sonin.mn
Дуучин Эгшиглэн, “Айс топ”-ын Кобитой хар тамхи хэрэглэж байгаад баригдсан байна-
 
ЦЕГ-ын хэвлэл мэдээллийн төвийн дарга, дэд хурандаа Б.Баатархүү өчигдөр цаг үеийн асуудлаар мэдээлэл хийлээ.
Тээврийн прокурорын газрын хяналтын прокурор асан Х.Тамир дахин хар тамхины хэрэгт холбогдлоо. Тэрбээр өмнө нь прокуророор ажиллаж байхдаа хар тамхи хууль бусаар олж авсан, хавтаст хэрэг шийдвэрлэлгүй олноор дарагдуулсан гэх хэрэгт холбогдон шалгуулж байсан юм. Тэгвэл түүнийг дахин өнгөрөгч баасан гарагт ЦЕГ-ын Хар тамхитай тэмцэх газрын ажилтнууд баривчилжээ. Түүнтэй хамт Улсын ерөнхий прокурорын дэргэдэх Мөрдөн байцаах албанд хамт ажилладаг байсан, өмгөөлөгч хамт саатуулагдсан байна.
Өнгөрсөн оны нэгдүгээр сард Тээврийн прокурорын газрын хяналтын прокуророор ажиллаж байсан Х.Тамир, Тагнуулын ерөнхий газарт ажиллаж асан Б.Амарбаясгалан, хилээр хар тамхийг нь оруулж ирсэн Б.Сүхбаатар, Н.Мөнхбат, хээл хахууль өгч зам, тээврийн ослын хэргээ даруулсан Л.Жавхлан нарын таван хүнд холбогдох хэргийг Баянгол дүүргийн Эрүүгийн хэргийн анхан шатны шүүх хэлэлцсэн.
Тухайн үед Х.Тамирыг мансууруулах бодис хилээр оруулсан, борлуулах зорилгогүйгээр олж авсан үйлдлийг нь хэрэгсэхгүй болгож, албан үүрэгтээ хайнга хандсан, 15.8 сая төгрөгийн хахууль авсан гэм буруутайд тооцож байв. Гэвч давж заалдах шатны шүүх хэргийг дахин хэлэлцүүлэхээр анхан шатны шүүх рүү буцааснаас хойш нэмэлт мөрдөн байцаалт хийлгэхээр болж, холбогдсон хүмүүсийг нь батлан даалтад гаргаад байсан юм.
Мөн 2018 оны тавдугаар сарын 4-нөөс 5-нд шилжих шөнө өмнө нь хар тамхины хэрэгт холбогдон шүүхээс хоёр удаа шийтгүүлж байсан, “Айс топ” хамтлагийн Коби буюу С.Чулуунбаатар /38 настай/ нь дуучин Эгшиглэн буюу Т.Болортуяатай /29 настай/ хамтран хар тамхи мансууруулах бодис хууль бусаар олж авч, хэрэглэж байхад нь Баянгол дүүргийн цагдаагийн хэлтсээс дайчлан баривчилсан. С.Чулуунбаатарын хувьд энэ оны хоёрдугаар сард ялын хугацаа дуусаж суллагдсан байжээ.
Түүнчлэн энэ сарын 22-нд мансууруулах төрлийн ургамал болох марихуаныг хууль бусаар гэртээ тарьж ургуулсан хэргийг ч илрүүлжээ. Тодруулбал, Монгол Улсын иргэн, 23 настай Б, Д нарыг Хан-Уул дүүрэгт гэртээ байхад нь дайчлан баривчилж, их хэмжээний ургамал тарьж байсныг таслан зогсоож, эд мөрийн баримтаар хурааж аван шалгаж байна.
Энэ сарын 19-нд Сонгинохайрхан дүүргийн нутаг дэвсгэрт ноцтой зам тээврийн осол гарсан. Цагдаагийн алба хаагч, хурандаа осол гаргалаа гэсэн ташаа мэдээлэл олон нийтэд цацагдсан. Шалгаад үзэхэд 2007 онд тэтгэвэрт гарсан дэд хурандаа цолтой хүн байсан. Зам тээврийн осолтой холбоотой энэ асуудлыг цагдаагийн байгууллагаас хуулийн дагуу Сонгинохайрхан дүүргийн цагдаагийн хэлтэст шалгаж байна. Үүнд цагдаагийн алба хааж байсан хүн гэдэг утгаараа давуу эрх олгох гэх мэт асуудал байхгүй. Хууль тогтоомжид заасны дагуу шалгаж шийдвэрлэж, эцсийн шийдвэр гарсны дараа хэрхэн шийдвэрлэсэн талаараа та бүхэнд эргэн мэдээлэх болно"
 
Мөн тэрбээр мэдээллийнхээ дараа дараах асуултад хариуллаа.
 
-Цагдаагийн ерөнхий газрын даргын тушаалаар цагдаа. дотоодын цэргийн анги. байгууллагын үйл ажиллагаа болон алба хаагчдын мэргэшлийн төвшинг үнэлэх хяналт, шалгалтыг зохион байгуулж эхэлжээ. Энэ талаар тодорхой мэдээлэл өгнө үү
 
-Монгол Улсын Засгийн газраас 2018 оныг "Хариуцлагын жил" болгон зарласан. Сахилга, хариуцлага, дэг журмыг чангатгах тухай Засгийн газрын даалгаврыг төрийн байгууллагын бүх шатанд бүрэн хэрэгжүүлэхийг үүрэг болгосон. Энэхүү ажлын хүрээнд Цагдаагийн ерөнхий газрын дарга тушаал гаргасан.
Тэрхүү тушаалын хүрээнд цагдаа, дотоодын цэргийн ангийн үйл ажиллагаа, алба хаагчдын мэргэшлийн төвшинг тодорхойлох Ажлын хэсгүүд ажиллаж байна. Дээр нь шинээр батлагдсан хууль, тогтоомжийн хэрэгжилттэй танилцахаас гадна сургалт зохион байгуулах үүрэгтэй юм. Ажлын хэсгүүд хөдөө, орон нутгийн цагдаагийн газар, хэлтсүүдэд ажиллаж байна.
 
-Ажлын хэсгүүд хэр хугацаанд ажиллах вэ. Хэзээ ажлаа дүгнэж, олон нийтэд мэдээлэх вэ?
 
-Цагдаагийн ерөнхий газрын даргын тушаалаар томилогдсон Ажлын хэсгүүд ирэх сарын 15-ныг хүртэл ажиллана. Дараа нь үр дүнг тооцох болно.
 
-Ажлын хэсгийн гол зорилго, шалгуур нь юу вэ?
 
-Энэхүү үйл ажиллагааны гол зорилго нь тодорхой. Анги, байгууллагын үйл ажиллагаа болон алба хаагч, ажилтнуудын тухайн албан тушаалд тавигдах ерөнхий болон тусгай шаардлагыг хангасан байдал, үйл ажиллагааны үр дүн, мэргэшил, ажлын ур чадварын төвшинг тодорхойлоход чиглэгдсэн. Түүнчлэн Цагдаагийн ерөнхий газрын удирдлагын бүрэлдэхүүн хөдөө, орон нутагт ажиллах үеэрээ иргэдтэй уулзалт зохион байгуулна. 
Ингэхдээ цагдаагийн байгууллагын үйл ажиллагааны талаарх иргэдийн санаа, бодлыг сонсох юм. Харин энэхүү уулзалтад иргэд идэвхтэй оролцож, санал хүсэлтээ өгч болно. Тухайн иргэний өгсөн санал цагдаагийн төв байгууллагад удирдлагад ирнэ. Энэ дагуу цагдаагийн байгууллагаас тодорхой арга хэмжээг үе шаттайгаар авч шийдвэрлэнэ.
 
Б.Төгөлдөр
Эх сурвалж: "Өглөөний сонин"