sonin.mn
Сэтгэгдэл (0)

ДАЛЛАС. /Ёнхап/. Хүн төрөлхтөн анх удаа саран дээр хөл тавьснаас хойш 45 жил өнгөрчээ. 1969 оны долдугаар 20-ны өдрийн 16:18 цагт хүн төрөлхтөн анх саран дээр хөл тавьж байжээ.

“Аполлон -11” хөлгөөр саран дээр анх хөл тавьсан Нил Армстронгийг дурсан хүндэтгэх ёслолын үйл ажиллагааг АНУ-ын Сансрын уудам агаарын орон зайг судлах төв (NASA) орон нутгийн цагаар энэ сарын 21-нд Флорида муж улс дахь Кеннедийн сансрын баазад зохион байгуулах гэж байна. Саран дээр төрийнхөө далбааг мандуулсан тэрээр, “Нэг хүний хөлийн мөр төдий боловч хүн төрөлхтний агуу дэвшил” хэмээх алдартай үгийг хэлсэн билээ.

1957 онд дэлхийн анхны хиймэл дагуулыг сансарт хөөргөж, 1961 онд Ю.Гагарин дэлхийд анх удаа сансарт ниссэний дараа сансар судлалын хөгжлөөр ЗХУ-аас хоцорч байсан АНУ-ын Ерөнхийлөгч Кенгеди 1961 оны 10 дугаар сард хүн төрөлхтөн анх удаа сар луу зорчино гэдгийг зарлаж байсан билээ.

Удалгүй 1963 онд Кеннеди амь үрэгдсэн боловч түүний мэдэгдэл найман жилийн дараа хэрэгжсэн юм. Тухайн үед дэлхийн 500 сая хүн “Аполлон-11” хөлгийн саран дээр газардах агшныг телевизээр шууд хүлээн авч үзэж байлаа.

Судалгааны ажлаа амжилттай гүйцэтгэсэн хөлгийн багийнхан Хавайн ойролцоо Номхон далайд буусны дараа тэд үлдсэн амьдралдаа баатар хэмээн хүндлэгдэх алдрыг хүртсэн юм. Тэр цагаас сансрыг уудмыг судлах салбарт өндөр амжилт олж, нарны аймгийн гаригуудад чиглэсэн судалгаа хийж эхэлсэн байна.

А.Цацралт

Эх сурвалж: "Монцамэ" агентлаг