Өнгөрсөн долоо хоногийн дуулиант үйл явдлаар ЦЕГ-ын дарга Б.Билэгтийг ажлаас нь чөлөөлсөнтэй холбогдуулан цагдаагийн зарим нэр бүхий дарга нарыг түр үүрэг гүйцэтгэгч ЦЕГ-ын тэргүүн дэд дарга С.Баатаржав хууль бусаар халлаа гэх яриа нийгэмд шуугиан тарьсан билээ.
Тэгвэл өчигдөр энэ талаар ЦЕГ-ын хэвлэл мэдээллийн төвийн дарга, цагдаагийн хурандаа Б.Баатархүү дараах мэдээллийг өгсөн юм. “Өнгөрсөн пүрэв гарагийн Засгийн газрын 44 дүгээр хуралдаанаар Цагдаагийн ерөнхий газрын дарга, бригадын генерал Б.Билэгтийг үүрэгт ажлаас нь чөлөөлж, тус газрын тэргүүн дэд дарга, тэргүүн дэд комиссар С.Баатаржавыг түр орлон гүйцэтгэгчээр томилсон.
Дээрх шийдвэртэй холбогдуулан зарим хэвлэл мэдээллийн хэрэгслүүдээр “Б.Билэгтийг ээлжийн амралттай байхад нь “түгжилдсэн” “Л.Гансүх мэдүүлэг өгч эхэлсэнтэй холбоотой юу”, “Мөрдөн байцаах газрын дарга, цагдаагийн хурандаа Ц.Батсүхийг үүрэгт ажлаас нь чөлөөлжээ”, “ЦЕГ-ын даргын марафон эхэлжээ”, “Б.Билэгтийн оронд очих магадлалтай гурван хүний нэр яригдаж эхэллээ”, “Б.Батзаяагийн араас Б.Билэгтийг чөлөөлснөөр “Алтангадас” “МоАХ”-ны хоорондын тэмцэл дайн боллоо” зэрэг гарчигтайгаар баттай бус эх сурвалжийн мэдээллийг хуулбарлан нийгэмд түгээж иргэдэд улс төрийн өнгө, аяс оруулсан ташаа ойлголт, мэдээлэл өгч байна.
Цагдаагийн ерөнхий газрын даргыг үүрэгт ажлаас нь чөлөөлснөөр төв, орон нутгийн цагдаагийн аль ч байгууллагад ямар нэг томилгоо, боловсон хүчний өөрчлөлт хийгдээгүй. Цагдаагийн байгууллага нь гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах үндсэн чиг үүрэг бүхий хууль сахиулах байгууллага бөгөөд үйл ажиллагаа нь хэвийн явагдаж байна” гэлээ.
Эх сурвалж:
Сэтгэгдэл0
юун хүчний болисон байх шүү