ЭМЯ-ны Хүний эмийн зөвлөлийн дэргэдэх Биобэлдмэл, оношлуурын салбар зөвлөлийн ээлжит хурал болж, хэд хэдэн асуудлыг хэлэлцэж, шийдвэрлэлээ. Хурлыг салбар зөвлөлийн дарга БХЗГ-ын Эмнэлгийн тусламжийн хэлтсийн дарга Я.Амаржаргал удирдав.

Тус хурлаар дараах асуудлуудыг хэлэлцэж шийдвэр гаргалаа. Үүнд:

 1. АШУҮИС-ийн эрдэмтэд болон эрдэм шинжилгээний ажилтнуудын хамтран боловсруулсан “MON-HP уреазийн түргэвчилсэн оношлуурын ерөнхий шаардлага” стандартын төсөлд дүгнэлт гаргасан тус зөвлөлийн гишүүн Н.Мөнхтүвшин, Т.Алимаа нарын дүгнэлтийг хэлэлцэж, MON-HP уреазийн түргэвчилсэн оношлуур нь дурангийн шинжилгээнд суурилсан эдийн шинжилгээ, бактериологийн өсгөвөрлөх арга, молекул биологийн шинжилгээний аргуудтай харьцуулахад уреазийн сорилын мэдрэг ба өвөрмөц чанар 98-99% буюу сайн, өртөг зардлын хувьд хямд, ажилбарын хувьд хялбар, хариу хурдан гардаг зэрэг хэрэглээний ач холбогдолтой талаар мэргэжилтнүүдийн танилцуулга, бүрдүүлсэн материал, үйлдвэрлэсэн оношлууртай зөвлөлийн гишүүд танилцаж шийдвэр гаргалаа.

 Ходоодны үрэвсэлт өвчин, хорт хавдрын гол үүсгэгч шалтгаан болж байгаа хеликобактерийг оношлох, эмчлэх арга улам бүр нарийсч, цусны ийлдсэнд үзэж оношилдог болсон. ХБНГУ зэрэг өндөр хөгжилтэй орнуудад хеликобактерийн халдвартай хүн, ходоодны хорт хавдрын тохиолдол бараг байхгүй болсон байна.

 Манай орны хувьд халдварын тархалт өндөр, хорт хавдрын өвчлөлийн тэргүүлэх шалтгаан нь ходоодны хавдар байсаар байгаа энэ нөхцөлд үндэсний мэргэжилтнүүдийн анх удаа боловсруулсан “MON-HP уреазийн түргэвчилсэн оношлуур”-ыг ходоод дурандуулж байгаа, ходоодны мэс засал эмчилгээ хийлгэж байгаа өвчтөнүүдээс эдийн шинжилгээ авч тус бэлдмэлээр оношилж байх боломжтой, мөн үндэсний хэмжээнд анх удаа гаргасан оношлуур учир стандартын төслийг дэмжиж, эрх бүхий байгууллагаар батлуулах шийдвэрийг гаргалаа.

 2. АНУ болон Нидерланд улсын Merck Sharp&Dome B.V үйлдвэрийн папилома вирусын эсрэг “Гардасил” вакциныг улсын бүртгэлд бүртгүүлэх саналыг Монгол эм импекс концернээс ирүүлсэн саналыг хэлэлцэв. Манай улсын хувьд “Дархлаажуулалтын тухай хууль”-ийн дагуу товлолт вакцины асуудлыг нилээд тодорхой зохицуулдаг боловч товлолын бус вакцины бүртгэл, ханган нийлүүлэлт, дархлаажуулалтын асуудал тодорхой бус явсаар ирснийг зөвлөлийн гишүүд онцлоод цаашид товлолын бус вакцины ханган нийлүүлэлт, хэрэгцээг тодорхойлох, хууль журамд нэмэлт өөрчлөлт оруулах, бодлогын баримт бичгүүдийг тодорхой болгосны дараа вакциныг ханган нийлүүлэх байгууллагуудад бүртгэлийн асуудлыг оруулж ирэхийг зөвшөөрөх эсэх талаар тодорхой болгохоор тус зөвлөлөөс шийдвэрлэв.

 3. 2011 онд батлагдсан “Эм, эмнэлгийн хэрэгслийн тухай хууль”-ийн шинэчилсэн найруулгаар батлагдсан хуульд манай эмнэлэг, эрүүл мэндийн байгууллагуудын оношилгоонд хэрэглэгдэж байгаа оношлуурыг бүртгэхээр болсон нь тусламж, үйлчилгээний чанарыг хянахад бас нэг том дэвшил болсон юм. Учир нь лабораторийн оношилгоо, шинжилгээг баталгаатай, улсын бүртгэлд бүртгэгдсэн оношлуураар хийдэг болсон нь үйлчлүүлэгчийн оношийг зөв баталгаатай гаргахад чухал ач холбогдолтой болсон.

 Хуулийн заалтын дагуу манай улсын оношлуур ханган нийлүүлдэг компаниуд оруулж ирж байгаа оношлуураа улсын бүртгэлд бүртгүүлэхээр саналаа ЭМЯ-д ирүүлдэг болсон. Тус зөвлөл нь шинээр бүртгүүлэхээр санал ирүүлсэн Монолаб, Сетунари, Баянголмед компанийн ХБНГУ-ын Human GmbH үйлвэрийн клиник, биохимийн 10 нэрийн оношлуур, Roche Diagnostics GmbH үйлдвэрийн 10 нэрийн оношлуур, Австри улсын Dialab GmbH үйлдвэрийн 13 нэрийн оношлуурыг бүртгүүлэх асуудлыг хэлэлцэж, оношзүйн дүгнэлт гаргах шинжээчдийг томилсон.

 4. Шинээр томилогдсон оношлуурын бүртгэлийн үйл ажиллагаанд оношзүйн дүгнэлт гаргах шинжээчдийн сургалтыг зохион байгуулахаар шийдвэрлэлээ.