sonin.mn
Сэтгэгдэл (0)
Монгол Улсын Их Хурал Европын аюулгүй байдал, хамтын ажиллагааны байгууллага /ЕАБХАБ/-ын Парламентын Ассамблейн 2015 оны намрын хурлыг Монгол Улсын нийслэл Улаанбаатар хотноо энэ оны 09 дүгээр сарын 15-наас 18-ны өдрүүдэд зохион байгуулах гэж байна.
 
Үүнтэй холбогдуулан ЕАБХАБ-ын Парламентын Ассамблейн 2015 оны намрын хурлыг Монгол Улсад зохион байгуулах Үндэсний хорооны гишүүн, Улсын Их Хурлын Тамгын газрын Ерөнхий нарийн бичгийн дарга Б.Болдбаатар өнөөдөр /2015.08.19/ Монгол Улсад байнга суугаа гадаад улсын дипломат болон консулын төлөөлөгчийн газрын тэргүүнүүдтэй уулзаж, уг арга хэмжээний талаар мэдээлэл хийлээ.
 
Мэдээлэлд, 2012 онд Монгол Улс Европ, Америк, Азийн 57 улс орныг нэгтгэсэн бүс нутгийн аюулгүй байдлын хамгийн том байгууллага болох Европын аюулгүй байдал, хамтын ажиллагааны байгууллагын бүрэн эрхт гишүүн болсон. Мөн Монгол Улсын Их Хурал Европын аюулгүй байдал, хамтын ажиллагааны байгууллагын Парламентын Ассамблейн гишүүн болсон. Ингэснээр Монгол Улс, Улсын Их Хурал тус байгууллагын гишүүн орнуудтай харилцаагаа өргөжүүлэх, Монгол Улсын төдийгүй, олон улсын аюулгүй байдлын олон чухал асуудлуудаар хамтын ажиллагаагаа бэхжүүлэх таатай боломж нээгдсэн хэмээн онцлов.
 
Тэрээр Монгол Улсын Их Хурал ЕАБХАБ-ын Парламентын Ассамблейн үйл ажиллагаанд идэвхтэй оролцож, хувь нэмэр оруулах үүднээс ЕАБХАБ-ын Парламентын Ассамблейн 2015 оны намрын хурлыг Улаанбаатар хотноо зохион байгуулах болсныг мэдэгдэхийн сацуу тус хурал “ЕАБХАБ-ын бүс нутаг болон олон улсын түвшин дэх аюулгүй байдлын сорилт бэрхшээлүүдийг хэлэлцэх нь: бүс нутгийн хамтын ажиллагааг бэхжүүлэхэд парламентчдын гүйцэтгэх үүрэг” гэсэн ерөнхий сэдвийн доор явагдах ба 2015 оны намрын хурлын үеэр:
 
1. Бүс нутгийн аюулгүй байдал, терроризм, хүний наймаатай тэмцэх: ЕАБХАБ-ын үүрэг оролцоо ба бүс нутгийн хамтын ажиллагаа;
 
2. Бүс нутагт тулгараад буй эдийн засгийн сорилт бэрхшээлүүд, хүнсний аюулгүй байдал, гамшгийн эрсдэлийг бууруулах ба усны менежмент: олон улсын байгууллагуудтай хамтран ажиллах нь;
 
3. Ардчилсан институциуд, хүний эрх, хэвлэл мэдээллийн эрх чөлөө, шашин шүтэх эрх чөлөө, хүйсийн эрх тэгш байдлын хөгжил зэрэг асуудлуудыг хэлэлцэнэ.
 
ЕАБХАБ-ын Парламентын Ассамблейн 2015 оны намрын хурлыг зохион байгуулах УИХ-ын дэд дарга Р.Гончигдоржоор даргалуулсан Үндэсний хороо байгуулагдаж, холбогдох ажлууд хийгдэж байгаа гээд ЕАБХАБ-ын 57 гишүүн орон, хамтын ажиллагааны түнш 11 орнуудаас өнөөдрийн байдлаар 41 орон, 7 байгууллагын нийт 248 төлөөлөгч оролцохоор бүртгүүлээд байна. Тухайлбал, Парламентын дарга нарын хувьд өнөөдрийн байдлаар ОХУ-ын Төрийн Думын дарга С.Нарышкин, Румын Улсын Парламентын хоёр танхимын дэд дарга, Азербайжан Улсын Парламентын дэд дарга нар оролцохоор бүртгүүлсэн гэв.
 
 
Хуралд оролцох төлөөлөгчдөд зориулан МИАТ компани 2015 оны 09 дүгээр сарын 14, 09 дүгээр сарын 19-ний өдрүүдэд Франкфурт-УБ-Франкфурт чиглэлд тусгай нислэг гаргасан. 2015 оны намрын хурал “Шангри-Ла” зочид буудалд зохион байгуулагдах ба хуралд оролцох төлөөлөгчдөд Шангри-Ла зочид буудлаас гадна, Блюскай, Туушин, Улаанбаатар зэрэг зочид буудлууд санал болгож байгаа.
 
Мөн түүнчлэн, өнөөдөр УИХ-ын дарга З.Энхболдоос ЕАБХАБ-ын Парламентын Ассамблейн гишүүн болон түнш орнуудын парламентын дарга нарт намрын хуралд оролцохыг урьсан тусгайлсан урилга илгээх гэж байна. Та бүхэн урилгыг өөрийн орны парламентын дарга нарт ойрын хугацаанд хүргүүлж өгнө үү. Элчин сайд нар та бүхнийг дэмжлэг үзүүлж, төлөөлөгчдөө идэвхтэй оролцуулна гэдэгт итгэж байна гэлээ.
 
 
Мэдээлэл сонсохоор Монгол Улсад суугаа гадаад улсын дипломат болон консулын төлөөлөгчийн газрын 10 гаруй тэргүүнүүд хүрэлцэн ирэв хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.