sonin.mn
Монгол Улсын Гадаад харилцааны яам, “Хилийн чанад дахь монголчуудын зөвлөл” ТББ-тай хамтран “Хилийн чанад дахь монголчуудын холбоо, Төрийн бус байгууллагуудын III чуулга уулзалт”-ыг зохион байгуулж байгаа юм.
Эдгээр төрийн бус байгууллагууд нь хилийн чанадад амьдарч, ажиллаж, сурч буй монгол иргэдийн хууль ёсны эрх ашгийг хамгаалах, иргэдийн нийгмийн асуудлыг шийдвэрлэх зэрэг чиглэлээр ажилладаг бөгөөд Улаанбаатар хотод III чуулга уулзалтаа зохион байгуулж байгаа юм.
Чуулга, уулзалтын хүрээнд 40 гаруй улсад үйл ажиллагаа явуулж буй монголчуудын холбооны төлөөллүүд өнөөдөр Монгол Улсын Ерөнхийлөгч Х.Баттулгатай уулзаж, ярилцсан юм.
Уулзалтын эхэнд Монгол Улсын Ерөнхийлөгч Х.Баттулга амьдран буй улсдаа элэг нэгтнүүдийнхээ эрх ашгийг хамгаалах болоод Монгол өв соёлоо түгээн дэлгэрүүлж буй төрийн бус байгууллагын төлөөллүүдэд талархаж буйгаа хэлээд чуулганы үйл ажиллагаанд нь амжилт хүсэв. Мөн хилийн чанадад буй монголчуудад тулгарч байгаа зарим асуудал нааштайгаар шийдэгдэж, үр дүн гарч байгаад өнгөрсөн жилүүдийн чуулган, Төрийн бус байгууллагуудын хичээл зүтгэлтэй салшгүй холбоотойг онцлон дурдаж, өнөө хэр тулгарч буй зарим асуудлын хүрээнд дэлгэрэнгүй ярилцлаа.
“Хилийн чанад дахь монголчуудын холбоо”-ны тэргүүн Н.Номун-Эрдэнийн дурдсанаар Засгийн газар, Гадаад харилцааны яам хилийн чанад дахь монгол иргэдэд зориулсан бодлого хэрэгжүүлж эхэлснээр гадаадад байгаа монгол иргэдийн нөхцөл байдал сайжирч, мөн консулын үйлчилгээний чанар, хүртээмжийн судалгаа хийж эхэлсэн тул цаашид консулын газруудын үйл ажиллагаа иргэдэд илүү нээлттэй, ойр болно гэдэгт олон иргэд итгэлтэй байгаа гэсэн юм. Мөн одоогоор зарим улсад ажиллаж байгаа иргэд тухайн улсдаа нийгмийн даатгал төлж, Монгол Улсаас тэтгэвэр авах хууль эрхзүйн орчин бүрдсэн хэдий ч энэ бодлогыг илүү олон улсад хэрэгжүүлэх асуудлаар эрх баригчдыг хичээл зүтгэл гарган ажиллах ёстой гэж хилийн чанадад суугаа монгол иргэд хүсэж буйг уламжилсан юм.
Мөн албан бус тоогоор 41 мянга гаруй оюутан гадаад улсад суралцаж, чанартай академик боловсрол эзэмшиж байгаа ч Монгол Улсдаа ирж ажиллах нөхцөл боломж одоо хэр нь бүрдээгүй байгаа нь Монгол Улс дахь хөдөлмөрийн үнэлэмж, хөдөлмөрийн зах зээлийн судалгаа дутмаг зэрэг асуудлаас үүдэлтэй гэж 23 улсад байгуулагдсан оюутны холбоод нийтлэгээр дүгнэдэг байна. Тиймээс эдгээр асуудлыг чуулганы үеэр ярилцсан бөгөөд Засгийн газар, Гадаад харилцааны яам зэрэг төрийн байгууллагууд оюутны холбоодтой нягт хамтран ажиллаж юун түрүүнд тооцоо, судалгаа хийх шаардлагатай гэж дүгнэсэн талаар танилцуулав.
Харин Монгол Улсын Ерөнхийлөгч Х.Баттулга гадаадад буй иргэдэд тулгарч байгаа зарим асуудлыг шийдвэрлэх талаар хэлж, цаашид тооцоо судалгаа хийж, хамтран ажиллах бүрэн боломжтой гэдгээ илэрхийлсэн юм.
Мөн хилийн чанадад үйл ажиллагаа явуулдаг төрийн бус байгууллагын төлөөллүүд Монголын соёлын өдрүүд зохион байгуулах, гадаадад буй монгол хүүхдүүдэд монгол хэл, уран зохиол зэрэг хичээл заах, өв соёлоо өвлүүлэх, гадаадад буй иргэдийн Монгол орондоо оруулж болох хувь нэмрийн асуудлаар Монгол Улсын Ерөнхийлөгчтэй дэлгэрэнгүй ярилцлаа.