sonin.mn
Сэтгэгдэл (0)
СӨҮЛ./Yonhap/. Өмнөд Солонгост шувууны томуугийн вирусийн тархалтаас урьдчилан сэргийлэх арга хэмжээ авч байна.
 
Тус улсын Засгийн газрын мэдэгдсэнээр, даваа гарагийн байдлаар шувууны томуугийн “Эйч5-Эн6” вирус тархсан газруудад 1.3 сая гаруй тахиа, нугас болон бусад шувууг устгаад байгаа ажээ.
 
Холбогдох албаны хүмүүс халдваргүйжүүлэх ажлыг гүйцэтгэж байна. 11 дүгээр сарын 26-ны шөнө дундаас эхлэн 48 цагийн хугацаанд шувууны аж ахуйнуудаас гадагш тээвэрлэлт хийхийг хоригложээ.
 
Энэ сарын 16-нд тус улсын Өмнөд Чолла аймгийн Хаэнам хошууны нэгэн фермд олон тооны тахиа үхсэн байжээ. Үхсэн шувуудаас “Эйч5-Эн6” вирус илэрчээ.
 
Энэ тохиолдол гарснаас хойш тус улсын 32 шувууны фермд уг вирус илрээд байгаа юм.
Вирусийг нүүдлийн шувуудаар дамжин тархсан гэж албаны хүмүүс таамаглаж байна.
 
Г.Доржханд
 
Эх сурвалж: “Монцамэ”агентлаг