sonin.mn
БРЮССЕЛЬ. /АР/. Мэдээллийн технологийн “Apple” компаниас 13 тэрбум евро буюу 14.5 тэрбум долларын татварыг авахыг Ирландад үүрэг болгосон шийдвэрийг Европын Холбоо /ЕХ/ гаргажээ.
 
“Apple”-ийн Ирланд дахь охин компаниуд орлогоосоо нэг хүрэхгүй хувийн татварыг төлсөн гэж Европын Комисс мягмар гарагт мэдэгдсэн байна. Ирланд дахь аж ахуйн нэгжүүд 12.5 хувийн татвар төлдөг ажээ.
 
Тус комиссын үзэж байгаагаар, Ирландын Засгийн газрын “Apple”-д зориулсан татварын хөнгөлөлт нь ЕХ-ны дүрэм журмыг зөрчсөн хэрэг юм.
 
Тиймээс 2003-2014 онд “Apple”-ийн төлөх ёстой байсан татварыг цуглуулж авахыг Ирландад үүрэг болгосон байна.
 
ЕХ-ны өрсөлдөөний асуудал эрхэлсэн комиссар Маргрете Вестгар хэлэхдээ “ЕХ-ны гишүүн улсууд тухайлсан компаниудад татварын хөнгөлөлт үзүүлж болохгүй гэдгийг энэ шийдвэр тодорхой санууллаа” гэв.
 
Америкийн кофены сүлжээ болох “Starbucks” компанид шударга бусаар татварын хөнгөлөлт үзүүлсэн учир татварыг буцаан авахыг Нидерландад үүрэг болгосон шийдвэрийг ЕХ өнгөрсөн онд гаргаж байжээ. Уг шийдвэрийг америкчууд шүүмжилж байсан юм.
 
Г.Доржханд
Эх сурвалж: "Монцамэ" агентлаг