УИХ-ын чуулганы нэгдсэн хуралдаанаар Гаалийн тариф, гаалийн татварын тухай хуульд нэмэлт, өөрчлөлт оруулах тухай хуулийн төслийн хэлэлцэх эсэхийг хэлэлцэж, дэмжлээ.
Төсөл санаачлагчийн илтгэлийг Гадаад харилцааны сайд Ц.Мөнх-Оргил танилцуулав. Тэрбээр "Монгол Улс Дэлхийн худалдааны байгууллагын олон талт худалдааны хэлэлцээрийн “Гарал үүслийн дүрмийн тухай хэлэлцээр”-т 1994 онд нэгдэн, улмаар 1997 онд Дэлхийн худалдааны байгууллагад “Тариф худалдааны ерөнхий хэлэлцээр”-т гишүүнээр элсэж орсон.
Засгийн газрын 2016 оны 09 дүгээр сарын 14-ний өдрийн 46 дугаар хуралдаанаас 2017 оны 01 дүгээр сарын 01-ний өдрийг хүртэл хойшлуулан, Дэлхийн худалдааны байгууллагын тариф, худалдааны ерөнхий хэлэлцээрт гаалийн тариф, гаалийн татварын тухай хуулийг нийцүүлэн нэмэлт, өөрчлөлт оруулах тухай хуулийн төсөл боловсруулах талаар чиглэл өгсөн" гэдгийг дурдав.
Энэхүү хуулийн төсөлд хөнгөлөлттэй тариф хэрэглэх улсын жагсаалтад орсон боловч Монгол Улсын олон улсын гэрээ, эсхүл нотлох баримт бичиггүй бараанд нэн тааламжтай тариф хэрэглэх, барааны гарал үүслийг нотлох баримт бичигтэй холбоотой зохицуулалт болон барааны гарал үүслийн гэрчилгээ заавал шаардагдах барааны жагсаалтыг Засгийн газар батлах зохицуулалтыг тус тус нэмж тусгалаа.
Түүнчлэн Гаалийн тариф, гаалийн татварын тухай хуулийн 4, 31 дүгээр зүйлийн холбогдох заалтуудыг Тариф, худалдааны ерөнхий хэлэлцээрт нийцүүлэн өөрчилсөн. Мөн хуулийн төсөлтэй холбогдуулан Гаалийн тариф, гаалийн татварын тухай хуулийн 34 дүгээр зүйлийг хүчингүй болгохоор тусгасан. Уг хуулийн төсөл нь Монгол Улсын нэгдэн орсон олон улсын хэлэлцээр, Гаалийн хууль болон бусад хуультай нийцэж байгаа бөгөөд улсын төсөвт ямар нэг хүндрэл үзүүлэхгүй" гэдгийг Гадаад харилцааны сайд Ц.Мөнх-Оргил онцолж байв.
Хуулийн төсөлтэй холбогдуулж гишүүдийн асуусан асуултад хариулахдаа Гадаад харилцааны сайд Ц.Мөнх-Оргил дараах зүйлийг онцолж байлаа. Энэ нь, Монгол Улс Япон улсын хооронд эдийн засгийн түншлэл, чөлөөт худалдааны хэлэлцээр байгуулсан. Хэлэлцээр байгуулсан болохоор Дэлхийн худалдааны байгууллагын гишүүн орнуудын баримталдаг хөнгөлөлтийн тарифыг мөрдөх ёстой. Монгол Улс өмнө нь нэг ч улстай эдийн засгийн түншлэлийн хэлэлцээр хийж байгаагүй болохоор холбогдох хуульд нэмэлт өөрчлөлт оруулах шаардлагагүй байсан юм.
Өнөөдөр Япон улстай эдийн засгийн түншлэлийн хэлэлцээр байгуулсан учраас хөнгөлөлтийн тарифыг мөрдлөг болгохгүй бол тус улсаас оруулж ирж байгаа худалдаанд 10 хувийн татвар ногдох асуудал үүсээд байгаа юм. Тиймээс энэхүү хуулийн төслийг өргөн барьж худалдааны татварыг тэглэх буюу эсвэл таван хувь болгох шаардлагатай байна гэсэн юм.
Ингээд санал хураалт явуулахад гишүүдийн 70 хувь нь хуулийн төслийг хэлэлцэх нь зүйтэй гэж үзлээ.
Н.Гантуяа
Эх сурвалж: “Монцамэ”агентлаг
Сэтгэгдэл0
зориудаар нүдийг нь сохолж мөчийг нь санжуулсан зөвхөн удирдлагад гарсан хүмүүсийн эрх ашгийг хамгаалж олон нийтийн эрх ашгийг хохироосон олон хуулийг эргэн хянаж зөв замд оруулаасай билээ. НӨАТ гэдэг нь тухайн орноос нэмүү ортөг оруулж хийсэн бүтээгдэхүүнийг бүртгэх түүнд нэмэгдсэн өртөгөөс нь татвар авдаг хууль дэлхий дахинаа хэррэгжиж байдаг гэтэл манайд гадаадаас худалдаж авсан үнэ, тээврийн зардал, гаалын татварыг оруулсан дүнгээс татвар авдаг журам нь зорилготойгоо огт цохицохгүй байна. мөн үл хөдлөх хөрөнгө, үнэт цаасны хуулийг жинхэн ёсоор нь гаргахын оронд зөвхөн өөрсөддөө зориулж ноогдол ашиг хуваахгүй байгаа аж ахуйн нэгжийг дампууруулдаг хариуцлагын хэсгийг нь хассан тул өнөөдөр хөрөнгийн бирж огт хөгжихгүй байна