sonin.mn
Сэтгэгдэл (0)
Улаанбаатар /МОНЦАМЭ/.   Бүгд Найрамдах Өмнөд Судан Улсын Жуба хотод 2018 оны 11 дүгээр сарын 17-ны өдөр зохион байгуулсан "Данкон" маршийн тэмцээн болов. 
Тус улсад НҮБ-ын UNMISS энхийг сахиулах ажиллагаанд үүрэг гүйцэтгэж байгаа Монгол Улсын Зэвсэгт хүчний VIII ээлжийн мотобуудлагын батальоны 25 эрэгтэй, 6 эмэгтэй цэргийн алба хаагчид тус тэмцээнд амжилттай оролцжээ.
Дэлхийн 33 орны цэрэг, цагдаагийн алба хаагч, хүмүүнлэгийн ажилтан нийт 360 гаруй алба хаагч оролцсон тус тэмцээний эрэгтэйчүүдийн төрлийн 1 дүгээр байраас 10 дугаар байр болон 12 дугаар байраас 25 дугаар байрыг, эмэгтэйчүүдийн төрлийн 1 дүгээр байраас 4 дүгээр байр болон 6 дугаар байруудыг Монгол Улсын энхийг сахиулагчид эзэллээ.
 
 
Зэвсэгт хүчний 123 дугаар ангийн ахлагч М.Уртнасан, Зэвсэгт хүчний 310 дугаар ангийн дэслэгч Н.Ууганцэцэг нар 1 дүгээр байрт, Зэвсэгт хүчний 350 дугаар ангийн дэд ахлагч Б.Мөнхсайхан, Зэвсэгт хүчний 310 дугаар ангийн ахлах дэслэгч Ю.Туяа нар 2 дугаар байрт шалгарлаа.
 
 
Мөн Зэвсэгт хүчний 325 дугаар ангийн ахлагч Д.Мөнх-Очир, Зэвсэгт хүчний 013 дугаар ангийн дэслэгч Ц.Гэрэлтуяа нар 3 дугаар байрыг тус тус эзэлсэн амжилтаар тэргүүлж, хамтран үүрэг гүйцэтгэж буй орнуудын цэргийн алба хаагчдын дунд Монгол Улсын Зэвсэгт хүчний нэр хүндийг өндөрт өргөсөн үйл явдал боллоо.
1972 оноос энхийг сахиулагчдын дунд зохион байгуулагдаж ирсэн энэхүү нэр хүндтэй тэмцээний үндсэн шалгуур нь цэргийн алба хаагч 10 килограмм ачаатайгаар 25 км замыг туулах бөгөөд 35-40 хэмийн халуунд оролцогчдын хүч, тэсвэр хатуужил, хамтын гар нийлэмжтэй ажиллагааг шаарддаг онцлогтой юм.
 
Д.Өлзийсайхан
Эх сурвалж: Монцамэ агентлаг