“Эрүүл элэг” хөтөлбөрийн хүрээнд энэ сарын 22-ноос эхлэн “Элгээ хайрлая” аяныг улс орон даяар зарлалаа.
Монгол Улсын ЭМСЯ, Монголын элэгний эмч нарын нийгэмлэг, "Оном" сангаас зохион байгуулж буй аяны зорилго хүүхэд залуучууд, олон нийтэд вируст хепатит өвчний хор уршиг, үр дагаврыг таниулан мэдүүлж, урьдчилан сэргийлж, өөрийгөө болон гэр бүл, найз нөхөд, хамт олноо хамгаалахад туслах, мэдлэг олгоход чиглэгдэж байгаа юм.
Энэхүү аяны хүрээнд зохион бичлэг, гар зургийн уралдаан, зурагт хуудас, постер плакатны загварын уралдаан, нийтлэл, богино өгүүллэгийн уралдаан, богино хэмжээний кино уран сайхны буюу анимейшн төрлөөр уралдаан тус тус зарлаад байна. Мөн эрдэм шинжилгээний хурлыг тусад нь зарлахаар болжээ. Уг аяны шагналын сан 10 сая төгрөг бөгөөд уралдаанд ирүүлсэн бүх бүтээл нь “Эрүүл элэг” хөтөлбөрийн албан ёсны материал болох юм. Уралдаанд шалгарсан бүтээлүүд Дэлхийн хепатитын өдөр, Дэлхийн элэгний өвчлөлтэй тэмцэх байгууллагуудаар Монгол Улсаа төлөөлөн сурталчилна.
Өнөөдөр Монгол Улсад хепатитын вирусын халдвартай 400 мянган хүн байна. Манай улс 100 мянган хүн тутам дахь элэгний хорт хавдрын нас баралтаар дэлхийд тэргүүлж байгаа төдийгүй энэ үзүүлэл нь дэлхийн дунджаас даруй 8 дахин их байгаа юм. Хамгийн их сэтгэл түгшээж буй нь ДЭМБ болон Монгол Улсын мэргэжлийн байгууллагуудын дүгнэж байгаагаар элэгний хорт хавдар, хатуурлын нас баралт цаашид улам нэмэгдэх, нас баралт залуужих төлөвтэй байна. Иймээс ч “Эрүүл элэг” хөтөлбөрийг хэрэгжүүлж эхлээд байгаа бөгөөд элэгний С вирусыг эмчлэх эмчилгээний удирдамжийг боловсруулжээ.
“Эрүүл элэг” хөтөлбөрийн “Эрт илрүүлэлтийн дэд хөтөлбөр”-ийг ХУД, БГД-т хэрэгжүүлж байгаа юм. Уг хөтөлбөрийг цаашид улс орон даяар зохион байгуулахаар ажиллаж байна.
Д.Өлзий
Эх сурвалж: "Монцамэ" агентлаг
Сэтгэгдэл0
Хамт олон хэмээх зохион байгуулалттай бүлгээрээ архи ууж нэг нэгнийгээ архиар шахаж архинд донтуулах гол шалтгаан болсон нийтээр тэмдэглэх баяр ёслол, найр наадмаа цөөлөөгүй бас гудамж талбайд замд олон удаагийн хуршсан тосонд хайрсан хуушуур гэдэг хортой хоолыг хориглоогүй цагт элэгний вирус мөн устаж харагдана даа.Харж л байгаарай.Дээр нь зун намрын цагт хөдөө хээр ямаа, тарваганы боодог, хонины хорхог хийж идээд байвал элэг эрүүл байхгүй байх аа.Өөр ч юу хэлэхэв дээ.
Элэгний B, C вирустэй хүн байна. Саяхан бүх төрлийн шинжилгээ өгсөн. Шинжилгээнүүд нь маш их үнэтэй юм. Харвани эмийг уувал үр дүнгүй гэсэн, уух хугацаа нь хэтэрсэн байна гэсэн. Харвоны эмийг уух үе гэж байх уу. Элэгний төрөл бүрийн вирусуудыг эрт илрүүлэх ажил орон даяар хийгдэж эхэлж байгаа нь маш сайн л байна. Гэвч нэгэнт B, C гээд байгаа вирусүүдээр өвчилчихсөн хүмүүсээ яах вэ. Манай улсын ард түмэн үнэхээр ядуу байна. Тэр харвони эмийг нь эмч чадахгүй байсаар байгаад өвчин нь хүндэрсэн хүмүүс их байна. Мөнгөгүй бол энэ хүмүүс үхэхээс өөр арга алга байна. Монголдоо элэг шилжүүлэн суулгадаг л гэх юм тэр нь маш үнэтэй 85-98 сая төгрөг. Сарын 400 мянган төгрөг ч хүрэхгүй орлоготой өрх тэр хагалгааг яаж хийлгэх вэ. Элэгний 75 хувь хатуурсан , хамраас цус байнга гардаг, цус тогтоох тариа хийлгэж тогтоодог, 2 хөл өвдөгнөөс доош битүү хавдар гишгэхээр бамбалзаад явж болдоггүй. Одоо яах вэ тус болооч