sonin.mn
Сэтгэгдэл (0)
Оросын Приморийн хязгаарын дархан цаазат газар  /ДЦГ/ Амур нэртэй бар,  Тимур нэртэй ямаа хоёрын үерхэл хоёр сар гаруй үргэлжилсний дараа амар мэнд төгсчээ. Энэ тухай Приморийн ДЗГ-ын ажилтнууд “Life News” телевизийн сувагт уламжилсан байна.
 
 Өнгөрсөн 11 дүгээр сарын 22-нд Приморийн Дархан цаазат газраас барын идшэнд амьд ямаа бариулахаар өгчээ. Гэтэл ямаа барыг харангуутаа айж эмээсэн шинжгүй, харин ч бүр  зоригтой байж,  барыг хэвтрээс нь хөөн,  бороо өнгөртөл тэндээ хоргодож байсан аж. Энэ цагаас хойш тэр хоёр нөхөрлөж, байнга хамт явах болсон бөгөөд зоригт ямаанд Тимур нэр өгсөн юм.   Тэгвэл саяхны нэгэн өдөр Тимур, Амур дээр ирж, түүний сүүлэн дээр гишгэхийг хэдэнтээ  оролдон, хагас цаг хиртэй тойрч эргэлдэж, эцэст нь урт эврээрээ барыг мөргөтөл, цаадах нь  цасан бүрхүүлтэй налуу газар руу халтирч унажээ. Энэ бүхэн Амурын тэвчээрийг барсан бололтой. Тэр Тимурын арьснаас нь  шүдээрээ зууж аваад  хажуу тийш  шиджээ. Ямаа  дөнгөж сая нэг тайвширч, бараас  зайтай хэвтэр дээрээ очжээ.
 
Энэ явдлаас хойш ДЦГ-ын ажилтнууд  Амурыг тайвшруулахын тулд түүний идшэнд туулай өгч, Тимурыг мал эмнэлгийн үзлэгт шилжүүлжээ.
 
“Амур, Тимур руу дайраагүй, тэр түүнд зөвхөн сургамж өгсөн. ДЦГ-ын  ажилтнууд  Тимурт  мал эмнэлгийн шинжилгээ хийхээр  авч явсан бөгөөд ямаа нь тарга тэвээрэг хэвийн, ноос гялгар цэвэрхэн байсан. Гэхдээ тэр энэ явдлаас болж  шоконд орсон нь лавтай бөгөөд энэ нь түүнд ёс суртахууны сургамж болсон гэнэ. Иймд хэсэг хугацаагаар эмнэлэгт байх болно” хэмээн ДЦН-ын захирал Дмитрий Мезенцев ярьжээ.       
 
Москва хот А.Огторгуймаа
 
Эх сурвалж: "Монцамэ" агентлаг