Энэ удаагийн “Бизнес, хөгжил” буланд Монгол үнэт цаасны арилжаа эрхлэгчдийн холбооны удирдах зөвлөлийн дарга Б.Өлзийбаярыг урилаа.
-Эдийн засаг тийм ч таатай биш байна. Хүмүүсийн худалдан авах чадвар илт муу болсныг худалдаа эрхлэгчид хэлсээр байгаа. Гэтэл санхүүгийн зах зээл иж бүрнээрээ хөгжиж чадахгүй байна гэдэг шүүмжлэл бий. Ийм хэцүү үед хөрөнгийн зах зээлийг хөгжүүлэх боломж бий юу?
-Хөрөнгийн зах зээлийн ач холбогдлыг нэг үеэ бодвол хүмүүс ойлгодог болсон. Эдийн засаг хүнд байгаа энэ үед санхүүтэй холбогдох бүх ачааг зөвхөн арилжааны банкуудад үүрүүлсэн байна. Учир нь найдваргүй зээлийн хэмжээ нийт зээлийн таван хувь давчихаад байгаа. Мөн хугацаа хэтэрсэн зээл өдөр тутам нэмэгдэж байгааг банкны салбарын мэдээллээс харж болно. Тэгэхээр дан ганц банкны системд тулгуурласан санхүүгийн зах зээл нурж унахад бэлэн болчихлоо гэхэд хилсдэхгүй.
Үүнээс гарахын тулд хөрөнгийн зах зээлээ банкныхтайгаа ижил төвшинд, хамтад нь хөгжүүлэх ёстой. Тэгвэл эдийн засгийн хүндрэлээс хамгаалах бүрэн боломж бий. Яагаад гэвэл, санхүүгийн зах зээл маань банкны салбар болон хөрөнгийн зах зээл дээр тогтдог. Манай улсын хувьд хөрөнгийн зах зээл хөгжөөгүй. Тэр дундаа үнэт цаасны зах зээл хөгжөөгүй учраас улсын хэмжээнд санхүүгийн системийнхээ эрсдлийг хааж чадахгүй байгаа юм.
-Үнэт цаасны арилжааг идэвхижүүлж чадахгүй байгаа нь хөрөнгийн зах зээлийг боомжилж байна гэх юм. Магадгүй хэт төвлөрөлтэй хувьцааг задлах боломжгүй байгаа нь нэг шалтгаан байх. Цаашлаад шинэ бүтээгдэхүүнийг олон нийтэд санал болгохыг оролдож байгаа ч төдийлөн хүртээмжтэй биш байна уу?
-Макро, микро төвшинд бодлогоор хийх учиртай. Тэр дундаа мэргэжлийн байгууллагууд болон мэргэжилтнүүдийнхээ санал, бодлыг сонсох хэрэгтэй. Нэн түрүүнд хөрөнгийн захыг хөгжүүлэх бодлогыг гаргаж ирэх зайлшгүй шаардлага тулгараад байна.
Хөрөнгийн бирж 25 жилийн түүхтэй гэж байгаа ч хөгжиж чадсангүй. Тиймээс энэ зах зээлийг идэвхжүүлэхийн тулд макро төвшинд нь төр хэрхэн дэмжих вэ гэдгээ тодорхойлох учиртай. Мөн татварын бодлогоор дэмжих хэрэгтэй. Хамгийн гол нь энэ зах зээл рүү хүмүүс орж ирэхгүй байгаа шалтгааны нэг нь татвар. Хүмүүс банкинд мөнгөө хадгалуулж, хүүг нь авахыг хүсдэг. 25 жил банкинд хадгалуулсан мөнгөний хүүгийн орлогоос татвар авалгүй чөлөөлсөөр ирсэн. Ингэж банкны салбараа төрөөс дэмжсэн юм. Гэтэл хувьцааны ногдол ашиг болон зөрүүд нь татвар ногдуулсаар ирсэн нь хөрөнгийн захын хөгжилд тээг болсон.
Уг нь хөрөнгийн зах, банкны салбар хоёулаа санхүүгийн зах зээлийн тулгуур багана. Энгийнээр хэлэхэд, банкинд мөнгөө хадгалуулж татваргүйгээр хүүгээ авах сонирхол давамгайлна. Харин 150 төгрөгөөр худалдаж авсан хувьцаагаа 200 төгрөгөөр зараад зөрүү 50 төгрөгөөс татвар авахаар хувьцаа өсөхгүй байгаа юм. Ханш өсөх хэрээр татварт төлөх мөнгө нэмэгдэх учраас хувьцаа авах сонирхол төрөхгүй шүү дээ.
-Төр хувийн хэвшлээ дэмжинэ, худалдан авалт хийх болно хэмээн сүүлийн хоёр жил Ерөнхийлөгчөөсөө эхлээд төрийн өндөрлөгүүд тунхагласан. Тэгвэл хөрөнгийн захын хөгжилд төрийн оролцоогоор дэмжих боломжтой юу. Өөрөөр хэлбэл, хувьцаа худалдаж авч болох уу?
-Төр өөрөө идэвхтэйгээр хөрөнгийн зах зээлийн тоглогч болмоор байгаа юм. Төсвийг татвар төлөгчдийн мөнгөөр бүрдүүлдэг. Тэгэхээр тэрхүү нийтийн мөнгөний зарцуулалт нээлттэй, ил тод байх ёстой. Жишээлбэл, тусгай зориулалтын сан зэрэг газруудаар дамжуулан хийж байгаа мөнгөний зарцуулалт хаалттай байдаг нь нууц биш. Үнэхээр санхүүжилт авахыг хүсч байгаа бол тухайн компани хөрөнгийн зах зээл дээр хувьцаа, бонд гаргаж болно.
Ингэхийн тулд тухайн компани хуулийн дүгнэлт хийлгэнэ. Андеррайтерийн байгууллагаар зуучлуулна. Адуит хийлгэж бүхий л үйл ажиллагаа, орлого зарлага нь нээлттэй, ил тод болж компанийн сайн засаглалыг бэхжүүлнэ. Хамгийн гол нь зохицуулалттай зах зээл дээр гарч ирэхэд эрсдэл нь хаагдаж байгааг ойлгох хэрэгтэй. Тиймээс эрсдэл нь хаагдсан, мэргэжлийн байгууллагуудаар дүгнэлт хийлгэсэн хөрөнгийн зах зээл дээр гарч байгаа бонд болон хувьцаанд төр хөрөнгө оруулалт хийж болохгүй гэж. Ингэснээр эрсдэлгүй, төсвийн санхүүжилт нээлттэй ил тод болно. Төр бодлогоор бүхий л салбарыг дэмжсэн. Тодруулбал, ямаанд 5000 төгрөг өгч байгаа шүү дээ.
Гэтэл санхүүгийн зах зээл тэр дундаа хөрөнгийн зах зээлийг яаж дэмжсэн юм бэ гэвэл, харамсалтай дүр зураг харагдана. Үнэхээр төрөөс бодит дэмжлэг өгвөл, андеррайтер болон бусад байгууллагууд бүтээгдэхүүн үйлчилгээгээ сайжруулахын төлөө зүтгэнэ. Эцсийн дүндээ энэ зах зээлд ажиллаж байгаа мэргэжлийн байгууллагад санхүүгийн болон төрийн бодлогын дэмжлэг хэрэгтэй байгааг онцолмоор байна.
-Тэгвэл төр, санхүүгийн зах зээлийн хоёр тоглогчид ялгавартай хандаж байна гэж ойлгож болох уу?
-Шууд утгаар нь ойлгож болохгүй. Тухайн үед банкыг дэмжих байсан нь зөв. Магадгүй банкны салбарынхан биднийг барьцаж байна гэж бодох байх. Хамгийн гол нь бид зөв дэмжлэг, бодит үр дүн хүсч байгаа юм. Гэхдээ одоогийн нөхцөл байдлаас харвал, дараагийнхаа хүүхдийг бойжуулах цаг болсон. Тэгэхээр улс орны эдийн засаг, санхүүгийн зах зээлийн системийн эрсдлийг бууруулах хэрэгтэй. Учир нь, хөрөнгийн зах зээлийн ач холбогдлыг арилжааны банкууд ч ойлгож эхэлсэн. Тухайлбал, манай улсын иргэд, аж ахуйн нэгжүүд өөрт байгаа, барьцаалж болох бүхий л зүйлсээ барьцаанд тавиад банкнаас зээл авчихсан байна.
Гэтэл банк бүх мөнгөө гаргаад, барьцааны хөрөнгөтэй үлдсэн. Уг нь банк зээлээ багцлан хөрөнгийн зах зээл дээр гаргах хэрэгтэй. Барьцааны өмч, хөрөнгийг “Хөрөнгөөр баталгаажсан үнэт цаас” болгон хөрөнгийн зах зээл дээр гаргаад эх үүсвэрээ татдаг, зогсолтгүй эргэлддэг байх ёстой. Харамсалтай нь хөрөнгийн зах зээл нь хөгжөөгүй болохоор арилжааны банкууд зээлээ багцалж, “Хөрөнгөөр баталгаажсан үнэт цаас” гаргаж чадахгүй байна шүү дээ. Тиймээс одоогийн нөхцөл байдал санхүүгийн системээ татаж унагах эрсдэлд тулчихаад байгаа юм.
-Засгийн газрын бонд Хөрөнгийн биржээр арилжаалагддаг болсноор хүмүүс хөрөнгийн зах зээлийн талаарх ойлголттой болсон байна. Тэгвэл, одоо юуг, хэрхэн хийх ёстой юм бэ?
-Хөрөнгийн бирж хөгжих боломж байгааг зах зээлд таниулсан олон үйл явдал боллоо. Тухайлбал, Засгийн газрын бонд, Монгол шуудангийн хувьчлал Хөрөнгийн биржээр дамжиж байгаа нь сайн зүйл. Тэгэхээр бодлогоор дэмжих хэрэгтэй. Гэхдээ төр бодлогоор дэмжиж байна гээд бизнес рүү хэт орох нь зохисгүй. Нэн түрүүнд татварын таатай орчин бүрдүүлвэл, хөрөнгө оруулагчид ороод ирнэ.
-Хэрэв татварын бодлогоор дэмжвэл, хөрөнгийн зах зээл хөгжих юм байна. Үүнд зарцуулагдах хугацааг тодорхойлох боломжтой юу?
-Дан ганц татварын бодлогоор зохицуулалт хийснээр хөрөнгийн зах зээл хөгжинө гэвэл, өрөөсгөл. Аливаа зүйлийг хөгжүүлэхэд цогц бодлого шаардлагатай. Өөрөөр хэлбэл, бизнесээ өргөжүүлэхийн тулд татвар, хүний нөөц, үйл ажиллагааны чиглэл зэрэг олон зүйлийг хамтад нь шийдвэрлэдэг. Тэгэхээр төр бусад салбарыг дэмжиж байгаа шиг санхүүжилт, бодлого, шийдвэрийг хамтатгах хэрэгтэй. Тухайлбал, төсвийн зарцуулалтыг нээлттэй, ил тод болгохын тулд санхүүжилт хийж болно. Түүнчлэн төрийн өмчийн хувьчлалыг Хөрөнгийн зах зээлээр дамжуулж, бодлогоор дэмжих ёстой.
-Хэт төвлөрөлтэй хувьцааг задлах эсвэл хаалттай компани болгох зохицуулалтыг төрөөс хийж болох уу?
-Үүнийг зохицуулах хоёр арга бий. 90 хүртэл хувийн төвлөрөлтэй компанийн тухайд хаалттай болох. Хөрөнгийн биржид бүртгэлтэй компани хөрвөх чадвараа сайжруулах хэрэгтэй. Ингэхийн тулд нэмэлт хувьцаа гаргах ёстой. Гэхдээ хүнд суртал, явдал чирэгдэл ихтэй үед компани яагаад нэмэлт хувьцаа гаргах ёстой вэ гэдэг асуулт гарна. Мэдээж үйл ажиллагаа өргөжүүлж, ашиг орлогоо нэмэхийг хүсч байгаа учраас дэмжлэг хэрэгтэй болж байгаа хэрэг.
Тухайлбал, биржид бүртгэлтэй компани нэмэлт хувьцаа гаргавал, ААНОАТ-аас 30 хүртэл хувиар хөнгөлж болно. Мөн төсвийн санхүүжилтээр явуулдаг үйл ажиллагаанд оролцох давуу эрх олгодог байх болох юм. Энэ мэтчилэн маш олон шийдэл байна. Түүнээс хүчээр хаалттай эсвэл нээлттэй бол гэж болохгүй л дээ.
-Хөрөнгийн зах зээлийн хөгжил нь үнэт цаасны арилжаа эрхлэгчидтэй салшгүй холбоотой гэдэг. Тиймээс Монгол үнэт цаасны арилжаа эрхлэгчдийн холбоо өөрийгөө зохицуулах байгууллага болсон нь нэг алхам гэх юм?
-Тиймээ. 2014 онд Үнэт цаасны зах зээлийн тухай хуульд зүйл заалт оруулж өгсөн. Улс бүрт хөрөнгийн зах зээлийн мэргэжлийн холбоодыг өөрийгөө зохицуулах байгууллага болгодог. Өөрөөр хэлбэл, энэ зах зээл дээр үйл ажиллагаа явуулж байгаа мэргэжлийн байгууллага, мэргэжилтнүүдэд мэргэжлийн ёс зүйн хэм хэмжээг тогтоох. Түүнийгээ хэрэгжүүлэх, мөрдүүлэх, хяналт тавих учиртай.
Мөн хариуцлага тооцдог болж байгаа юм. Магадгүй дотоод мэдээллийг ашиглан буруу ташаа ойлголтыг хөрөнгө оруулагчдад өгөх, өөрсдөдөө ашигтайгаар эргүүлэх, харилцагчийн эд хөрөнгийг дур мэдэн тараах зэрэг ёс зүйн доголдол гарахыг үгүйсгэхгүй. Энэ тохиолдолд хариуцлага тооцно. Одоогоор манай холбоо Ёс зүйн хороогоо байгуулсан. Ёс зүйн журмаа боловсрууллаа. Мөн хороо хэрхэн ажиллах вэ гэдэг журмыг боловсруулж байна. Түүнчлэн мэргэжлийн холбооны хувьд салбарын хөгжлийн бодлогод нөлөөлөх дуу хоолой болохын төлөө ажиллаж байна. Гишүүн байгууллагуудын эрх ашгийг хамгаалах болно.
Д.Оюунчимэг
Эх сурвалж: “Зууны мэдээ” сонин
Сэтгэгдэл0