Засгийн газар хооронд 2016 онд байгуулсан хэлэлцээрийн хүрээнд 3.5 сая долларын үнэ бүхий энэхүү хандивыг олгож байгаа ажээ.
Украины 24 бүс нутгийн эрүүл мэндийн төвүүдэд 44 машиныг хуваарилах бол 6 машиныг Украины Дотоод хэргийн яам болон Үндэсний Гвардын эрүүл мэндийн хүрээлэнд ашиглахаар болсон байна.
БНХАУ-ын мэргэжилтнүүд уг машин болон дотор нь суурилуулсан төхөөрөмжийн үйл ажиллагааны талаар Украины эрүүл мэндийн ажилтнуудад зааварчилгаа өгч, сургалт явуулжээ.
Санамж бичигт гарын үсэг зурах ёслолын үеэр Ульяна Супрун үг хэлэхдээ, БНХАУ-д талархаж байгаагаа илэрхийлээд, энэ хандив Украины яаралтай тусламжийн төвүүдийн үйл ажиллагааг сайжруулахад ихээхэн хувь нэмэр болно гэж мэдэгдлээ.
 
 
Д.Нямтулга 
Эх сурвалж: Монцамэ агентлаг