sonin.mn
НЬЮ-ЙОРК. /Associated Press/. АНУ-ын Ерөнхийлөгчийн албан тушаалыг 2009-2017 онд хашиж байсан Барак Обама дэд ерөнхийлөгч асан Жозеф Байдены сонгуулийн өмнөх кампанит ажилд анх удаа оролцжээ. Ирэх 11 дүгээр сард болох ерөнхийлөгчийн сонгуульд Ардчилсан намаас нэр дэвшигчийг тодруулахын тулд удахгүй хийх намын хурлын төлөөлөгчдөөс Ж.Байден хангалттай тооны дэмжлэг авчээ.
“Associated Press” агентлагийн мэдээлснээр, Барак Обама эфирт гарснаар 7.6 сая гаруй ам.долларын хандивыг Жозеф Байдены сонгуулийн өмнөх кампанит ажилд зориулж цуглуулж чадсан байна.  
 
Коронавирусний цар тахал дэгдээд буйтай холбоотойгоор хандив цуглуулах арга хэмжээ цахим хэлбэрээр явагджээ. Энэхүү арга хэмжээний шууд дамжуулалтанд нэвтрэхийн тулд Байденыг дэмжигчид түүний сонгуулийн өмнөх кампанит ажилд нь зориулж дурын хэмжээгээр хандив өгөх боломжтой байжээ. АНУ-ын Зүүн эргийн цагаар 17:15 цагт шууд дамжуулалт эхлэх үед сонгуулийн өмнөх кампанит ажлын штабын дансанд 7.6 сая гаруй ам.доллар орсныг Жозеф Байден цохон тэмдэглэжээ. Түүний кампанит ажилд 175 мянга гаруй хүн мөнгө хандивлажээ.  
 
Цахим арга хэмжээний үеэр Обама анх удаа Байденыг дэмжсэн үг хэлж, Цагаан ордны одоогийн тэргүүний засаг захиргааны талаар сөрөг хандлагатай үг хэлжээ. Түүнчлэн тэрбээр коронавирусний цар тахалтай тэмцэх хүрээнд Д.Трампын авч хэрэгжүүлж буй арга хэмжээнүүдийг шүүмжилсэн байна. АНУ-д ирэх 11 дүгээр сард болох ерөнхийлөгчийн сонгуульд Ардчилсан намаас нэр дэвшихийн тулд сунгаанд нэр дэвшигч намынхаа 1991 төлөөлөгчийн саналыг авах шаардлагатай бөгөөд бүх сунгаа, намын идэвхтнүүдийн хурлын дүнгээр Ж.Байден 2144 төлөөлөгчийн дэмжлэгийг авчээ. Ерөнхийлөгчийн сонгуульд Ардчилсан намаас нэр дэвшигчийг Ж.Байден хэмээн намын хурлаар эцэслэн шийдвэрлэх ёстой бөгөөд хурлыг коронавирусний цар тахлын улмаас 8 дугаар сарын 17-наас 20-ны хооронд болгон хойшлуулжээ. 
 
 
Э.Аянзаяа
Эх сурвалж: Монцамэ агентлаг