НИТХ-ын Тэргүүлэгчдийн хуралдаан 4 дүгээр сарын 7-нд  болж хуралдаанаар ”Барилга барих газрын эрх олгох, барилгын эх загвар зураг батлах, барилга угсралтын ажил эхлүүлэх, ашиглалтад оруулах үйл ажиллагааны журам”, “Газар эзэмших эрхийн гэрчилгээг шилжүүлэх, хугацааг сунгах, газрын зориулалт өөрчлөх үйл ажиллагааны журмын төслийг хэлэлцлээ.

Нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат,  “Энэхүү журам нь барилга барих зориулалтаар газар олгохоос эхлэн барилга дуусаж ашиглалтад оруулах хүртэлх харилцааг зохицуулсан.

Нийслэлийн хэмжээнд газар болон барилгын асуудлаар иргэн, хуулийн этгээд төрийн үйлчилгээ авахад тухайн харилцааг зохицуулсан олон хууль дүрэм, журмыг үзэж танилцах шаардлага байдаг. Тэгвэл энэ журам нь эдгээр олон хууль дүрэм  журмыг нэгтгэж, энгийн ойлгомжтой болгосон.

Журам батлагдсанаар иргэн, хуулийн этгээдийн барилгын зориулалтаар газар олгох эзэмшүүлэх, ашиглуулах эрхийн гэрчилгээг дуудлага худалдаа, төсөл сонгон шалгаруулалтаар олгох, эзэмшлийн гэрчилгээг шилжүүлэх, хугацааг сунгах, газрын зориулалт талбайн хэмжээг өөрчлөх зэрэг хүсэлтийг шийдвэрлэх, эдгээр харилцааг зохицуулах бүрэн мэдээллийг авах боломж бүрдэнэ” гэдгийг онцоллоо.

Мөн журамд иргэдийн хүсэлт, саналыг шийдвэрлэх хугацааг нарийн тогтоож, хариуцлагын асуудлыг ч боловсронгуй болгосон гэлээ.

Тодруулбал, нийслэлийн нутаг дэвсгэрт барилга барих газрын эрхийг иргэн хуулийн этгээдэд  олгохдоо заавал  Газрын тухай хуулийн дагуу дуудлага худалдаа төсөл сонгон шалгаруулалтаар олгоно. Хэрвээ энэ заалтыг зөрчвөл нийслэлийн Засаг даргыг албан тушаалаас нь огцоруулах үндэслэл болно гэж заасан байна.

Барилга эхлүүлэх зөвшөөрлийг олгох хугацааг 14 хоногт багтаан шийдвэрлэхээр тусгажээ. Мөн энэхүү журамд иргэдийн оролцоог хангах асуудлыг нарийн тусгасан байна.

Тухайлбал орон сууцны хороолол дундах барилгажаагүй талбайд барилга барих тохиолдолд нэгж талбарын хил хязгаарыг тогтоосон эргэлтийн цэгүүдээс 90 метр байгаа үл хөдлөх хөрөнгийн өмчлөгч буюу иргэдээс  санал авч, саналаа өгсөн иргэдийн 70 хувь нь зөвшөөрсөн тохилдолд барилга барих зөвшөөрөл олгохоор тусгасан байна.

Журмыг барилга угсралтын ажил эхлэхээс өмнө эцэслэн болвсруулж, батлуулах шаадлагатай байгаа юм байна. Хуралдааны үеэр Улаанбаатар хотын Ерөнхий архитектор Н.Нацагдорж, “Журам батлагдтал барилга угсралтын үйл ажиллагаа эхлүүлэх зөвшөөрлийг түр хугацаанд зогсоосон” гэж хэллээ.

НИТХ-ын Тэргүүлэгчид энэхүү асуудлыг хэлэлцээд, нийслэлийн нутаг дэвсгэрт нийтээр дагаж мөрдөх томоохон журам учраас НИТХ-ын нэгдсэн хуралдаанаар хэлэлцүүлэн батлах нь зүйтэй гэдэг дээр санал нэгдэв. Ингэснээр НИТХ-ын ээлжит бус хуралдааныг энэ сарын 10-ны Пүрэв гарагт хуралдуулахаар боллоо гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.