sonin.mn
Улаанбаатар /МОНЦАМЭ/. Тулгар төр байгуулагдсаны 2227, Их Монгол Улсын 812, Ардын хувьсгалын 97 жилийн ой, үндэсний Их баяр наадмын бөхийн барилдааны дөрвийн даваа өндөрлөв.
Энэ даваанд дархан аварга Г.Өсөхбаяр залуу бөх Г.Алтанбаганыг, улсын аварга Г.Эрхэмбаяр аймгийн харцага Б.Батсайханыг, С.Мөнхбат а/з Э.Энх-Амгаланг, Ч.Санжаадамба Д.Пүрэвдоржийг тус тус давсан бол нарын аваргууд болон улсын арслан Э.Оюунболд а/а Ш.Пүрэвгарьдыг, Н.Батсуурь а/а Ц.Сандагдоржийг, П.Бүрэнтөгс а/а Б.Зоригтбаатарыг, Ц.Содномдорж а/а Д.Тогтохжаргалыг өвдөг шороодуулж наадамчин олноо баясгав.
Харин улсын гарьд Р.Пүрэвдагва аймгийн арслан Б.Даваа-Очирт, улсын гарьд Ж.Бат Эрдэнэ ц/а Д.Цэрэнтогтох-д, улсын заан Д.Баасандорж а/а Д.Амаржаргалд, улсын харцага Т.Баасанхүү а/а Б.Батжаргалд, у/х М.Бадарч а/а Б.Эрдэнэхүүд тус тус унасан бол улсын гарьд Н.Ганбаатар, Б.Гончигдамба, Ш.Жаргалсайхан, улсын заан Б.Батмөнх, Н.Түвшинбаяр, Н.Жаргалбаяр, Ө.Даваабаатар, улсын харцага А.Цацабшир, Н.Батзаяа, Б.Бат-Өлзий нар учраагаа давлаа.
Энэ жилийн наадмын үзүүр, түрүү бөхөөр тодрох магадлал өндөр байсан улсын харцага О.Хангай а/а Ш.Мөнгөнбаатарт ойчиж бөх сонирхогчдын тааварт том өөрчлөлт оруулсан гэж болно.  
 
Д.Өлзий
Эх сурвалж: Монцамэ агентлаг