sonin.mn
Улаанбаатар /МОНЦАМЭ/. Өнөөдөр Хэвлэлийн хүрээлэнгийн мэдээллийн төвд Монголын үндэсний бөхийн холбооны тэргүүлэгч гишүүд цаг үеийн асуудлаар мэдээлэл хийв.
“Их эе” хурлыг маргааш зохион байгуулахаар товлосон хурлыг хууль бус, дүрмийн бус гэдгийг 11 тэргүүлэгч гишүүн энэ шийдвэрийг дэмжиж, гарын үсгээ зурсан гэдгийг онцоллоо. Иймд МҮБХ-ны салбар зөвлөлүүд маргаашийн хуралд суухгүй байрыг уриаллаа. Маргааш “Их эе” хурал болохгүй тул бөхчүүд хөдөөнөөс ирж, чирэгдэл гаргах шаардлагагүйг ч хэлж байв. Мөн тэд МҮБХ-нд үүсээд буй маргааныг шийдэхээр томилсон Ажлын хэсгийг шинэчлэн зохион байгуулах ёстой гэв. Ажлын хэсгийг таван хүний бүрэлдэхүүнтэй байгуулан, Х.Баянмөнх аварга даргалсан.
Хэдийгээр Их эеийг хойшлуулсан ч энэ оны хоёрдугаар улиралд багтаан хуралдуулахаар тохирсон. Хамгийн гол асуудал наадам дөхөөд байгаа. Бөхийн өргөөний эзэмшигчийг тодруулахаар Баянзүрх дүүргийн үл хөдлөх хөрөнгийн газарт МҮБХ-ноос албан бичиг явуулсан байна. Тус ТББ-ын дүрэмд “Бөхийн өргөө МҮБХ-ны өмч мөн” гэж заасан тул холбоо эзэмшин, бөхийн барилдаан болох ёстой гэв.
Монголын үндэсний бөхийн холбооны тэргүүнээр Л.Чинбат ажиллаж байгаа юм. Түүнийг  Баяр наадмын үндэсний бөхийн барилдааныг зохион байгуулах салбар комиссын даргаар томилсон. Иймд тэрээр бөхийн галын тэргүүлж буй бөхчүүдтэй уулзаж, наадмын өмнөх бэлтгэл ажилд анхаарч эхэлсэн байна. Тэрбээр 21 аймаг дахь бөхийн холбоодоос өөрийг нь дэмжин ажиллахыг хүсч, албан бичиг илгээжээ.  Л.Чинбат өмнөх тэргүүн Р.Нямдоржоос тамга, тэмдгийг хүлээн авсан тул  тогтоол, шийдвэр нь хүчин төгөлдөр гэдгийг энэ хурлын үеэр мэдэгдэж байв.
 
Д.Өлзий 
Эх сурвалж: Монцамэ агентлаг