Хуулийн салбарын шинэчлэлийн тухай нийгмийг талцуулсан маргаан хоёр жил дамнан үргэлжилж байгаа. Ямар ч байсан эл том маргааны ард энэ салбарын бүтэц, зохион байгуулалт хийгээд үйл ажиллагааг зохицуулах нэлээд олон хууль, тогтоомж Засгийн газраар батлагдаж, эхнээсээ хэрэгжиж байна. Энэ сарын 4-нөөс цагдаагийн бие бүрэлдэхүүн шинэ дүрэмт хувцсаар жигдэрч, албан үүргээ гүйцэтгэж эхэлсэн.
Хачирхалтай нь тэд шинэ өмсгөл өмссөн анхны өдрөөсөө л шүүмжлэлд өртөж жуулчин, загасчин, анчин эсвэл ойн хамгаалагч гэж цоллуулахад хүрэв. Тэгвэл малгайнаасаа эхлээд асуудал дагуулж, өнөөг хэр нь олон нийтийн ярианы сэдэв хэвээр байгаа шинэ дүрэмт хувцасныхаа талаар цагдаа нар ам сайтай байна.
Хэдийгээр гудамжинд ажил үүргээ гүйцэтгэж яваа цагдаа нарт удирдлагууд нь “Шинэ дүрэмт хувцасныхаа талаар хэнд ч ам нээж болохгүй” гэх утгатай лүндэн буулгасан ч тэд эдэлгээ сайн, биед эвтэйхэн, хөнгөхөн, хөдөлгөөнд саад учрахгүй гээд олон давуу талтайг хэлж байна.
Өнгөрсөн жил цагдаагийн алба хаагчдын дүрэмт хувцасны загварыг шинэчлэх ажлын хүрээнд ШУТИС-ийн хувцас судлалын төвтэй хамтарсан ажлын хэсэг байгуулан ажиллажээ. Цагдаагийн алба хаагчдын хувцсыг олон улсын түвшинд хийхийн тулд гадаадад цэрэг цагдаагийн хувцас, тэдгээрийн материал зэргийг судалж хувцасны загварыг батлуулсан аж.
Материалын хувьд хувцасныхаа эдэлгээний нормтой уялдаж өгчээ. Тодруулбал энэ жил бэлдсэн өдөр тутмын хувцас нь ус, чийг нэвтрүүлдэггүй, хөлс гадагшлуулдаг, норсон тохиолдолд түргэн хатдаг материалтай.
Мөн шинэ дүрэмт хувцсанд поло цамц нэмэгдсэн байна. Уг цамцыг зун, хавар дангаар нь өмсөж болохоос гадна индүүдэх шаардлагагүй. Тамирчдын хувцас хийлгэдэг материалаар албаны хүрмийг хийлгэж, гутлыг өмсөх хувцастайгаа холбогдуулж зургаан төрлөөр хийсэн байна.
Энэхүү шинэ дүрэмт хувцасны загварыг өнгөрсөн оны есдүгээр сард Монгол Улсын Ерөнхийлөгчийн 149 дүгээр тогтоолоор баталжээ. Ингэхдээ өнгөрсөн жил улсаас 5.5 тэрбум төгрөг төсөвлөсөн байна. Энэ удаагийн шинэ дүрэмт хувцсанд 3.5 тэрбум төгрөг төсөвлөж, гадны олон орныг судалснаас Туркийг сонгосон аж.
Эхлээд дотоодын үйлдвэрлэгчдээ дэмжих үүднээс оёдлын томоохон үйлдвэрийн эздийг уг ажилд урьсан хэдий ч сурагчийн дүрэмт хувцасны захиалгатай давхцсан тул “2014 оны нэгдүгээр улирлын сүүлчээс нийлүүлж болох юм” гэх хариуг өгсөнөөс гадна төсөвт өртөг нь өндөр байсныг албаныхан хэлж байна.
Энэ талаар ЦЕГ-ын Хэвлэл мэдээллийн төвийн дарга, хурандаа Б.Баатархүүгээс тодруулахад “Өнгөрсөн онд цагдаагийн алба хаагчдын хуучин хувцас тараагдаж дууссан. Тэгээд ч 2013 оны есдүгээр сард цагдаагийн албаны дүрэмт хувцасны загвар батлагдсан. Тухайн ондоо багтааж улсын төсөвт тусгагдсан хөрөнгөндөө багтаж цагдаагийн шинэ дүрэмт хувцас хийлгэх гэрээ байгуулах зайлшгүй шаардлага тулгарсан.
Бид монголдоо томоохон гэгддэг хэд хэдэн оёдлын үйлдвэрт урилга хүргүүлсэн. Харамсалтай нь тэдний зүгээс энэ онд гэрээ байгуулж ажиллах боломжгүй гэсэн. Тэгээд ч манай улсад найман мянган хүний хувцас оёх үйлдвэр байгаагүй.
Тиймээс гадаадын орнуудыг судалж, Туркийг сонгосон. Европ технологи нэвтрүүлсэн гэдэг утгаараа Турк улс хамгийн сүүлийн үеийн загвар, материалаар хийж өгөх саналаа ирүүлсэн юм. Тэд дотоодын үйлдвэрлэгчдийн үнийн саналаас бага дүн хэлсэн. Нэг алба хаагчийн хувцсыг 107 мянган төгрөгөөр оёж өгсөн” гэв.
Цагдаагийн дүрэмт хувцас нь бат бөх, галд тэсвэртэй материалаар хийсэн байх ёстой гэсэн шаардлагыг манайхан тавьсан юм байна. Туркээс ирүүлсэн материалаар загварын дагуу хувцас хийж, цаг агаарын янз бүрийн нөхцөлд Увс, Ховд, Дорнод аймаг, Завханы Тосонцэнгэлд цагдаагийн алба хаагчдад өмсүүлж туршжээ. Ингээд манай орны нөхцөлд таарч байна гэж үзээд бөөнөөр нь үйлдвэрлүүлсэн аж.
Харин өвлийн хувцас нь чийг их татаж байсан тул материалыг нь өөрчлүүлэхээр ярилцаж буй гэнэ. Иргэдээс янз бүрийн хоч аваад буй малгайны хувьд цагдаагийнхан өөрсдөө санал гаргажээ. Тэд “хатуулгатай малгай хэлбэрээ алдах, ажил үүргээ биелүүлж байхад буюу гэмт хэрэгтэн барих зэрэгт толгой дээр тогтохгүй, хүндрэлтэй байдаг.
Тиймээс өмсөхгүй үедээ эвхэж болох, салхинд тогтвортой байхаар бодолцож хийвэл зүгээр байна” гэсэн учир одоогийн бүчтэй малгайг өдөр тутамд өмсөхөөр бодож үйлдвэрлэжээ.
Ингэхдээ хүйтэнд чих нь даарахгүй, зуны улиралд наранд сүүдэртэй гэх зэргээр цагдаа нарын биед нь тухтай байх хэлбэрүүдийг сонгосон аж.
Үнэндээ цагдаагийн алба хаагчдад өмсч буй хувцас нь биед тухтай, тухгүй ч өдөр бүхэн дүрэмт хувцсаа өмсөөд ажил үүргээ гүйцэтгэдэг. Гэтэл бид өдөрт хэдэн удаа хувцсаа сольдог билээ. Ингээд бодохоор биед нь эвтэйхэн, чөлөөтэй хувцас сонгосон цагдаа нарыг буруутгах эрх бидэнд байхгүй.
Б.Төрбат
Эх сурвалж:
Сэтгэгдэл0
цагдаагийн хувцасаар бизнэс хийх хүсэлтэй этгээдүүд иим зүйл хийж байга юм зоосны нүхэр харж хүнд ажил үүрэг гүйцэтгэж байдаг цагдаагаар тоглож дуусагүй байх.
hujaa barilgachid shig yuma
Malgai l gehees bish dajgui l haragdaj bna.
Ардын цагдаа шахаасны хувцасны гол юм уу, Хөөрхий цагдаа нарын хувцас үнэндээ дэндүү муухай хүн ичмээр юм байна лээ ш дээ Арай ч дээ, Үйлдвэрийн ажилчид грушикууд ч ийм юм голоод өмсөхгүй, Саяхан өмсөж байсан саарал хувцас нь дажгүй ш дээ Эсэргүүцэж ажил хаямаар юм