Гадаадын Иргэн Харьяатын Газраас өнгөрсөн долоо хоногт хийсэн хяналт, шалгалтын талаар өнөөдөр мэдээлэл хийлээ. 
Энэ үеэр тэд: "Манай Монгол улсад 306 Вьетнам иргэн амьдардаг. Үүний  206 нь хөдөлмөр эрхэлдэг.  Эдгээр иргэдээс 45 нь зориулалтын бус буюу хөрөнгө оруулагчийн визээр засварын газар ажиллуулж байсныг шалгалтаар илрүүллээ" хэмээсэн юм.
 Мөн Гадаадын Иргэн Харьяатын Газрын Хяналт Шалгалтын Хэлтсийн Дарга Х.Бэхбат:  “Хөдөлмөр эрхлэх визтэй иргэд сар бүр Монгол Улсад 840 мянган төгрөг, нийгмийн даатгал, эрүүл мэндийн даатгал болон бусад даатгалыг улсад төлөх хуультай. Гэвч Вьетнам улсын эдгээр 45 иргэн татвар төлөөгүйгээс улсад нэг тэрбум орчим төгрөгийн хохирол учирсан. Тиймээс ГИХГ-аас эдгээр иргэдийн татварыг төлүүлж, албадан гаргах хуулийн дагуу арга хэмжээ авч ажиллана” гэв.
 
Мөн 2004 оноос хойш бичиг баримтгүй, хууль бусаар ажиллаж, амьдарч байсан Хятадын хоёр иргэн, 1996 оноос хойш хууль бусаар, бичиг баримтгүй амьдарч байсан  Югаслав /хуучин/ улсын нэг иргэнийг олж, хуулийн дагуу арга хэмжээ авахаар болжээ.
Дашрамд дурьдахад Ерөнхий Сайд У.Хүрэлсүх Гадаадын Иргэн Харьяатын Газарт Монгол улсад хууль бусаар оршин сууж буй иргэдийг цэгцлэх үүрэг өгсөн нь ийн ажил хэрэг болж буй гэнэ.
 
Ч.Явуу