sonin.mn
ПАРИС. /Thejournal/. Сирид амьдардаг нэгэн террорист этгээдийн зааврын дагуу халдлага үйлдэхээр төлөвлөж байсан Францын Ницца хотын оршин суугч, өсвөр насны хоёр охиныг баривчилсан тухай гэж эх сурвалж мэдээлэв.
 
Өдгөө 17, 19 настай хоёр сэжигтэн нь долдугаар сарын 14-нд ачааны машинаар 86 хүнийг дайрч амийг нь хөнөөсөн Мохамед Лахоуейж Боухлел гэгч этгээдтэй Ницца хотод ойр амьдардаг байжээ.
 
Тэдний гэрт нэгжлэг хийсэн боловч зэвсэг гэхээр зүйл олоогүй байна.
Ирак, Сири дэх “Лалын улс” бүлэглэлийн хяналтад байдаг газар нутагт амьдардаг Рачид Кассим гэдэг Францын иргэнтэй холбоо тогтоосон гэж охид мөрдөн байцаагч нарт мэдэгджээ.
 
Харин мөрдөн байцаалтад ойр эх сурвалжийн ярьснаар, Рачид Кассимын шахалтаар халдлага үйлдэхээр төлөвлөж байснаа охид хүлээсэн байна.
Хоёр охины нэг нь өмнө нь ямар нэг хэрэгт холбогдож байгаагүй бөгөөд тэрбээр цэргүүдийг үзэн яддаг байснаа хэлжээ. Түүнийг террорист гэмт хэрэгтэнтэй холбоо тогтоосон хэргээр буруутгаад байгаа аж. 
 
Харин арай эгчмэд 19 настай охин өмнө нь “Лалын улс” бүлэглэлд хүн элсүүлдэг Францын иргэн Омар Диабитай холбоо тогтоож байсан гэх үндэслэлээр мөрдөгчдийн хараанд өртөж байжээ. Тэрбээр 17 настай байхдаа Сири рүү явахаар төлөвлөж байсан байна.
 
Д.Нямтулга
Эх сурвалж: "Монцамэ" агентлаг