Өчигдөр 15:00 цагаас зарлагдсан УИХ-ын Төсвийн байнгын хорооны хуралдаан 15:40 цаг болж байхад эхлээгүй л байсан. Танхимд Ц.Даваасүрэн дарга хоёр гуравхан гишүүнтэйгээ элдвийг ярьж, хаалга руу хараачилж харагдсан. Харин үүдэнд Сангийн яамны төлөөллүүд, Засгийн газрын зарим агентлагийн дарга нар сэтгэл нь түгшсэн бололтой намуухан дуугаар ярилцаж зогссон.
Энэ үеэр Иргэний харьяалал, шилжилт хөдөлгөөний Ерөнхий газар (ИХШХЕГ)-ын дарга Б.Пүрэвдоржтой уулзаж тус агентлагийн төсөв санхүү, ирэх жилийн төлөв байдлын талаар ярилцсан юм.
-Манай зарим иргэд одоо ч танай агентлагийн нэрийг хуучнаар нь Гадаадын иргэн, харьяатын асуудал эрхлэх газар гэж андуураад байдаг. Албан ёсоор ИХШХЕГ хэзээ байгуулагдсан билээ?
-Тэгж андуурах тохиолдол гардаг юм билээ. Энэ оны дөрөвдүгээр сарын 1-нээс Хил хамгаалах ерөнхий газрын Хилийн шалган нэвтрүүлэх албаны зарим чиг үүрэг хуучнаар Гадаадын иргэн, харьяатын асуудал эрхлэх газарт шилжиж ирснээр ИХШХЕГ-ыг байгуулсан юм.
Хуучин Гадаадын иргэн, харьяатын алба 200 гаруй албан хаагчтай ажилладаг байсан бол шинэ чиг үүргийн дагуу Хилийн цэргээс 400 албан хаагч нэмэгдэн ирж өнөөдөр манай агентлаг 600 гаруй албан хаагчтай албан үүргээ гүйцэтгэж байна.
-Төсвийн байнгын хорооны хурлаар агентлагуудын ирэх оны төсөв, санхүүгийн асуудлыг хэлэлцэх байсан ч гишүүдийн ирц бүрдэхгүй байна. Ер нь танай байгууллагын төсөв санхүүгийн байдал ямархуу байгаа вэ?
-Манай агентлагийн хувьд УИХ-ын Төсвийн байнгын хороон дээр урсгал зардлын асуудлаар л нэлээн яригдаж байгаа. Гэхдээ манай агентлагийн хувьд сүүлийн 2012,2013,2014 онуудад улсын төсвийн хөрөнгө оруулалтгүй ажилласан.
Монгол Улсын хил, боомтын нүүр царайг илэрхийлэлцдэг бүхэл бүтэн агентлаг гурван жилийн турш аливаа нэгэн төсөв, хөрөнгө оруулалтгүй ажлаа хэвийн хэмжээнд аваад явж болдгийг манай байгууллага нотлон харуулаад явж байна.
Ирэх 2015 онд ч манай байгууллага төсөв, хөрөнгө оруулалтгүй ажиллана. Өөрөөр хэлбэл шинэчлэлийн Засгийн газраас батласан журмын дагуу л ажиллаад явж байгаа. Бидний зүгээс Сэлэнгэ аймгийн албан конторын барилгыг л санхүүжүүлээч ээ гэдэг санал тавьсан.
Харин энэ удаа Засгийн газраас дарга нар ажлаа явуулах зориулалттай конторын барилгад хөрөнгө оруулахгүйгээр шийдсэн. Бид ч энэ шийдвэрийг нь дэмжиж байгаа. Одоо бидний хамгийн гол хийх ёстой ажил бол Замын-Үүдийн боомт дээр хурууны хээгээр хил нэвтрүүлдэг тоног төхөөрөмж суурилуулах ажил байгаа юм.
Өнөөдөр Замын-Үүдийн боомтоор өдөрт дунджаар 8000 зорчигч нааш цааш нэвтэрдэг, ид үедээ энэ тоо нь 11-12 мянга хүрдэг манай улсын хамгийн том боомт. Тэндхийн нэг шалгагч өдөртөө дор хаяж 500 хүнийг шалган нэвтрүүлдэг байх жишээтэй. Энэ бол маш их ачаалалтай ажиллаж байна гэсэн үг.
Энэ асуудлыг орчин үеийн техникийн боломжоор даруйхан шийдэх л ёстой. Бид саяхан “Чингис хаан” Олон улсын нисэх буудлыг хурууны хээ мэдрэгчээр тоноглосон. Хуучин нэг шалгагч хоёр минут орчимд нэг зорчигчийг шалган нэвтрүүлдэг байсан бол шинэ төхөөрөмж тавьснаар дээрх хугацаанд зургаан зорчигчийг нэвтрүүлэх хүчин чадалтай болж байна. Шинэ төхөөрөмж тавьснаар Замын-Үүдийн шалган нэвтрүүлэхийн ачаалал гурав дахин буурах юм.
-Улсын төсвөөс хөрөнгө оруулалтгүй Иргэний харьяалал, шилжилт хөдөлгөөний ерөнхий газар хэдэн тэрбум төгрөгийн урсгал зардалтай ажиллах бол?
-Манай байгууллага энэ онд долоо орчим тэрбум төгрөгийн урсгал зардалтай ажиллаж байгаа. Энэ мөнгөний 75 орчим хувь нь зөвхөн цалингийн фонд, үлдсэн 25 хувь нь төрийн албан хаагчдын хэвийн үйл ажиллагаа явуулахад шаардагдах бусад зардал байгаа.
Ер нь бусад агентлагуудыг харж байхад нийт урсгал зардлын 50 хувь нь цалингийн фонд, үлдсэн 50 хувь нь бусад зардалд хамаардаг юм билээ. Түүнээс гадна манай агентлаг ажил үүргийн онцлогоосоо шалтгаалан нэг албан хаагчид гурван ээлжийн хувцас олгодог.
Эндээс харахад Иргэний харьяалал, шилжилт хөдөлгөөний ерөнхий газар тун бага зардлаар, ихээхэн үр ашигтай ажиллаж байгаа гэж дүгнэж болно.
-Нийт албан хаагчдын тоо нь 600 гаруй гэсэн үү. Ажлын ачаалал нь харилцан адилгүй байдаг байх даа?
-Яг өнөөдрийн байдлаар миний удирдаж байгаа байгууллагад 617 албан хаагч ажиллаж байна. Ажил үүргийн хуваарилалт, онцлогоосоо шалтгаалан ачаалал нь харилцан адилгүй ч ерөнхийдөө бага хүчээр их ажил амжуулж байгаа гэж ойлгож болно.
Хуучин Хилийн цэрэгт шалган нэвтрүүлэх чиг үүрэг харьяалагддаг байхад 650 орчим албан хаагчтайгаар үүрэг гүйцэтгэж байсан юм билээ. Сайдаас өгсөн чиг үүргийн дагуу үндсэндээ манай байгууллагын 400 албан хаагч дээрх үүргийг хэвийн хэмжээнд гүйцэтгээд явж байна.
-Танай байгууллагын албан хаагчид бүгд тангараг өргөсөн төрийн албан хаагчид уу?
-Манай албан хаагчдын 90 орчим хувь нь төрийн захиргааны албан хаагч, 10 хувь нь төрийн үйлчилгээний албан хаагч юм. УИХ-ын энэ намрын чуулганаар Хууль сахиулагчдын эрхзүйн байдлын тухай хууль хэлэлцэгдэж байгаа. Энэ хуулиар бол манай байгуулага нь төрийн тусгай албан хаагчид болно.
Өөрөөр хэлбэл тодорхой хэмжээний цол, тэмдэг хэрэглэх эрхтэй болох юм. Ингэснээр ихэнх нь улсын дархан хил дээр ажилладаг Иргэний харьяалал, шилжилт хөдөлгөөний ерөнхий газрын шижигнэсэн залуучууд маань төрийн тусгай албан хаагчид болж, цол хэргэм, хилийн нэмэгдэл хүртэх боломжтой болно.
Дээрээс нь тэтгэвэрт гарахад ч цэргийн буюу хууль сахиулагчийн тэтгэвэр, тэтгэмж тогтоолгодог болж амьдралын баталгаа нь ч сайжрах болно. Тэгээд ч төрийн тусгай албан хаагчид болсноор урам зориг нь сэргэж, ирээдүйтэй итгэлтэйгээр Монгол Улсын дархан хил дээр алба хаах нь ойлгомжтой.
-Иргэний харьяалал, шилжилт хөдөлгөөний ерөнхий газар 2014 онд албан хаагчдынхаа алба хаах болон амьдрах орчныг сайжруулахын тулд ямар дорвитой ажил хийсэн бэ?
-Уг нь энэ онд багтаад 240 айлын орон сууц ашиглалтад оруулчих санаатай нэлээн зүтгэсэн ч амжсангүй. Ойролцоогоор 40-60 метр квадрат хоёр өрөөтэй орон сууцанд албан хаагчдаа оруулах юм.
Бид энэ орон сууцныхаа ажилд улсын төсвөөс мөн л нэг ч төгрөг аваагүй. Манай албан хаагчид 100 хувь мөнгөө төлөөд орон сууцандаа орцгооно. Бидний зүгээс метр квадратыг нь хамгийн хямд буюу сая 200 мянган төгрөгт багтааж байгаа.
Манай байгууллагын албан хаагчдын ихэнх нь шижигнэсэн залуучууд байдаг учир тэр хүмүүсээ илүү тогтвор суурьшилтай ажиллуулах, нийгмийн асуудлыг нь аль болох шийдэхийн төлөө чадлаараа л ажиллаж байна.
Чадлаараа шахсан ч эхний 120 айлын орон сууцыг ирэх жилийн эх үрсийн баяраар ашиглалтад оруулах болоод байна. Үлдсэн 120 сууцыг 2015 оны өдийд ашиглалтад оруулсан байна.
-Танай албан хаагчид өнөөдөр дунджаар хэдэн төгрөгийн цалин авч байна?
-Иргэний харьяалал, шилжилт хөдөлгөөний ерөнхий газрын албан хаагчид дунджаар 495 мянган төгрөгийн цалин авч байгаа. Өнөөдөр Монгол Улсын хил дээр Хилийн цэрэг, Гааль, Мэргэжлийн хяналт, манайх гээд дөрвөн байгууллага ажиллаж байгаа. Тэднээс Мэргэжлийн хяналтынхан гэхэд дунджаар 700-800 мянган төгрөгийн цалин авч байгаа.
Бид энэ оноос албан хаагчдадаа илүү цаг, урамшууллын шагнал маягаар тодорхой хэмжээний мөнгө төсөвлөж цалинг нь боломжиндоо тааруулан нэмж л байгаа. Гэхдээ өнөөдрийн бараа, үйлчилгээ, амьдралын өртгийг яаж гүйцэх вэ дээ.
Ирэх онд урсгал зардлаас хэмнэж болох зардлыг аль болох дайчлан гаргаж албан хаагчдынхаа цалингийн фондыг боломжийнхоо хэмжээнд нэмэгдүүлэх талаар 2015 оны эхнээс системтэй, дэс дараатай ажиллахаар төлөвлөгөө боловсруулаад ажиллаж байна.
Ямар ч гэсэн Хууль сахиулагчдын эрхзүйн байдлын тухай хууль батлагдсанаар Иргэний харьяалал, шилжилт хөдөлгөөний ерөнхий газарт ажиллаж байгаа нийт албан хаагчид маань ирээдүйтэй итгэлтэй болж, манай байгууллагад ажиллах сонирхолтой залуучуудын тоо ч эрс нэмэгдэнэ гэж бодож байна.
Д.Энхтүвшин
Эх сурвалж:
Сэтгэгдэл0
Manai company Hyatadaas baraa tavaar, tonog tohoroomj hudaldan avahad uildverlegchidtei holvoo togtoohod zuuchlah, Hyatadad juulchlah bolon busad shaardlagaar yavahad orchuulgiin uilchilgee uzuuleh, Hyatadiin buh hotoos Mongol ruu buh torliin achaag tomor zam, auto zam, dalain teevreer hamgiin hyamd uneer, hurdan shuurhai, naidvartai teeverlene. Jinchin Trans olon ulsiin teever zuuchiin Co., Ltd Hariltsah utas : 98304871 Beijing utas: 86(010)84391096, Email: 2698059723@qq.com
Manai company Hyatadaas baraa tavaar, tonog tohoroomj hudaldan avahad uildverlegchidtei holvoo togtoohod zuuchlah, Hyatadad juulchlah bolon busad shaardlagaar yavahad orchuulgiin uilchilgee uzuuleh, Hyatadiin buh hotoos Mongol ruu buh torliin achaag tomor zam, auto zam, dalain teevreer hamgiin hyamd uneer, hurdan shuurhai, naidvartai teeverlene. Jinchin Trans olon ulsiin teever zuuchiin Co., Ltd Hariltsah utas : 98304871 Beijing utas: 86(010)84391096, Email: 2698059723@qq.com
Manai company Hyatadaas baraa tavaar, tonog tohoroomj hudaldan avahad uildverlegchidtei holvoo togtoohod zuuchlah, Hyatadad juulchlah bolon busad shaardlagaar yavahad orchuulgiin uilchilgee uzuuleh, Hyatadiin buh hotoos Mongol ruu buh torliin achaag tomor zam, auto zam, dalain teevreer hamgiin hyamd uneer, hurdan shuurhai, naidvartai teeverlene. Jinchin Trans olon ulsiin teever zuuchiin Co., Ltd Hariltsah utas : 98304871 Beijing utas: 86(010)84391096, Email: 2698059723@qq.com