Улаанбаатар /МОНЦАМЭ/. ОХУ-ын Сахагийн «Триумф» ордонд есдүгээр сарын 6-8-нд хуучин ЗХУ-ын гавьяат дасгалжуулагч, нэрт дасгалжуулагч Дмитрий Коркины нэрэмжит чөлөөт бөхийн эрэгтэйчүүдийн олон улсын тэмцээн болж манай 8 бөх медаль хүртжээ.
Нэрт дасгалжуулагчийн 90 насны дурсгалд зориулсан 11 дэх удаагийн тэмцээнд ОХУ, Монгол, Азербайжан, АНУ, Армен, Афганистан, Болгар, Беларусь, БНХАУ, Гүрж, Грек, Герман, Иран, Испани, Итали, Израиль, Казахстан, Колумб, Молдав, Македон, Финлянд, Турк, Румын, Унгар, Узбекистан, Украин, Эквадор, Энэтхэг, Эстони, Япон гээд Европ, Ази, Америк тивийн 30 орны 195 тамирчин эрэгтэйчүүдийн 10 жинд өрсөлдөж шилдгүүдээ тодруулав. Тэдний дунд олимп, дэлхийн медальтай 20-иод бөх зодогложээ.
Манай эрчүүд Якутад ДАШТ-ий өмнөх бэлтгэлээ шалгаж таван мөнгө, гурван хүрэл медаль хүртсэн байна. Тухайлбал, 61 кг-д ОУХМ Т.Түвшинтулга 65 кг-д “Арслан” клубын тамирчин ОУХМ Т.Тулга, 70 кг-д ОУХМ Б.Бямбадорж, 97 кг-д Ө.Батзул, 125 кг-д Н.Золбоо мөнгө, 79 кг-д гавьяат тамирчин П.Өнөрбат, 86 кг-д ОУХМ О.Үйтүмэн, 92 кг-д ОУХМ Л.Төртогтох хүрэл медалийн эзэн болов.
Нэрт дасгалжуулагчийн дурсгалд зориулсан тэмцээнийг өндөр түвшинд зохион байгуулж аваргыг 7000, мөнгөн медалийг 5000, хүрэл медальтанд 3000 ам.долларын шагнал өгсөн байна.
Нийт 180 мянган ам.долларын шагналын сантай энэ тэмцээнд манайхаас үндэсний шигшээ багийн ахлах дасгалжуулагч Б.Баттулга, гавьяат дасгалжуулагч А.Цэдэнсодномын удирдлага дор сарын дараа Унгарын нийслэл Будапештэд болох насанд хүрэгчдийн ДАШТ-д оролцох есөн тамирчин /гавьяат тамирчин Э.Бэхбаяраас бусад нь/ хүч үзсэн юм.
 
Д.Өлзий
Эх сурвалж: Монцамэ агентлаг