sonin.mn
Сэтгэгдэл (0)
ХОНКОНГ. /TASS/. Юанийн ханш буурч байгаа болон бүс нутагт эдийн засаг, геополитикийн тодорхойгүй нөхцөл байдал үүссэнтэй холбоотойгоор Хятад улсад алтны эрэлт нэмэгдсээр байна.
 
Энэ оны эхний хагаст гэхэд Хонконгоор дамжуулан эх газрын Хятад руу нийлүүлж буй алтны хэмжээ өнгөрсөн оны мөн үетэй харьцуулахад 5,5 дахин өссөн тухай "Саут Чайна морнинг пост" сонинд мэдээлжээ.
 
Гаалийн мэдээллийг үзвэл, Хонконгоос худалдан авсан алтны үнийн дүн 45,8 тэрбум юань буюу 6,8 тэрбум доллар болсон байна. Харин оны эхний хагаст Хятад улс нийтдээ 173 тэрбум юань буюу 25,8 тэрбум долларын алт импортолсон аж.
 
Алтны эрэлт нэмэгдэж байгаа нь доллартой харьцах юанийн ханш суларч байгаа, зах зээлд тодорхойгүй байдал бий болсон, түүнчлэн Өмнөд Хятадын тэнгист газар нутгийн маргаан үүсч, геополитикийн байдал улам бүр хурцдаж байгаа зэрэгтэй холбоотой гэж шинжээчид үзэж байгаа юм.
 
“Ийм цаг үед Хятадын олон хөрөнгө оруулагчид, ялангуяа баян чинээлэг эмэгтэйчүүд алтыг илүү найдвартай актив гэж үзэж байна. Түүний сацуу, тэд юанийн ханшийн уналтаас ч мөн сэрэмжилж байгаа юм. Юанийн ханш буурах хандлага энэ онд ч үргэлжилнэ” гэж Хонконгийн "King International" компанийн захирал Жаспер Ло ярьж байна.
 
Х.Сарнай
Эх сурвалж: "Монцамэ" агентлаг