Жакарта /МОНЦАМЭ/. Азийн XYIII зуны спортын наадмын найм дахь өдрийн тэмцээн уралдаанууд орон нутгийн цагаар өглөөний 06 цагт эрэгтэйчүүдийн марафон гүйлтийн тэмцээнээр эхэллээ.
Тус уралдаанд Монгол Улсын гавьяат тамирчин Бат-Очирын Сэр-Од 2 цаг 23 минут 42 секунд /2:23:42/-ын амжилтаар тавдугаар байрт шалгарлаа.
Тэрбээр 10 дахь км-т нэгдүгээр байрт, 15 дахь км-т хоёрдугаар, 20 дахь км-т гуравдугаар, хагас марафоны зайд мөн гуравдугаарт, харин 25 дахь км-т нэгдүгээрт, 30 дахь км-т тавд, 35 дахь км-т наймдугаарт, 40 дэх км-т тавдугаар байрт орж хурдалсаар ийнхүү айргийн тавд барианд орж ирлээ.
Азийн наадмын марафон гүйлтийн тэргүүн байрыг Японы тамирчин Иноуе Хирото 2:18:22 гэсэн амжилтаар тэргүүлсэн бол Бахрейны тамирчин Елаббасси Елхассан удааллаа.
Харин гуравдугаар байрт БНХАУ-ын тамирчин Дуо Бужие 2:18:48 гэсэн амжилтаар барианд орсон бол дөрөвдүгээр байрт Японы тамирчин Сонота Хаяато 2:19:04 гэсэн амжилтаар барианд орж ирлээ.
Манай гавьяат марафонч Б.Сэр-Од өмнөх буюу Азийн XYII зуны спортын наадмын марафон гүйлтийн тэмцээнд дөрөвдүгээр байр эзэлж байсан билээ.
Д.Өлзий
Эх сурвалж: "Монцамэ" агентлаг
Сэтгэгдэл0
Сэр-Одод баяр хүргэе. Үнэхээр тэсвэр чадал шавхсан төрөлд сайн амжилт гаргалаа. Харин сэтгүүлч маань "шалгарах" гэдэг үг хэр тохирч байгааг нягтлаарай. Тавдугаар байранд ирлээ гэх байх, гүйж уралдаж байгаа хүмүүс шүү дээ. Нүднээс далд шалгаруулсан бол "шалгарлаа" гэж бичих байх.
Өдөрт ийшээ халж эхэлсэн нь нөлөөлсөн.Монголчууд халууунд тэсвэргүй.
Амжилт олон жил нэрээ гаргаж байгаад нь баярладаг шүү
Энэ бол аугаа тэсвэр тэвчээр шүү дээ, заавал аварга байх албагүй. Тогтмол амжилт гэдэг бол хамгийн том үзүүлэлт... СЭР-ОД чи сайн шүү