sonin.mn

Мьянмарын Холбооны Бүгд Найрамдах Улсын Холбооны Парламентын дарга Тура У Шве Манн Монгол Улсын Их Хурлын дарга З.Энхболдын урилгаар 4 дүгээр сарын 12-15-ны өдрүүдэд Монгол Улсад албан ёсны айлчлал хийнэ.

Айлчлалын үеэр Мьянмарын Холбооны Парламентын дарга Тура У Шве Манн Монгол Улсын Их Хурлын дарга З.Энхболд нар албан ёсны хэлэлцээ хийж, Ерөнхий сайд Н.Алтанхуяг хүлээн авч уулзах болон албаны бусад хүмүүстэй уулзахаар төлөвлөж байна.

Энэхүү айлчлал нь Монгол Улсын Ерөнхийлөгч Ц.Элбэгдоржийн 2013 онд тус улсад хийсэн төрийн айлчлалын үр дүнд мьянмарын талаас хэрэгжих гэж буй өндөр, дээд түвшний анхны айлчлал гэдгээрээ онцлог юм.

Айлчлалын үеэр Монгол, Мьянмарын харилцаа, хамтын ажиллагааг эрчимжүүлэх, хоёр орны хууль тогтоох байгууллага хооронд харилцаа холбоо тогтоох, ардчилал, иргэний нийгмийн замыг сонгон шилжилтийн үйл явцыг эхлүүлээд буй Мьянмар Улсад Монгол Улсын ардчилал, нийгэм, эдийн засгийн шилжилт хийсэн туршлага солилцох болон олон улсын тавцанд хамтран ажиллах зэрэг өргөн хүрээний асуудлаар санал солилцоно.

Мьянмар Улс нь энэ онд АСЕАН-ыг даргалж буйтай холбогдуулан АСЕАН-ы Яриа хэлэлцээний түнш, Зүүн Азийн Дээд түвшний уулзалтын оролцогч болох Монгол Улсын зорилтуудыг урагшлуулан хэрэгжүүлэхэд тус улсын дэмжлэгийг авахад энэхүү айлчлал чухал ач холбогдолтой юм.