Улаанбаатар /МОНЦАМЭ/. МҮЭХ-ноос Засгийн газрыг нэн даруй байгуулж, төрийн тогтвортой үйл ажиллагааг хангах чиглэлээр энэ сарын 12-нд УИХ-д мэдэгдэл хүргүүлжээ.
 
Уг мэдэгдэлд, “Хөдөлмөр, нийгмийн зөвшлийн гурван талт 2017-2018 оны Улсын хэлэлцээрийн хэрэгжилт хангалтгүй байна. Мөн тэтгэврийн нас болон зарим төрлийн татварыг нэмэгдүүлсэн буруу шийдвэрүүдийг залруулах, цалин орлогыг нэмэгдүүлэх, эдийн засгийн хүндрэлийг богино хугацаанд даван туулах зэрэг хөдөлмөрчдийн өмнө тулгамдсан олон асуудлууд шийдвэрлэгдэхгүй удаашралтай байгаагаас нийгэмд үүссэн бухимдал улам нэмэгдсээр байна. Боловсрол, эрүүл мэнд зэрэг зарим салбарт ажиллагсад хөдөлмөрлөх эрх ашгийнхаа төлөө эсэргүүцлээ илэрхийлж эхлээд байна. 
 
Монгол Улсын Засгийн газар огцроод 5 хонож байгаа хэдий ч цаг хугацаа алдалгүйгээр хуулийн хүрээнд чадварлаг, хариуцлагатай, мэргэжлийн Засгийн газрыг шуурхай байгуулж, нийгэмд хүлээлт үүсгээд байгаа асуудлаар шаардлагатай арга хэмжээг авах чиглэлд УИХ-ын зүгээс онцгой анхаарч ажиллахыг мэдэгдэе” гэжээ.
 
Ч.Ариунболд
Эх сурвалж: Монцамэ агентлаг