Тус ангийн салаан захирагч, дэслэгч Баатарсүрэнгээр ахлуулсан салааг ажиллуулсан байх юм
Монгол Улсын Зэвсэгт хүчний зарим ангийн захирагч, штабын дарга хоёр өөр хоорондоо үгсэн хуйвалдаж, дээд газартаа мэдэгдэлгүйгээр хугацаат цэргийн алба хаагчдаар боолын хөдөлмөр эрхлүүлж боломжийн хөрөнгө босгоод авдаг нь нууц биш болоод байгаа билээ.
Тэр байтугай, бусдыг тансаг харштай болгохын төлөө захирагчийнхаа өгсөн үүргийг эх орныхоо өмнө өргөсөн тангараг хэмээн үзэн хөдөлмөр хамгааллын нөхцөл хангаагүй барилга дээр ажиллаж байсан бор цэрэг амь насаа алдаж байсан тохиолдлыг Монголын нийгэм мартаагүй байгаа.
Бидэнд энэ удаад Сонсголонд байрлах Зэвсэгт хүчний 013 дугаар ангийн хугацаат цэргийн дөрвөн алба хаагч хаа байгаа нь мэдэгдэхгүй сураггүй байгаа талаар мэдээлэл ирсэн юм. Эх сурвалж “Тэд ангиасаа чөлөө зөвшөөрөлгүйгээр оргон зайлаагүй, ангийнхаа захирагчийн тушаалаар хаа нэгтээ, хэн нэгний орд харш дээр ажиллаж байгаа нь тодорхой” гэв.
Манай сурвалжлах баг дээрх мэдээллийг нягтлахын тулд юун түрүүнд ЗХЖШ-ын даргын нэгдүгээр орлогч, хошууч генерал Б.Баярмагнайтай холбогдохыг оролдсон боловч тэрбээр Дорнод аймагт зохион байгуулагдаж буй Орос- Монголын хамтарсан хээрийн сургуулийг Монголын талаас удирдахаар яваад эзгүй байлаа.
Тиймээс ЗХ-ний 013 дугаар ангийг Жанжин штабт харьяалдаг ЗХЖШ-ын Холбооны хэлтсийн дарга, хурандаа н.Энхбаатарын 9918..... дугаар руу болон албан өрөөнийх нь 26... дугаар руу нэлээд хэдэн удаа залгасан боловч тусыг эс олов.
Тиймээс салбарынх нь эрх бүхий албан тушаалтнаас лавлах нь дээр гэж үзэн Батлан хамгаалах яамны Төрийн нарийн бичгийн дарга, хошууч генерал З.Болдбаатар руу утас цохиж, сураггүй гэгдэх хугацаат цэргийн дөрвөн албан хаагч хаана, хэнийд боолчлогдож байгаа талаар асуухад тэрбээр “Би энэ тухай дуулаагүй юм байна.
Гэхдээ би холбогдох албан тушаалтнуудтай нь холбогдож, асуудлыг тодруулаад эргээд хариу өгөе хэмээн утсаа тасалсан ч генерал хэлсэндээ хүрч цагийн дараа бидэнтэй эргэн холбогдсон.
Төрийн нарийн бичгийн дарга “Би ангийн захирагчтай нь холбогдлоо. Анги бүрэн бүрэлдэхүүнээрээ өдөр тутмынхаа үүргийг гүйцэтгэж байна. Чөлөөгөөр болон тушаалаар нэг ч хугацаат цэргийн албан хаагч ангийн хашаанаас гараагүй хэмээн хариуцлагатайгаар мэдэгдэж байна.
Та бүхэн ямар эх сурвалжийн мэдээллээр дөрвөн цэрэг алга болсон гэж яриад байгааг гайхаж байна” гэсэн юм.
Батлан хамгаалах яамны Төрийн нарийн бичгийн дарга нь хүртэл сураггүй алга болсон гэгдэж буй дөрвөн цэрэгтэй холбоотой асуудлыг тодруулах гэсэн боловч хэзээнээс амиа хоохойлж, бүхнийг аргалж сурсан ангийн захирагч, штабын дарга нь энэ удаа ч эрхэм хошууч генералыг төвөггүйхэн хуурч дөнгөлөө.
Тэгэхээр бүтэн 10 гаруй хоног бусдад боолчлогдож, хугацаат цэргийн албаны дүрэмт хувцсыг барилгачны шавартай хувцсаар солин тогооч авгайн хоолоо хэзээ өгөхийг хүлээн халуун наранд хүрлийн барилга дээр ажиллаж байгаа дөрвөн бор цэргийг сэтгүүлчид төдийгүй яамны хэмжээнд эрж хайн сураг тавиад ирэхээр тус ангийн удирдлагууд хэрэг бишдэх нь гээд түргэн авч тэднийг тэр дор нь анги руугаа татсан байхыг үгүйсгэх аргагүй юм.
Баттай эх сурвалжийн мэдээлж буйгаар “Зэвсэгт хүчний 013 дугаар ангийн захирагч хурандаа н.Дэлгэрцог дээр дурдсан хугацаат цэргийн дөрвөн албан хаагч ч бус бүхэл бүтэн салаа цэргээр боолын хөдөлмөр эрхлүүлж, тэдний олж ирсэн мөнгийг халаасалсан ч байж мэднэ.
Энэ тухай тодруулах аваас эрхэм хурандаа, штабынхаа даргатай нийлэн Нүхтийн аманд шинээр сүндэрлэн босч буй зөвхөн баячуудад зориулагдсан Хуримын ордны барилга дээр салаан захирагч, дэслэгч Баатарсүрэнгээр ахлуулсан салааг ажиллуулсан байх юм.
Ангийн захирагч шинэ цэрэг шигээ шинэ дэслэгчид үүрэг өгөн “Нүхтийн ам руу алхаад марш” хэмээн командлахад тэр “амьтан” бусдын амь насыг толгойгоороо хариуцаж байгаагаа ухаарсан болов уу.
Нөгөөтэйгүүр, сүүлийн үед барилгын бизнес эрхлэгчид хугацаат цэргийн албан хаагч, хятад хоёрт нугасгүй болоод байгаа. Хятадад нь мэдээж хамгийн хямд өртөг бүхий мантуу байцаа хоёрыг амсуулаад байхад болоод явчихна.
Хугацаат цэргийн албан хаагчдын тухайд тэд ямар ч тохиолдолд хүнстэйгээ явдаг учраас тэднийг хооллох зовлонг тэд амсахгүй. Бас барилгачид шиг өдрийн 50 мянга төгрөг гэж үнэрхэхгүй зөөлөн хоол.
Үнэн хэрэгтээ эл үйлдэл Батлан хамгаалах салбарын хэмжээнд ганцхан энэ анги дээр анх удаа тохиолдов уу гэвэл үгүй юм. Төв аймгийн Сэргэлэн сум дахь ЗХ-ний дугаар ангийн захирагч, Бригадын генерал Онцгойбаяр мөн л цэргээ “худалдаж” халаасаа түнтийлгээд амжсан төдийгүй өдгөө ЗХЖШ-ын дарга болно гээд саарал ордноор сэм гүйж яваа.
Магадгүй түүнд найдвар бий учраас тийн жороолсон байж таарна. Үгүй байтлаа согтуугаар ангийн бие бүрэлдэхүүнийг талбайд нэгтчихээд “ЗХЖШ-ын ирээдүйн дарга өмнө чинь зогсч байна” хэмээн томорч байхав.
Салбар тань ийм л байна даа, сайд минь. Эрхэм дэслэгч генералын тухайд байдлыг мэдээд байгаа мөртөө захирч чадахгүй толгой дээрээ гаргасаар тэтгэвэртээ суух нь бололтой.
Нөгөөтэйгүүр, ангийн захирагч нараа та бүхэнд хандаж захихад ард түмэн хүүгээ баячуудыг тансаг харштай болгуулахын төлөө цэргийн албанд илгээгээгүй юм шүү. Тэд эх орноо батлан хамгаалах ариун үйлсэд зүтгэхийн төлөө мордсон эрс.
Үргэлжлэл бий...
Р.Саруул
Эх сурвалж:
Сэтгэгдэл0
Төв аймгийн Сэргэлэн сум дахь ЗХ-ний 016 дугаар ангийн захирагч, Бригадын генерал Онцгойбаяр мөн л цэргээ “худалдаж” халаасаа түнтийлгээд амжсан нь үнэн.Түүний хариуцсан ангид энэ 2014 оны 5 дугаар сард алба хаахаар ирсэн шинэ цэрэг байлдагч Дэнсмаагийн Өнөболд нь цэрэгт ирээд удалгүй тувт зодуулсаар байгаад гэмтлийн урхагт гэмтлийн хам шинж гэсэн оноштойгоор эмнэлэгт хэвтэж эмчлүүлж байна.түүний эцэг эх нь ЗХЖШ-т гомдол гаргасан бөгөөд гомдлын дагуу ЗХЖШ-аас шалгалт очиход ангийн захирагч Онцгойбаяр шалгуулах нь бүү хэл шалгагч нарыг та нарт шалгуулахгүй би удахгүй ЗХЖШ-т дарга болж очоод та нар муусайн юмнуудыг зайлуулна гэж томорсон байна. Тэрээр өдгөө ЗХЖШ-ын дарга болно гээд саарал ордноор сэм гүйж яваа нь үнэн.ЗХЖШ-ын дарга дэслэгч генерал Бямбажав энэ бардам сэхүүн генерал Онцгойбяараа зайлуулж арга хэмжээ авахын оронд өөрийнхөө оронд томилуулахаар Ерөнхийлөгч дээр оросн гэнэ.
Та энэ Онцгойбаяр генералдаа арга хэмжээ авч албан тушаалаас нь буулгаач ээ.Яагаад олон цэрэг бусдад зодуулан эрүүл мэндээрээ хохирсон бас нэг ахлагч осолдож амь насаа алдчихаад байхад дуугүй сууна вэ?Эсвэл та хоёр түрийвч нэгтэй болоод та юм хэлж чадахгүй байгаа юм уу.Таныг Онцгойбаяр өөрийг нь орондоо ЗХЖШ-ын даргаар томилохгүй бол булайг чинь дэлгэнэ гэж дарамтлаад байна уу аль эсвэл.Магадгүй шүү.
Зун намрын цагт анги салбартаа дэмий байж байснаас тариа ногооны ажилд явсан нь сайхан шүү дээ.Бүтээн байгуулалтад оролцож хөлс хүчээ гаргах нь юу нь болохгүй гэж.Юм хийж байгаа хүмүүсийг муулах хэрнээ өөрсдөө юу ч хийхгүй юм, манайхан.