sonin.mn
Манай улсаас тив, дэлхийн шатрын тэмцээнд нэрээ гаргаж яваа шатарчин олон бий. Тэдний нэг Ховд аймгийн Чандмань сумын харьяат, Сонирхогчдын дэлхийн хошой аварга, Монгол Улсын аварга, ОУХМ Б.Баярмаатай уулзаж ярилцлаа.
 
-Шатрын спортод амжилт гаргах нь олон жилийн уйгагүй хөдөлмөр байх. Энэ спортыг анх яагаад сонирхох болов, магадгүй хэн нэгэн нөлөөлсөн үү?
 
-Миний аав шатар тоглох их дуртай байсан. Энэ спортоор хичээллэхэд аавын минь  хичээл зүтгэл их байгаа. Хүүхэд байхаас минь дагуулаад тоглодог байлаа. Мөн ар гэрийнхний минь хичээл зүтгэл, дэмжлэг, сэтгэл шингэж байж амжилтад хүрсэн гэж боддог.
 
-Хэзээнээс анх шатар тоглож эхлэв?
 
-Би 2003 онд “Ирээдүй цогцолбор”-ын нэгдүгээр бага сургуульд орсон. Тэнд шатар, математикийн сонгоны ангид спортын дэд мастер Д.Сэржмядаг багштай хичээллэж эхэлсэн. Дараа нь дэлхийн шатрын холбооны мастер Ч. Хүрэлбаатар, мастер Н.Төвсанаа багш нар дээр ирж хичээллэсэн. Харин одоо “Мончес” клубын багш, спортын мастер Ц.Батсайхан багшийн удирдлага дор хичээллэдэг.
 
-Та Ховд аймгийн спорт наадамд хэд дэх удаагаа оролцож байна?
 
-2010-2013 он хүртэл оролцсон. ОХУ-ын Плехановын нэрэмжит эдийн засгийн дээд сургуульд Мэдээлэл системийн инженер мэргэжлээр суралцахаар явсан.Түүнээс хойш оролцоогүй. Харин энэ жил төгсч ирээд нутгийнхаа наадамд оролцож, аймгийнхаа зон олонтой дахин уулзаж байгаадаа баяртай байна. Би энэ шатрын тэмцээнд сумаа төлөөлж оролцлоо. Мөн зохион байгуулагчаар ажилласан.
 
-Өмнөх наадмуудтай харьцуулахад энэ жилийн спорт өдөрлөг ямар онцлогтой болов?
 
-Илүү өргөжсөн байна. Зохион байгуулалт сайтай, оролцсон тамирчдын хувьд их дэг журамтай болж, хувцаслалт жигдэрсэн байна. Тамирчид нэг нэгэндээ хүндэтгэлтэй хандаж, өргөнөөр оролцож байна.
 
-Шатрын тэмцээнд шүүгчээр ажилласан. Оролцсон тамирчдын чанар чансаа, тоглолтын ур чадвар ямар санагдсан бэ?
 
-Манай аймагт шатрын спорт их хөгжиж байгаа нь харагдаж байна. Тодруулбал, өсвөр үеийн шатарчид их сайжирчээ. Өнгөрсөн нэгдүгээр сард Чандмань суманд миний нэрэмжит  шатрын аварга шалгаруулах тэмцээн зохиогдсон. Тэмцээнд 81 тамирчин оролцсон. Энэ тэмцээнд тус сумын “Цац” сургуулийн 7а ангийн сурагч “Мянган Хожил” шатрын клубын тамирчин Э.Ундармаа долоон өргөөс долоо хожиж түрүүлсэн. Үүнээс үзэхэд аймаг, сум, багийн хэмжээнд шатрын спорт их хөгжиж байна.
 
-Монголынхоо ямар тамирчидтай баг болж олон улсын тэмцээнд оролцож байв?
 
-Олон улсын эмэгтэй их мастер Б. Мөнгөнтуул, гавьяат тамирчин Т.Батчимэг, олон улсын шатрын холбооны мастер  Б.Анхчимэг, У.Лхамсүрэн, эрэгтэй багаас гавьяат мастер Ц.Батчулуун нартай  2014 оны олимпод баг болж оролцож байсан.
 
-Ойрын хугацаанд оролцохоор төлөвлөсөн тэмцээн байгаа юу?
 
-Саяхан сургуулиа төгссөн болохоор мэргэжлээрээ ажиллаж байна. Тиймээс ойрын хугацаанд оролцохоор төлөвлөсөн тэмцээн алга. Гэхдээ боломжоороо бэлтгэл хийнэ. Мөн оны сүүлээр нээлттэй тэмцээнүүдэд оролцох бодолтой байгаа. Энэ тэмцээнүүдэд оролцсоноор  их мастер цолны болзлыг  хангах, рейтингээ ахиулах боломжтой. Тиймээс энэ тэмцээнүүдэд оролцож их мастер цолондоо хүрэхээр зүтгэнэ.
 
-Тамирчин хүнд хамгийн дурсамжтай тэмцээн гэж байдаг. Таны хувьд ямар тэмцээн байдаг вэ?
 
-Миний хувьд хамгийн дурсамжтай, том сургамж өгсөн тэмцээн бол 2014 онд Норвегид  болсон дэлхийн шатрын олимпиад байсан. Хэдийгээр медаль авсан ч ялагдал дунд сурах зүйл их байдаг. Энэ миний хамгийн анх оролцсон олон улсын тэмцээн. Мөн  шатрын спортыг их ойлгож, мэдэрсэн тэмцээн гэж хэлж болно.
 
-Гадаадын нэртэй тамирчинтай нэг тоглох юмсан гэж хүсдэг үү?
 
-Өөр орны гэвэл олон шатрын их мастер, аваргууд бий. Тэдэнтэй нэг тэмцээнд мөр зэрэгцэн тоглохыг хүсдэг. Тийм боломж олдвол хичээж тоглоно доо. Яг тэр гэж оноож хэлэхэд хэцүү. Гэхдээ Норвегийн шатарчин, их мастер Магнус Карлсен шатрын спортод ноёлж байна гэж хэлэхэд буруудахгүй. Тэр хүнтэй тоглохыг хүсэх байсан болов уу. Мөн Каспаров гэж домог болсон шатарчин байна.
 
-Их мастер  Магнус Карлсентай таарч тоглох боломж гарвал яах вэ?
 
-Сайн хэлж мэдэхгүй байна. Тухайн үеийн тамирчин хүний сэтгэл зүй, нөхцөл байдал ямар байхаас хамаарна даа. Хожчихвол үнэхээр гайхалтай мэдрэмжийг мэдрэх байх  гэж бодож байна.
 
 
Х.Оюунболд
Эх сурвалж: “Зууны мэдээ” сонин