sonin.mn
Сэтгэгдэл (0)
Уул уурхайн яам, Австрали улсын IMP групптэй хамтын ажиллагааны тухай харилцан ойлголцлын санамж бичгийг өнөөдөр байгууллаа. Тус санамж бичигт Уул уурхайн яамны төрийн наргийн бичгийн дарга Д.Артаг, IMP группийн захирал Регинальд Буш гарын үсэг зурсан юм.
 
 Санамж бичгийн хүрээнд IMP группээс уул уурхайн салбарын шинжилгээний лабораториуд болон зэс, алт, төмөр, нүүрс, жонш болон бусад эрдсийг баяжуулах, гүйцээн баяжуулах үйлдвэрийн түүхий эд, завсрын бүтээгдэхүүн, хаягдлын агуулгын мэдээллийг боловсруулах гэнэ. Улмаар технологийг удирдахад аргазүйн зөвлөгөө өгөх, шинэ техник технологи, программ хангамж нэвтрүүлэхэд хамтран ажиллахаар боллоо.
 
Уул уурхайн яамны төрийн наргийн бичгийн дарга Д.Артаг ярихдаа, “Монгол Улсын эдийн засгийн тулгуур салбар болох уул уурхайн салбарын  хөгжлийг эрчимжүүлэх зорилтын хүрээнд геологи хайгуулын шинжилгээ судалгааны лабораторийн чадавхийг дээшлүүлэхэд Австралийн компанитай хамтран ажиллахаар санамж бичиг байгууллаа.
 
Түүнчлэн эрдэс баялгийн нөөцийг орчин үеийн шинэ техник, технологи ашиглан хаягдалгүй баяжуулах, боловсруулах, үйлдвэрлэлийн үйл ажиллагааг автоматжуулах, эдийн засгийн үр өгөөжийг  дээшлүүлэхэд хоёр тал хамтран ажиллана” гэлээ.
 
IMP групп нь үйлдвэрлэлийн  технологийн процессийн болон лабораторийн автоматжуулалтын  шийдлийг нийлүүлдэг инженеринг компани юм. Одоогоор ӨАБНУ, Канад, Бразил,  Австралид  төвтэй  дэлхийн олон оронд үйл ажиллагаа явуулдаг бөгөөд төмөрлөгийн салбарт 120 гаруй томоохон  төслийг хэрэгжүүлжээ.
 
Б.Заяа
 
Гэрэл зургийг Т.Чимгээ
Эх сурвалж: "Монцамэ" агентлаг