Улсын драмын эрдмийн театрын захирал, Урлагийн гавьяат зүтгэлтэн Д.Цэрэнсамбууг энэ удаагийнхаа “Өглөөний хүн” буландаа урьж, ярилцлаа.
-Өмнө нь тантай нэг биш удаа уулзаж, ярилцаж байлаа. Юутай ч хүсэлтийг минь хүлээн авсанд баярлалаа?
-Юун түрүүнд танай хамт олон болон нийт уншигчдад тань энэ өдрийн мэнд хүргэе. Чи бид хоёрын хэн хэн нь л ажлаа хийж явна.
-Баярлалаа, тэр ч тийм шүү. Тэгэхээр хоёулаа ярилцлагаа маш энгийн зүйлээс эхэлье. Театрын хамт олон маргаашнаас хөдөө орон нутгийг зорино. Зүүн гурван аймгийн үзэгчдэдээ ямар бэлэгтэй очихоор төлөвлөж байна?
-“Соёл урлагийн ажилтнууд хөдөөгийн уул талаар соёлын үрийг цацаж, ард түмнийг соён гэгээрүүлэх, тэдний хөтөч нь байх үүрэгтэй” гэж их зохиолч Д.Нацагдорж хэлсэн байдаг. Театрын хамт олон жил болгон энэхүү үүргээ биелүүлдэг.
Манай ахмад уран бүтээлчид хөдөө, орон нутгийн үзэгчдэдээ соёлын үр түгээхээр ачааны машин дээр суугаад явдаг байсан. Ингэхдээ хавар нэг сар, зун 45 хоногоор хөдөө, орон нутгаар явдаг байж. 1990-2002 оны хооронд амьдрал хэцүү байлаа шүү дээ. Энэхүү аялан тоглолт 10 гаруй жил зогссон.
Харин бид 2002 оноос нэг хэсэг тасалдсан энэхүү үйл ажиллагааг “Театрын өдрүүд” болгон өөрчилж, аялан тоглолтоор явж эхэлсэн.
-Анх Эрдэнэт хотоос эхэлж байсан байх аа?
-Тийм ээ. Өнгөрсөн хугацаанд театрын хамт олон Монгол Улсынхаа бүх аймгаар явж, тоглолтоо сонирхуулсан. Харамсалтай нь бүх сумаар явж чадахгүй байна. Тийм ч боломж, бололцоо алга.
-Театрын хамт олон өнгөрсөн оноос эхлэн хоёр дахь төслөө хэрэгжүүлж эхэлсэн шиг санагдана?
-Бид хоёр дахь төслөө говийн аймгуудаас эхэлсэн. Энэ жил зүүн аймгуудаар явахаар төлөвлөөд байна. Энэ сарын 18-30-нд Хэнтий, Дорнод, Сүхбаатар аймгаар явна. Театрын урын санд байгаа сүүлийн үед тайзнаа тавигдсан шилдэг, сонирхолтой гэсэн дөрвөн ч бүтээлээ дээжлэн орон нутгийн үзэгчдэдээ сонирхуулна.
-Жүжгээ тоглож сонирхуулахаас гадна өөр ямар нэгэн үйл ажиллагаа зохион байгуулах уу?
-Тэгэлгүй яах вэ. Хөдөө, орон нутгийн иргэдтэйгээ уулзалт зохион байгуулна. Энэ их сонирхолтой ажил болдог. Бид тухайн орон нутагт байгаа мэргэжлийн урлагийн байгууллагуудтай гэрээтэй ажилладаг. Энэхүү гэрээгээ дүгнэж, тэдэнд мэргэжлийн зөвлөгөө өгнө. Нэг үгээр хот, хөдөөгийн байгууллагын хамтын ажиллагаа явагддаг юм. Энэхүү аялан тоглолт хөдөө, орон нутгийн үзэгчдийн талархлыг хүлээсэн сайхан тоглолт болдог.
-Д.Цэрэнсамбуу захирлаа ингэхэд танай театрт яг юу болоод байгаа юм бэ?
-Ямар утгаараа.
-Яах вэ дэ, энэ сард товлогдсон жүжгүүд яагаад хойшлогдов. Дээр нь жил хагасын хугацаанд таван ч жүжигчин театраас гарлаа шүү дээ?
-Үнэнийг хэлэхэд тайзны боломж, бололцоо олдохгүйгээс жүжиг хойшлогдсон. Манайх Үндэсний дуу бүжгийн эрдмийн чуулга хоёр нэг тайзтай гэдгийг үзэгчид маань мэдэх байх. Бид чуулгад тайзаа ашиглуулах гэрээтэй ажилладаг. Тэгээд ч төрийн өмчийн төлөөллийн хувьд чуулгатай тайзаа булаацалдаж, нэгнийхээ ажлыг үрээд яах вэ гэж бодсон. Энэ сард чуулгын хамт олон тоглолттой. Манай жүжгүүд ирэх аравдугаар сараас тайзнаа тавигдана.
Харин театр үүсгэн байгуулагдсан цагаас уран бүтээлчид орж, гарч л байдаг. Зарим нэг нь мэргэжлийн ур чадварын хувьд тэнцээгүй тохиолдол ч бий байх. Театраас гарч, орох нь хувь хүний хүсэл сонирхол шүү дээ. Түүнийг нь бид хаах ёсгүй. Нөгөө талаар уран бүтээлийн даль жигүүр нь ургаж гүйцээд биднээс өрх тусгаарлаад гарч байгааг үгүйсгэхгүй. Үүнд нь бид нэг их эмзэглэдэггүй.
-Гэхдээ олон нийтийн зүгээс театраас гарч байгаа шалтгааныг нь өөр өөрийнхөөрөө л харж, тайлбарлаж байна. Нэг хэсэг нь жүжигчдийг театрыг ашиглаж нэрд гарчихаад карьераа хөөж театрыг орхиж байна гэж байхад зарим нь театрын цалин бага, хөрөнгө мөнгөний хөшүүргийн асуудал хүндрэлтэй гэж үзэж байна. Үүнд та ямар тайлбар өгөх вэ?
-Хүн эцсийн эцэст сайн сайхан л амьдрахыг хүснэ биз дээ. Уг нь манай театрын хамт олон бусдаас илүү баян цатгалан амьдрах ёстой. Цалин мөнгөний хувьд шүү дээ.
Үнэнийг хэлэхэд бид тийм байлгаж чадахгүй байна. Тиймээс амьдралынхаа сонголтыг хийж байгаа хүмүүсийг буруутгах аргагүй. Тэглээ гээд театрын үйл ажиллагаа доголдохгүй.
Театр хүнээр дутахгүй л гэдэг юм. Заримдаа дутах тохиолдол бий л дээ. Магадгүй УДЭТ-т дутагдах зүйлгүй байсан бол энэ уран бүтээлчид гарахгүй ч байсан юм бил үү. Нэг талаараа харамсалтай. Нөгөөтэйгүүр байдаг л үйл явц. Дэлхийн аль ч театрт уран бүтээлчид орж, гарч л байдаг. Үүнийг үзэгчид ялгаж, салгаж ойлгох хэрэгтэй.
Гэхдээ энд нэг зүйлийг хэлье. Монголын мэргэжлийн байгууллага, уран бүтээлчид бүгдээрээ хошин шог тоглож болохгүй. Бүгдээрээ драмын жүжиг тавьж болохгүй. Энэ утгаараа манай театрын эрхэм зорилго ч маш энгийн. “Мэргэжлийн өндөр түвшинд чанартай уран бүтээл туурвиж, ард түмнийг соён гэгээрүүлэх, тэдний оюуны хөтөч нь байх” гэж.
Яагаад ингэж хэлж байна гэхээр энэхүү эрхэм зорилгыг биелүүлэхийн тулд театрт төр дэмжлэг үзүүлж байх хэрэгтэй. Өнөөдөр нэг хэсэг нь урлаг уран бүтээлээрээ бизнес хийж байна. Үүнийг би буруутгахгүй. Гэхдээ бүгд бизнесийн зорилготой бүтээл туурвиж болохгүй биз дээ.
-Тантай санал нэг байна?
-Соёл урлагийн салбарт ажиллаж байгаа хүмүүс ард түмнээсээ нэг алхмын өмнө нь байх ёстой. Ийм бичигдээгүй хууль бий.
Харамсалтай нь энэхүү эрхэм зорилго маань төдийлэн биелэгдэхгүй байна. Эцсийн эцэст улс эх орны том эрх ашиг хаана явж байна гэдгийг бодох хэрэгтэй. Тэнд л бид үйлчлэх үүрэгтэй.
-Нэг хэсэг театр гэлтгүй соёл, урлагийн салбар өнчин хүүхэд шиг л явлаа. Харин шинэчлэлийн Засгийн газар байгуулагдснаар энэ салбар өөрийн гэсэн яамтай болсон?
-Үнэн л дээ. Үнэхээр бид нэг хэсэг өнчин хүүхэд шиг явсан. Нэг үе төр засаг ч хүнд соёл, урлагийн эрэлт хэрэгцээ байдаггүй юм шиг аашилсан. Хүн ном уншиж, хөгжим сонсч, кино үзэж, театрт очихгүй юм шиг л байлаа шүү дээ. Гэхдээ энэ бол том эндүүрэл байсан. Өнөөдөр цаг үе өөр болж байна. Театр урлагийн түвшин, түүнийгээ дагаад иргэдийн үзэл бодол ч өөрчлөгдөж байна.
-Тийм ээ, тантай санал нэг байна. Үнэхээр үзэгчид нэг үеэ бодоход театрт очдог, тэр хэрээр шинэ, соргог жүжиг үзэхийг хүсч, хүлээдэг болж. Театрын хамт олон Соёл, спорт, аялал жуулчлалын яамтай хэр уялдаа, холбоотой ажиллаж байна вэ?
-Энэ асуултад хариулахын өмнө 1990 оны ардчилсан хувьсгалын дараа соёл, урлагийн байгууллага ямар хүнд байдалд орсон тухай ярих хэрэгтэй байх.
-Тэг л дээ?
-Улс орон зэх зээлийн эдийн засагт шилжсэн шүү дээ. Бүх зүйл тэрхүү зах зээлийнхээ голдирлоор явах юм шиг санасан. Гэтэл тэр голдирлоор нь явдаггүй салбар гэж байна шүү дээ. Үүнийг тооцоолж үзэлгүйгээр “соёл, урлаг Монголд хэрэггүй ээ” гээд яамгүй болгочихсон.
Ингэснээр энэ салбар төр засгийн бодлого, ямар ч зохицуулалтгүй болсон. Энэ нь Монголын соёл, урлагийн хөгжилд үнэхээр уналт, ухралт гэж байдаг бол түүнийг нь авч ирсэн. Харин 2007 онд Соёл урлагийн ажилтнуудын улсын зөвлөгөөн болсон юм. Тэр зөвлөгөөн дээр бид хэд хэдэн асуудлыг дэвшүүлсэн. Өөрөөр хэлбэл төр засгаас зайлшгүй шийдвэрлэх ёстой зүйлээ дээш нь уламжилсан гэсэн үг л дээ.
Улмаар 2012 оны УИХ-ын сонгуулийн үр дүнд соёл гэдэг үгээр эхэлсэн яамтай боллоо. Монголын соёл, урлагийг хөгжүүлэх, шинэ шатанд авч ирэх төлөвлөгөө тусгагдсан. Тэрхүү төлөвлөгөө, программынхаа дагуу яам болон урлагийн байгууллагууд өнөөг хэр нь хамтарч ажиллаж байна даа.
-Тэгэхээр сүүлийн үед тайзнаа амилж байгаа том бүтээлүүд төр засгийн дэмжлэгтэйгээр үзэгчдийн хүртээл болж байгаа гэсэн үг үү?
-Тэгж ойлгож болно. Манай театрын зүгээс өнгөрсөн онд шинэ уран бүтээлүүддээ санхүүгийн дэмжлэг үзүүлэхийг яаманд уламжилсан. Тэд ч уриалгахан хүлээж авсан. Өмнө нь төр засаг байр, дулаанаар нь хангаж, хүмүүст нь хэдэн төгрөг л өгдөг байлаа шүү дээ. Ингэхдээ гол зүйл болох уран бүтээлийг маань санхүүжүүлдэггүй байсан.
Харин өнгөрсөн онд “Кихот ноён”, “Эцсийн зогсоол зөвхөн чи”, “Норовын намтар” зэрэг шинэ уран бүтээл хийлээ. Зөвхөн уран бүтээлийг маань дэмжиж яамнаас 200-гаад сая төгрөг олгосон.
-Харин энэ жилийн хувьд?
-Энэ жил улс орны эдийн засаг амаргүй байх шиг байна. Гэхдээ бид зүгээр суусангүй. Яамнаасаа бага зэргийн дэмжлэг авсан. Хамтарч ажиллаад уран бүтээлээ хийж байна. Ам нээвэл уушги нээ гэдэг. Энд зориуд нэг зүйл хэлэхийг хүсч байна.
-Юу тэр билээ?
-Цаашид ямар ч засгийн газар гарч ирсэн соёл, урлагийн салбарыг хариуцах нэгжгүй, төрийн аппаратгүй орхиж болохгүй. Үүнээс болж нэг хэсэг Монголын соёл, урлагийн салбарт үнэлж баршгүй хохирол учирсан. Энэ алдаагаа ямар ч төр засаг битгий давтаасай. Соёлын яамыг байнга байлгаж, их холыг бодсон улстөрийн бодлого явуулаасай гэж хүсч байна.
-Ирэх онуудад Улсын драмын эрдмийн театрын хамт олон үзэгчдэдээ ямар бэлэг барихаар зэхэж байна вэ?
-Манай театр 2014 онд тодорхой ажлууд төлөвлөсөн. Сүүлийн таван жилд 30 гаруй бүтээл хийсэн байна. Энэ бүтээлүүд манай театрын урын санд бий. Түүнийгээ үзэгч түмэндээ үзүүлэхийг түлхүү анхаарч ажиллаж байна.
Гэхдээ манай театрын Ерөнхий найруулагч, Төрийн соёрхолт Н.Наранбаатар 2014 оны ажил төлөвлөж байхад нэг санал ирүүлсэн. Театрт бэсрэг жүжгийн төсөл хэрэгжүүлмээр байна. Гадны уралдаан тэмцээнд оролцоход тайз, жүжигчдийн хувьд их цомхон. Тэр ч битгий хэл хөдөө, орон нутагт аялан тоглолтоор явахад ч зардал бага, үзэгчдэд олон талын ач холбогдолтой.
Нөгөөтэйгүүр төслийн зорилго долоон өөр найруулагчийн долоон өөр уран бүтээл хийнэ. Энэ ч утгаараа уран бүтээлийн эрэл хайгуул хийх, өрсөлдөөн бий болгох зэрэг олон давуу талтай гэж. Энэ төслийн хүрээнд эхний таван жүжгийг үзэгчдэдээ хүргээд байна. Одоо үлдсэн хоёр жүжиг дээр ажиллаж байна. Ирэх аравдугаар сард үзэгчдийн бүртээл болно. Яг одоогоор бол 2015 онд театр хийх ажлаа төлөвлөж байна.
-Тухайлбал?
Найруулагч Н.Наранбаатарын санаачилгаар “Үнэний хаан Будда” гэж сайхан жүжиг тавих гэж байна. Одоо зохиолыг нь бичүүлэх гээд захиалчихсан байгаа. Өнөөг хэр нь бүрэн хэмжээний бурхан багшийн тухай жүжиг тайзнаа нэг ч тавигдаж байгаагүй юм билээ. Ирэх ондоо багтааж үзэгчдийн хүртээл болгохоор ажиллаж байна даа.
Нөгөөтэйгүүр хөрөнгө мөнгөнийх нь боломж гардаг бол Н.Наранбаатар найруулагч алдарт “Ромео жульетта”-г тайзны бүтээл болгохыг мөрөөддөг юм. Олон жилийнх нь мөрөөдөл л дөө. Уран бүтээл туурвина, хийнэ гэдэг бол тайз дэлгэцийн тухайн уран бүтээлийн эмзэглэл байдаг юм болов уу гэж би боддог.
Тиймээс Н.Наранбаатар найруулагчийн төслийг хэрэгжүүлэхээр ажиллаж байна. 1980-аад онд тавигдаж байсан “Үгүйлэгдсэн хайр”, “гарын таван хуруу” жүжгийг шинээр тайзны бүтээл болгохоор төлөвлөж байна даа.
-Ярилцсанд баярлалаа.
Б.Төрбат
Эх сурвалж:
Сэтгэгдэл0