Монгол түмэн 1964 оны Токиогийн олимпийн их наадамд оролцож эхэлсэн цагаас хойш 44 жилийн дараа буюу 2008 оны Бээжингийн олимпийн наадамд анхны аваргаа өлгийдөн авч байлаа.
Тодруулбал наймдугаар сарын 14-ний өдөр Ннгийн Түвшинбаяр анхны олимпийн аварга болсон юм. Энэ өдрөөс хэсэгхэн хугацааны дараа боксын 54 кг-д тулалдсан Э.Бадар-Ууган олимпийн алтан медалийг ихэрлүүлж чадсан.
Эдгээр тамирчдын амжилт зогссонгүй яг сарын дараа Паралимпийн байт харваан төрөлд өрсөлдсөн Дамбадондогийн Баатаржав мөн л олимпийн аварга болж чадсан юм. Монгол түмний бахархал болсон, паралимпийн аварга, Монгол Улсын хөдөлмөрийн баатар, гавьяат тамирчин Д.Баатаржавтай ярилцлаа.
-Ард түмний бахархал, паралимпийн анхны олимпийн аваргатай уулзаж байгаадаа баяртай байна. Боксын спортод хөл тавьж тамирчин болох гараагаа эхэлж байсан тэр үеэс тань яриагаа эхлэе?
-Би Дорнод аймгийн Баян-Уул сумын Эрээн хороонд төрсөн. Аавын минь төрсөн нутаг Дашбалбар сум. Ээж минь Хэнтий аймгийн Дадал сумын уугуул. Монгол Улсын зүүн хойд хязгаар бол миний нутаг юм.
Миний аав Монгол Улсын начин, анчин хүн. Би ах, дүү хоёртойгоо нийлээд боксын спортод Ардын багш, гавьяат дасгалжуулагч Банди багшийн удирдлага дор хичээллэх болсон. 10-аад жил боксын спортоор тоглож явсан хүн.
-Маш хөдөлгөөнтэй хүүхэд байсан гэж дуулсан?
-Аав минь бөхийн хүн. Дээр нь би өөрөө боксын спортынх. Тэр нь нөлөөлдөг байсан юм уу хөдөлгөөнтэй, хэрэгт орчих гээд байдаг хүүхэд байлаа. Хүнд өвчин гэдэг зүйл хэлж ирдэггүй хийсч ирдэг. Золгүй ахуйн ослоос болж хөл муутай болсон.
-Сидней, Афины олимпод оролцож явсан. Магадгүй тав, зургадугаар байр өнөөгийн олимпийн аварга болоход нөлөөлсөн байх?
-Байт харваан спортод 1988 онд хөл тавьж байлаа. Тухайн ондоо сайн харваагүй. Дараа жил нь Ази номхон далайн орнуудын тахир дутуу иргэдийн тэмцээнд өрсөлдсөн. Одоогоор бол Азийн наадам.
Тэр цагаас өнөөдрийг хүртэл байт харваан спортоор өрсөлдөж байна. Хоёр олимпийн наадамд өрсөлдөх нь надад Бээжингийн олимпод аварга болох бэлтгэл, туршлага болж өгсөн байх.
-Яагаад байт харваан спортыг сонгох болов?
-Тухайн онд Японд Азийн наадмын тоглолт болох гээд манай улсад урилга ирсэн байсан. Тэр тэмцээнд тамирчид шалгаруулж авна гээд шалгаруулалтад орсон. Миний хувьд спортоор хичээллэж байсан болохоор бүх төрөлдөө л гайгүй байсан.
Гүйх, харайх, жад шидэх, харвах гээд олон төрлөөр шалгаруулж авсан. Том байн дээр харваж үзээд өнгө өнгийн сумаа очиж авах мөч сайхан санагдсан. Ингэж урваж байтад татагдсан хүн.
-Тухайн үед байт харваан шигшээ багийн дасгалжуулагч Л.Жамьяансүрэн багш байсан. Яаж хараанд нь өртсөн юм бэ?
-Харваж үзээд их таалагдсан гэж хэлсэндээ. Ингэж яваад багш дээр очиж шалгуулсан. Гурван сумаа шар дээр онолоо. Багш ч “Энийг хэн оносон” “Би оносон л гэлээ” Багш минь жаахан ширүүн хүн. “Аан чи оносон юмуу” гээд чанга дуугарч байна. Тэгснээ “Аль нутаг вэ” гэхээр нь Дорнод гэсэн. “Муу, сайн хөлдүү буриадууд юугаа онодог юм” гэж байна.
Миний хувьд ч үгэнд нь их зэвүү хүрч байсан. Ингэж л байт харваагаар хичээллэж эхэлсэн. Тамирчид өөрсдийн нийгэмлэгтээ хичээллэж эхлэх үед Сүхбаатар дүүргийн Барилгачин нийгэмлэгт Ш.Бямбасүрэн багшийн удирдлага дор хичээллэх болсон.
-2000 оны Сиднейн олимп. Паралимпийн төрөлд анх удаа өрсөлдсөн явдал?
-Тийм ээ. Тэр үед парагаар хичээллэдэг хүн цөөхөн байлаа. Хөнгөн атлетикийн марафонд гүйдэг Жамбалын Лхагважав гэж хараа муутай залуу байсан. Тэрийгээ хөтлөөд Эрдэнэт рүү нэгдсэн олимпийн цугларалтад гарна.
Тухайн үед ардын багш, Дамдиншарав, Насантогтох гээд спортын шилдэг төлөөлөлүүдтэй бэлтгэл хийсэн. Тийм сайхан хүмүүсийн энерги байдаг юм уу. Олимпийн наадамдаа маш сайн орсон.
-Олимпийн эрх гэж авдаг байв уу?
-Дэлхийд чансаагаар нэгээс тавдугаар байрт нэг хэсэг явсан. Тэр чансаагаар л оролцож явсан. Харин Афины олимпийн наадамд дэлхийн шилдгүүд өрсөлдөх уриатай болж тив, дэлхийн томоохон тэмцээнд амжилт үзүүлж эрх хүртсэн тамирчдыг оролцуулж эхэлсэн.
2002 оны Азийн наадамд түрүүлсэн. Энэ амжилтаа улам дээш нь ахиулсаар 2004 оны олимпод оролцсон юм.
-Та Афины олимпод хамгийн сайн бэлтгэлтэй байсан гэдэг. Яагаад медальд буугаагүй юм бэ?
-Хүсэхэд хясна гэдэг л тэр болсон байх. Финалын харваа болсон үед маш их салхитай байсан. Бейсболын дугуй талбайд харавсан. Өрсөлдөгч тамирчин дугуй дотор таарчихсан. Би болохоор голд нь таарчихсан салхинд цохиулаад болдоггүй. Тэгэж аргагүйн эрхэнд ялагдал хүлээсэн.
-Өрсөлдөгч тамирчин чинь БНХАУ-ын тамирчин байсан. Тухайн үедээ ирэх оны олимп зохион байгуулах учир цагаан хуудсаар орж ирсэн?
-Харамсч явдаг тэмцээн Афин. Очиж очиж цагаан хуудсаар орсон хүнд ялагдана гэдэг тамирчин хүнд хэцүү л дээ.
-2008 оны Бээжингийн олимп. Тэр дундаа есдүгээр сарын 14-ний тэр өдөр. Монголчуудын сэтгэл зүрхнээс одоо хэр нь гараагүй тод томруунаар үлдэж?
-Тиймээ. Афины олимпод сэтгэл дотроо “Бээжингийн олимпоор ямар ч байсан даагаа нэхнэ” гэсэн бодол тээж очсон. 2002 оны Азийн наадамд миний харавсан сум болгон 10 онож бяр орж эхэлсэн. 2008 оны олимпийн наадамд ч бэлтгэл минь яг тэгж жигдэрсэн байсан.
-Багш нартаа “Би олимпийн наадамд түрүүлчихээр байна” хэмээн итгэлтэй хэлсэн гэдэг?
-/Инээв/ “Битгий худлаа яриад бай” гээд итгэдэггүй. Их олимпийн тамирчид явсан үед би Нүхтэд бэлтгэлд гарсан. Наймдугаар сарын 14-нд олимпийн анхны медалийг Түвшинбаяр хүртлээ. Дараа нь Бадар-Ууган ч алт авлаа.
Тэгэхэд нь би хүмүүст “Би хөдөлмөрийн баатар болно” гэлээ. Алт авбал хөдөлмөрийн баатар, авахгүй бол хөгийн баагий, бүр медальгүй бол хөлгүй Баатараа л болно биз дээ. /Инээв/
-Хөдөлмөрийн баатар нь болсон?
-Харваа жигдэрсэн сайхан байсан. Өмнө нь дэлхийн аваргын финалын харваанд ялагдаж байсан Хятад залууг яллаа. Дэлхийн аваргын мөнгөн медальт залууг ялж алтан медалийн төлөө харвах болсон.
-Алтын төлөөх харваанд сэтгэл зүй хэр байв?
-Маш тайван байсан. Францын тамирчинтай харваж санасандаа хүртэл харваж чадсан. Ингэж л жинхэнэ Монгол Улсын хөдөлмөрийн баатар цол хүртсэн юм. Тухайн үеийн олимпийн наадам монголчуудын эв нэгдлийн баяр байсан.
-Дөрвийн тоо танд ээлтэй гэдэг. Учрыг нь тайлж өгөөч?
-Олимпийн аваргууд төрсөн он цаг хугацааг бодсон ч тэр. Түвшинбаяр аварга наймдугаар сарын 14, Бадар-Ууган 24, би есөн сарын 14-нд медаль хүртсэн. Гурван алтан медаль дөрвийн тоонд таарч байгаа юм.
-Нээрээ сонин тохиолдол шүү. Та гурвын төрсөн өдөр бас дараалласан байдаг?
-Тийм ээ. Түвшинбаяр аварга зургаадугаар сарын 1, би 2, Бадар-Ууган 3-ны өдөр төрсөн байдаг юм. Сонин тохиолдол. Анхны олимпийн гурван аваргын уялдаа холбоо их айхтар байгаа биз. /Инээв/
-Паралимпийн наадмыг тэр бүр хүмүүс мэддэггүй байлаа. Таны ачаар энэ спортын ойлголтыг ард түмэн мэдэж чадсан?
-Ер нь паралимпийн төрөлд амжилт гаргах бололцоотой нь Лхагважав бид хоёр л байсан. Бид хоёр Азийн аваргад маш олон түрүүллээ.
Тив дэлхийн тэмцээн уралдаанд амжилттай оролцлоо.
Орсон тэмцээнээсээ медальгүй ирсэн тохиолдол тун цөөн. Энэ дундаа Бээжингийн олимпийн медаль ард түмэнд хамгийн ойр хүрсэн юм болов уу.
Б.Төрбат
Эх сурвалж:
Сэтгэгдэл0
baiar hurgei
undustenii ew negdel ni beejind l baih yostoi doo!
Bayar hurge'. Mundag zaluu, Baataraa.