Өнгөрсөн амралтын өдрүүдэд буюу 8 дугаар сарын 25, 26-нд Солонгос улсад болсон 60 сая төгрөгийн шагналын сантай Ой тогтоолтын аварга шалгаруулах нээлттэй тэмцээн амжилттай болж өндөрлөлөө. Тус тэмцээнд 9 орны нийт 200 орчим тамирчин ой тогтоолтын 10 төрлөөр бага, өсвөр, насанд хүрэгчдийн ангилалд 2 өдрийн турш оюуны өрсөлдөөнийг өрнүүлсэн юм.
Манай улсыг төлөөлж Монголын Оюун Ухааны Академийн 18 тамирчин ОУ-ын шүүгч, дасгалжуулагч Б.Баасандоржийн удирдлага дор амжилттай оролцон 25 алт, 28 мөнгө, 19 хүрэл медаль буюу нийт 90 медалийн 72 медалийг хүртэж үнэмлэхүй ялалтыг байгууллаа.
Мөн манай тамирчид бага, өсвөр, насанд хүрэгчдийн ангилалдаа дэлхийн 9 дээд амжилтыг шинэчлэн тогтоосноос гадна нийлбэр дүнгээр илүүрхэж нас насны ангилал тус бүртээ эхний гурван байрт орлоо.
 
Насанд хүрэгчид:
 
1-р байр: ОУ-ын Их Мастер Н.Мөнхшүр 7766 оноо
2-р байр: ОУ-ын Их Мастер Н.Энхшүр 6949 оноо
3-р байр: ОУ-ын Их Мастер Э.Пүрэвжав 6222 оноо
 
Өсвөр нас:
 
1-р байр: ОУ-ын Их Мастер Э.Лхагвадулам 7382 оноо
2-р байр: Б.Лхагвадорж 5784 оноо
3-р байр: Г.Мянганбаяр 4927 оноо
 
Бага нас: 
1-р байр: О.Ганжигүүр 3147 оноо
2-р байр: Д.Мөнхтүшиг 2739 оноо
3-р байр: Б.Эрмүүнболд 2362 оноо
 
Тус тэмцээний 10 төрлийн дараах #нийлбэр #оноогоор 2017 оны Дэлхийн аварга, Геннисийн рекорд эзэмшигч, Олон Улсын Их Мастер Н.Мөнхшүр (7766 оноо) #тэргүүлж #аваргын #цом хүртлээ.
 
Ингээд бид Америк, Швед, Хятад, Турк, Филиппин, Энэтхэг, Тайван, Малайз, Англи, Сингапур,Солонгос гэх мэт олон арван улсад оюуны спортын 50 дахь тэмцээндээ амжилттай оролцож нийт 861 медаль хүртэн дэлхийн дээд амжилтуудыг шинэчлэн тогтоосоор байна.
Энэ удаагийн Монголын шигшээ багт Дархан-Уул болон Орхон аймгийн тамирчид маань гайхалтай амжилтыг үзүүлсэнд онцгойлон баяр хүргэж байна. Цаг зав, сэтгэл зүрхээ зориулан тамирчдаа маш амжилттай бэлтгэж дасгалжуулсан бүх багш нартаа цааш цаашдын соён гэгээрүүлэх ажилд нь өндрөөс өндөр амжилт хүсье.
Мөн академийн хамт олон, эх орноо олон улсад амжилттай сурталчилж байдаг амжилтын эзэн тамирчид, үргэлж тусалж дэмжиж байдаг тамирчдынхаа гэр бүлийнхэнд мөн хоёр тамирчны маань зардлыг ивээн тэтгэсэн УБТЗ-ын хамт олон болон урмын үгээ харамгүй хайрлан дэмжиж байдаг Монголчууддаа талархсанаа илэрхийлье.
 
 
 
 
Монголын Оюун Ухааны Академийн Захирал, Ой тогтоолтын спортын ОУ-ын шүүгч Х.Хатанбаатар