sonin.mn
Сэтгэгдэл (0)
Гар аргаар ашигт малтмал олборлогч иргэд буюу бидний хэлж заншсанаар “Нинжа” гэх тодотголтой иргэдийн талаар төрийн зүгээс дорвитой үйл ажиллагаа явуулалгүй бодлогын түвшинд орхигдсоор ирсэн билээ. Өнөөдрийг хүртэл хууль эрх зүйн орчны зохицуулалт ч хангалтгүй хэвээр байсаар байна. 
 
Тухайн газарт ашигт малтмал олборлогч иргэдийн хөдөлмөрийн аюулгүй байдлыг яриад ч хэрэггүй байх. Өнөөдрийн байдлаар шороо, чулуунд дарагдаж, амь насаа алдсан нинжа нарын тоо тоймгүй. Үүнээс гадна эрүүл мэндийн наад захын шаардлагыг хангахгүй, агааргүй, хүйтэн, чийгтэй орчинд ажиллаж байгаагаас үүдэн үе мөч, бөөр, ууц нуруугаар хатгах, хоолой сөөх, цээжээр хатгуулах зовиур бараг хүн бүрт илэрдэг гэнэ.
 
Тиймээс эдгээр иргэдийн нийгмийн болон эдийн засгийн баталгааг сайжруулах зорилгоор Улсын Их Хурлын гишүүн Т.Аюурсайхан “Гар аргаар ашигт малтмал албан бусаар олборлож буй иргэдийн талаар авах арга хэмжээний тухай” Улсын Их Хурлын тогтоолын төслийг боловсруулж Засгийн газраас санал авахаар хүргүүлсэн байна.
 
Тус тогтоолын төсөл батлагдвал тухайн иргэдийг тусгайлсан сургалтанд хамруулж мэргэжилтэй болгох, ажил эрхлэлтийн өөр зэрэгцээ хэлбэрүүдийг бий болгох, ажлын байраар хангах, тухайн газар нутагт өрхийн болон бичил үйлдвэрлэл үйлчилгээний газруудыг орон нутгийн дэмжлэгтэйгээр тусгайлан байгуулах, гар аргаар ашигт малтмал эрхлэгч иргэдэд бичил бизнес эрхлэхэд нь төрөөс дэмжлэг үзүүлэх зэргээр тэдгээр иргэдийн өрхийн орлогыг нь нэмэгдүүлж, “Нинжа” гэх тодотголтой эрсдэлт бүлгээс гарахад нь төрийн зүгээс үзүүлж буй томоохон дэмжлэг болох юм.
 
Мөн энэ талаар ажилгүйдэл, ядуурлыг бууруулах үндэсний хэмжээний бодлого хөтөлбөрүүдэд тусгай дэд хөтөлбөр нэмж тусгах, олон улсын байгууллага, гадаад улс орнуудтай төсөл хөтөлбөр боловсруулж, хамтран ажиллахыг засгийн газарт даалгахаар тогтоолын төсөлд тусгажээ.