sonin.mn
Улаанбаатар /МОНЦАМЭ/. БНХАУ-ын Гуанжоу хотноо болсон тус тэмцээнд манай 12 жүдоч зодоглосноос хоёр хүрэл, нэг мөнгөн медаль хүртлээ.
Жин тус бүрийнхээ эхний 16-д бичигддэг дэлхийн шилдэг бөхчүүд урилгаар оролцдог “Мастерс-2018” тэмцээний эхний өдөр /2018.12.15/ эрэгтэй 60 кг-д гавьяат тамирчин Д.Амартүвшин, ОУХМ 66 кг-д Д.Алтансүх нар хүрэл медалийн эзэд болсон юм. Харин сүүлийн өдөр эрэгтэй -100 кг-д Л.Отгонбаатар эхний тойрогт хийлж, хоёрдугаар тойрогт Оросын бөх Илясов Нияазыг буулгаж авсан бол хэсгийн аваргын төлөө Японы Ийда Кентарог хожсон. Улмаар хагас шигшээд Египетийн Рамадан Дарвишийг ялж, мөнгөн медалийн болзол хангасан.
Харин аваргын төлөө  Гүржийн Варлам Липартеллианитай тунасан ч гэмтлийн улмаас татамид гараагүй байна. Мөн эрэгтэйчүүдийн 73 кг-д Г.Одбаяр, эмэгтэйчүүдийн 48 кг-д М.Уранцэцэг нар тавдугаар байрт, эрэгтэйчүүдийн 66 кг-д Г.Хэрлэн, эмэгтэйчүүдийн 57 кг-д Д.Сумъяа, 63 кг-д Б.Мөнгөнчимэг нар долдугаар байрт тус тус шалгарав. Харин Г.Болдбаатар, Д.Цогтбаатар, Ө.Дүүрэнбаяр нарын хувьд хэсгээсээ шалгарч чадсангүй.
 
Д.Өлзийсайхан
Эх сурвалж: Монцамэ агентлаг