sonin.mn
УИХ-ын чуулганы өнөөдрийн нэгдсэн хуралдаанаар “Уурхай дахь аюулгүй байдал, эрүүл ахуйн тухай” Олон улсын хөдөлмөрийн байгууллагын 176 дугаар конвенцид нэгдэн орох тухай хуулийн төслийг хэлэлцэв.
 
Хэлэлцүүлгийн үеэр УИХ-ын гишүүн Ж.Батзандан, "Хөдөлмөрийн нөхцлийг сайжруулах, эрүүл ахуй чиглэлд дэвшил хийхээр энэ конвенцид нэгдэх гэж байна. Энэ конвенцид нэгдсэнээр хэдэн хуульд өөрчлөлт орох вэ" гэсэн асуудлыг тодруулахад ажлын хэсгийн зүгээс, "Олон улсын энэхүү конвенцид нэгдсэнээр хууль тогтоомжид өөрчлөлт орохгүй.
 
Харин дүрэм журам гаргах шаардлага бол бий" гэсэн юм. Мөн УИХ-ын гишүүн Б.Бат-Эрдэнэ, "Олон улсын конвенцид нэгдэн орсноор Монгол Улс ямар дэмжлэг, туслалцаа авах, мөн үйлдвэрлэлийн ослоос шалтгаалсан аваарын дийлэнхэд уул уурхайн салбарт ажиллагсад өртдөг болсон талаар танилцуулгад дурдагдсан.
 
Энэ осол ил, далд уурхай болон том гэж яригддаг уурхайд гарч байна уу, эсвэл “нинжа” гэж нэрлэдэг гар аргаар ашигт малтмал олборлож байгаа хүрээнд гарч байна уу" гэдгийг асуув.
 
Уул уурхайн дэд сайд Г.Тэмүүлэн, "Уул уурхайн салбарт хөдөлмөрийн аюулгүй байдлын осол аваар, эндэгдэл, мэргэжлээс шалтгаалсан өвчлөлийн асуудал өндөр гарч байгаа.
 
Танилцуулгад 2012-2014 оны статистик тоон мэдээлэл буюу хоёр жилийн тооцоо судалгаа дурдагдсан. Уул уурхайн салбарт гарч байгаа осол аваарын шалтгааныг судалж үзэхэд нийтдээ 20 орчим хувь нь техник, тоног төхөөрөмжийн гэмтэл, эвдрэлээс хамаарсан үзүүлэлт гарч байгаа.
 
Мөн аюулгүй ажиллагааны дүрэм, журмыг мөрдөөгүй, аюулгүй ажиллагааны арга барил дутмаг, энэ чиглэлээр хангалттай суралцаагүйтэй холбоотой. Түүнчлэн бусад хүрээнд гал буюу химийн бодис, тэсрэх материалтай хамааралтай осол эндэгдэл гарч байна. Энэ конвенцид нэгдэн орсноор хөдөлмөр аюулгүй, эрүүл ахуйн эрх зүйн орчныг тодорхойлоход суурь болж өгөх юм. Мөн талуудад нэмэлт, үүрэг хариуцлагуудыг бий болгоно" гэв.
 
Ингээд “Уурхай дахь аюулгүй байдал, эрүүл ахуйн тухай” Олон улсын хөдөлмөрийн байгууллагын 176 дугаар конвенцид нэгдэн орох тухай хуулийн төслийг батлах нь зүйтэй гэсэн байнгын хорооны саналаар санал хураалт явуулахад дэмжлэг авч хууль батлагдлаа.
 
Б.Туул
Эх сурвалж: "Монцамэ" агентлаг