sonin.mn
ВАШИНГТОН. / money.cnn.com/. 2011 онд Монголын эдийн засаг 17 хувиар өсч, олон тэрбум долларын гадаадын хөрөнгө оруулалтыг татаж байлаа. Харин одоо энэ улс өрийн хямралд нэрвэгдэж, дампуурч болзошгүй нөхцөл байдалд ороод байна.
 
Монголын төгрөгийн доллартай харьцах ханш өнгөрсөн сарын сүүлчээс хойш огцом унаад байгаа билээ.
Тус улсын Төвбанк төгрөгийн ханшийн уналтыг зогсоохын тулд бодлогын хүүгээ 4.5 хувиар огцом өсгөж 15 хувьд хүргэсэн боловч энэхүү хүчин чармайлт тус болохгүй байна.
 
Одоо тус улсын эрх баригчид эдийн засгийн хямралаас гарахын тулд Олон улсын валютын сангаас тусламж хүсэх тухай ярьж байна.
“Бид эдийн засгийн гүн хямралд ороод байна. Цалин тэтгэвэр тавих болон засгийн газрын харьяа байгууллагуудын урсгал зардлыг санхүүжүүлэх мөнгөгүй болж болзошгүй нөхцөл байдалтай тулгарлаа” гэж тус улсын Сангийн сайд Б.Чойжилсүрэн мэдэгдсэн билээ.
 
Нэгэн цагт гадаадын хөрөнгө оруулагчдад дарагдаж байсан Монголын хувь заяа огцом эргэж, эдийн засгийн хямралд ороод байна. Гуравхан сая хүн амтай энэ улс асар их байгалийн баялагтай бөгөөд уул уурхайн салбар нь хэдэн тэрбум долларын хөрөнгө оруулалт татаж байв.
 
Хямрал эхлэхээс өмнө Дэлхийн банк мэдэгдэхдээ “Монгол Улс асар их хэмжээний эрдэс баялаг олборлосноор томоохон өөрчлөлтийн босгон дээр хүрч ирээд байна” гэж байв.
 
Харин дэлхийн зах зээлд ашигт малтмалын ханш унаснаар “алтны халуурал” төгсгөл болсон юм.
Мөн Монголын экспортын бараа бүтээгдэхүүний дөрөвний гурвыг худалдан авдаг БНХАУ-д эрэлт /эдийн засгийн өсөлт нь саарсны улмаас/ эрс буурлаа.
Монголын эдийн засгийн өсөлт энэ онд тэг хувьтай эсвэл үүнээс ч доогуур үзүүлэлттэй гарч магадгүй гэж шинжээчид урьдчилан таамаглаж байна. Харин одоогийн эдийн засгийн хямралыг нэн даруй шийдвэрлэхгүй бол тэг хувь гэсэн тоо ч мөн адил хоосон горьдлого болж хувирч магадгүй юм. 
 
Г.Доржханд
 
Эх сурвалж:“Монцамэ” агентлаг