Лос- Анжелэс хотын “Монгол номын сан”-гийн 10 Жилийн ойн баярын тэмдэглэл
Хүмүүс амьдралынхаа ээдрээтэй олон асуултын хариуг номноос уншиж ухаардаг. Бусад хүмүүсийн амьдрал хийгээд хүний амьдралд байж болох олон учрал тохиолуудын талаар ч номноос олж уншина. Их зүйл олж мэдэхийг хүссэн хүнд ном илүү тус болдог. Ном их уншдаг хүний бодол эргэцүүлэл нь тэнцэрч үг хэл, яриа нь хүртэл тэгширдэг. Ном амьдралын баяр, гунигийн их далай.
АНУ ын Лос- Анжелэс хотноо ажиллаж амьдардаг миний дотны найз нар болох Г. Алтанхуяг, Б.Ган- Энхбаяр нар маань гэртээ “Монгол номын сан” байгуулаад 10 жилийг үджээ. Анх “Монголчуудын Холбоотой”- гоо хамтраад эхэлж байсан бол ѳдгѳѳ 1000 гаруй номтой болж ѳргѳжсѳн байна. Алив санааг эхлэх тийм ч хэцүү биш, харин гүйцэлдүүлж урт удаан хугацаанд ажил хэрэг болгоно гэдэг тийм ч амар биш ээ. Номын сан байгуулсан цагаасаа л богино ѳгүүллэгүүдийг уран сайхнаар унших “Утгын чимэг” уралдааныг зохион байгуулж эхэлсэн нь “ном унших урлаг”- ийг хүмүүст мэдрүүлэх сайн боломж болжээ.
Энэ оны 5 сарын 5 ны ѳдѳр Лос- Анжелэс хотын “Монгол номын сан”- гийн 10 жилийн ойн баярын хүрээнд зохион байгуулагдсан “Утгын чимэг” уран уншлагын наадамд оролцохоор, Вашингтон ДС хотын “Монгол Сургууль”-ийн захирал Түмэндэмбэрэл надад санал болгосноор, энэ уралдаанд оролцох 4 багшийн хамт бид Лос -Анжелэс хотыг машинаар зорьцгоов. Ажил тѳрѳл, зардал мѳнгѳнѳѳс үнэтэй “нѳхѳрлѳл” намайг тийш явах шалтаг нь болдог юм. 10 жилийн ойн баярын арга хэмжээ сайхан болсон.
“УТГЫН ЧИМЭГ” уран уншлагын уралдааны мэдээлэл
Вашингтон ДС, Чикаго, Сан Франциско, Лос Анжелэс хотуудаас 13 уран уншигчид оролцсон энэ наадмыг Г.Алтанхуяг \Лос анжелэс\, Г.Батцэнгэл \Чикаго\, Г.Галбадрах \Вашингтон ДС\ нар шүүж дүгнэлээ.
Энэ уралдааны эхний даваанд
1. Цэрэннадмид \ Вашингтон ДС \ “Интернэтийн амраг”
2. М.Билэгтбаяр \Лос Анжелэс\ “Жамухын ѳчил”
3. Д.Батсүх \Лос Анжелэс\ “Том сургамж”, “Хамгийн эрхэм хүн”
4. Б.Уянга \Вашингтон ДС\ Т.Бум Эрдэнэ “Бурхан минь та надад юу ѳгчихѳѳ вэ”
5. Д.Нурмаа \Вашингтон ДС\ Хатанбаатар “Эжийгээ хайрлаж яваарай”
6. Ш.Азжаргал \Лос Анжелэс\ “Хямдхан мах”
7. Д.Ганчимэг \Сан Франциско\ Ц.Доржготов “Хѳгжѳѳнтэй хѳгшид”
8. Болорцэцэг \Сан Франциско\ Хатанбаатар “Эжийгээ хайрлаж яваарай”
9. Ням Очир \Чикаго\ Амарсайханы “Шалгалт”
10. Б.Энхжаргал \Лос Анжелэс\ Ж.Лхагва “Мехиричийн шѳнѳ”
11. Мѳнхзаяа \Сан Франциско\ “Болзоо”
12. С.Пүрэвдулам \Вашингтон ДС\ Б.Лхагвасүрэн “Үхтэл үр харам”
13. Т.Оюун \Сан Франциско\ “Галын бурхан”
Эхний даваанд оролцсон 13 уншигчаас шалгарсан 8 уншигч хоёр дахь даваанд дахин нэг бүтээл уншин ѳрсѳлдѳв.
1. Д.Ганчимэг \Сан- Франциско\ “Үргэлж дэргэд эх орон”
2. Ням Очир \Чикаго\ Э.Болорцэцэг “Сүүлчийн бороо”
3. Ш.Азжаргал \Лос- Анжелэс\ Т.Бум Эрдэнэ “Бурхан минь чи надад юу ѳгчихѳѳ вэ?”
4. Т.Оюунаа \Сан –Франциско\ У.Болор Эрдэнэ “Үл таних эхийн ѳчил”
5. Мѳнхзаяа \Сан -Франциско\ Хатанбаатар “Эжийгээ хайрлаж яваарай”
6. Б.Энхжаргал \Сан- Франциско\ “Америкт хѳглѳсѳн явдал”
7. М.Билэгтбаяр \Лос- Анжелэс\ “Монгол тѳрийн гал голомт”
8. Болорцэцэг \Сан –Франциско\ Батзориг “Зуун грамм”
Үзэгчид нь сэм сэмхнээр санаа алдаж, хааяадаа чийгтсэн аньсгаа арчиж, заримдаа хѳгжилдѳн инээлдэж Монголын зохиолчдын аялгуу тансаг хэллэг, уянга тѳгс дүрслэл, ухаарал хайрын их шад бадгуудаар амьсгалсан “Утгын чимэг” наадмын дүн гарахад:
1. Т.Оюунаа \Сан- Франциско\ тэргүүн байр
2. Ш.Азжаргал \Лос –Анжелэс\ дэд байр
3. Б.Энхжаргал \Сан –Франциско\ гутгаар байр
тус тус эзлэн шагнагдлаа. Энэхүү наадамд оролцсон уран уншигчдын ур чадвар үнэхээр гайхалтай сайн байсан нь 10 дахь удаагаа зохион байгуулагдаж буй энэхүү “Утгын чимэг” наадам, Америк дахь монголчуудын дунд 2 жил тутам зохион байгуулагдах болсон “Уран угсийн наадам” ын сайн нѳлѳѳ мѳн. Сүүлийн жилүүдэд залуус энэ арга хэмжээнд амжилттай оролцох болсон нь энэхүү наадмуудын зорилгын биелэл болж байна. Энэ наадмын нээлт дээр яруу найрагч Ц.Хулангийн “Ганцхан эжийдээ унших шүлэг”- ийг сурагч Хонгор уншсан нь үүний нотолгоо.
Аливаа арга хэмжээ олон хүний чин сэтгэлийн тус дэм дээр л сайхан болдог аж. Хѳтлѳгч Болор- Эрдэнэ, морин хуурч Баттогтох, амьд хѳгжмийн “Даян” хамтлаг болон бүжигчин Батцэнгэл, Занабазар, нугараач Азжаргал, залуу дуучин Анун, зураач Цэдэвдорж нар энэ арга хэмжээг хѳгжүүн, цэнгүүн сайхан болголоо.
Монголчууд биднээс харийн орон, хүний нутагт цаг хугацаа болон мѳнгѳний золиос болон ажиллаж амьдарч байгаа нь олонхи. Гэхдээ хүн болгоны сэтгэлийн чанадад ЭХ ОРОН нь оршиж буй. Тийм болохоороо монгол хэл, монгол урлаг, монгол зан заншил, монгол түүх соёлынхоо тѳлѳѳ ѳѳр ѳѳрсдийн хийж бүтээж чадах болгоноо хийхийг хичээдэг. Магадгүй Монгол орон минь ѳдийг хуртэл тусгаар оршиж ирсний тѳлѳѳх талархал, цаашид ч тусгаар тогтнон оршихуйн хүсэл үүн рүү хѳтѳлдѳг байх. Аялгуу тѳгс монгол хэл, утга тѳгѳлдѳр бүтээлгүйгээр бид хэрхэн тусгаар оршин тогтнож чадах билээ. Энэ сайхан үйлсэд сэтгэлээ чилээн, үйлсээ зориулж яваа эрхэм анд Г.Алтанхуяг, Б.Ган- Энхбаяр нартаа баяр хүргэж талархал дэвшүүлж байна. Номын цагаан буян дэлгэрэх болтугай.
Харнууд овгийн Гомбосүрэнгийн Галбадрах
Сэтгэгдэл0
Сөнж яваа монголчууд.
Америкийн номын сангийн загвар Монголд нутагших боломжтой эсэхийг судлаач. Монголд сайхан номын сан байхгүй шүү дээ. Төв номын сангийн байр нь муу дээрээс нь хэрэгтэй орчин цагийн технологийн нэг ном байхгүй. Программ хангамжийн эйпл, гүүгэл гээд компаны программ бичдэг болгох гэхээр нэгч ном төв номын санд алга байна. Төв номын санд байгаа номын дотор хэрэг болох агуулгатай зүйл тун ховор шүү.
Харьд цагаачилж амьдрахыг магтан дуулагч Г.Галбадрах гэгч гадаадын захиалгаар ийм хорлонтой юм бичиж байх юм.Г.Галбадрахынхаар бол бүгд америкт очиж тэдний тусгай албаны дэмжлэгээр амьдрах юм гэж үү. Хүн хоолоо олж идэхдээ бусдад хорлон ажил хийж болохгүй.
ЯМАР САЙХАН ГЭГЭЭЭЛЭГ МЭДЭЭ ВЭ ДЭЭ.
ТА НАРТАА ЭРҮҮЛ ЭНХИЙГ ХҮСЬЕ.
Ekh ornoosoo daijigchid
Amerikt durwej garchihaad yanii chini ayalguu saihan mongol hel, helee medehgui huuhduud chini ter yaduu mongold chini bi ochihgui gej uilj bna gesen, ene ugiig ta nar l zaaj surgasan
Америкт амьдардаг байж хараал идсэн коммунист сэтгэхүйтэй хүмүүс байгаад байхаар бүр багтарч үхмээр шүү. Тэгсэн мөртлөө ардчилал ярьж, монголчуудад капитализм зааж, америкийг магтан дуулж энэ тэр. Та нар яг үнэндээ америк гэж ямар улс гэдгээ мэдэхгүй нэг л их эх орон ярьсан худлаа гарууд шд. Гэтэл үнэндээ та нарын эх орон чинь АНУ шүү дээ. Энийгээ ядаж ойлгож ухаар л даа. Ийм нас дээр гарчихаад...
Номых сан ч гэж дээ. Ном мөнгөөр барьцуулж уншуулдаг гарууд ш дээ. Карт нээлгэнэ 20$. Ном авч уншихад тус бүр 2$, амбасын үеийн хуучин сэтгүүл авч харъя гэхээр бас үнэтэй сэтгүүл тус бүр 1$. Хандиваар монгол хүмүүс номоо бэлэглэдэг вм шиг бна лээ. Эргээд тэр номоо мөнгөөр гаргадаг. Карт нээлгэхэд өгсөн 20$ нь л ном авахад барьцаа болчихмоор сон. Хэд хэдэн танил маань ингэж хоорондоо ярилцаад мөнгө төлж ном авахаа огт больсон доо. Одоо ичихгүй тэр барьцаагаа нэмсэн ч байж магадгүй.
Ном мөнгөөр барьцаалж уншуулдаг гарууд ш дээ. Карт нээлгэнэ 20$. Ном авч уншихад тус бүр 2$, амбасын үеийн хуучин сэтгүүл авч харъя гэхээр бас үнэтэй, сэтгүүл тус бүр 1$. Хандиваар монгол хүмүүс номоо бэлэглэдэг юм шиг бна лээ. Эргээд тэр номоо мөнгөөр гаргадаг. Карт нээлгэхэд өгсөн 20$ нь л ном авахад барьцаа болчихмоор сон. Хэд хэдэн танил маань ингэж хоорондоо ярилцаад мөнгө төлж ном авахаа огт больсон доо. Одоо ичихгүй тэр барьцаагаа нэмсэн ч байж магадгүй.
үнэхээр гайхалтай монголчууд хаан ч ѳв соёлооо түгээж дэлгэрүүлэх эрхтэй:)