СӨҮЛ. /TASS/. Умард Солонгосын загас агнуурын усан онгоц болон түүнийг дагалдан явж байсан эргүүлийн хөнгөн хөлөг онгоц руу Өмнөд Солонгосын эргийн хамгаалалтын цэргүүд сануулах гал нээсэн байна.
Учир нь, Умардын хөлөг онгоцууд Шар тэнгис дэх Хойд зааглах шугамыг даван орж ирсэн байжээ. Энэ тухай Өмнөд Солонгосын Ёнхап агентлаг мэдээллээ.
Хэд хэдэн удаа сануулга өгөх зорилгоор буудсаны дараа Умардын хөлөг онгоцууд гэдрэг буцсан байна.
Хойд зааглах шугам бол хоёр Солонгосыг заагладаг усан хилийн шугам юм. 1950-1953 оны Солонгосын дайн дуусах үед НҮБ-ын цэргийн командлал Шар тэнгист Хойд зааглах шугам гэдгийг яаравчлан тогтоосон боловч БНАСАУ уг шугамыг хүлээн зөвшөөрдөггүй аж. Умардын тал уг шугамыг 38 дугаар өргөргийн зааглах шугамаас урагш шилжүүлэн байгууулахыг шаардсаар ирсэн байна.
Харин АНУ, Өмнөд Солонгос хоёр уг шаардлагыг хүлээн аваагүй учраас Хойд зааглах шугамын ойролцоо хэд хэдэн удаа хилийн будлиан гарч байжээ. Тухайлбал, 2010 оны 11 дүгээр сарын 23-нд Ёнпондо арлын орчимд хоёр тал их буугаар харилцан буудалцсаны улмаас хэд хэдэн хүн амиа алдсан билээ.
Д.Нямтулга
Эх сурвалж: “Монцамэ” агентлаг
Сэтгэгдэл0
Энэ хоёр балай улс 1950 оны дайны өмнө нэгэн гэр бүл байсан. Гэтэл намууд шинээр төрж ард түмнийг хагалан бутаргаж, нэг гэрийн ахан дүүс бие биенээ хядснаар Солонгосын дайн дэгдсэн. Хойд солонгос нь хамт ажиллаж олоод адилхан иднэ. Өмнөдынхөн болохоор хэн сайн ажиллана тэр нь илүү иднэ гэдэг үзэл сурталд хуваагдав. Сөүлийн хоёр талд Оросууд, Америкууд эд нарыг тусгаарлаж, дайныг дэвэргэж байв. Хойд солонгост одоо аймшигтай өлсгөлөнд нэрвэгдсэн. Хөдөөнөөс хот руу оруулдаггүй. Оршин суух зөвшөөрөл ч олгодоггүй. Нийслэлийнхэн иргэд харьцангуй азтай. Ажил хийгээд өлсөж үхэхгүйхэн шиг зомби мэт явж байна. Хөдөө уулын модыг чанаж усан шөл гаргаж уудаг. Огтоно зурам дууссан. Нүүдлийн шувуудыг асар ихээр алж устгаснаар тэд нь ирэхээ байсан. Ганцхан бүдүүн даргыг хэт их шүтсэн цэргийн эрхтэн дархтанууд төрийг нь хамт барилцаж байна. Өнөө шөнө ч тэнд иргэний дайн дэгдэж, ард түмэн нь босоход бэлэн болчихсон. Хязгаар гэж заавал байдаг.