сонин mn
Сүүлийн үед Сүхбаатар дүүргийн МАН-ын хорооны бодлого үйл ажиллагаанд сэтгэл дундуур яваа эгэл жирийн шударга гишүүд намын удирдлагууддаа санал гомдлоо хүргүүлж тодорхой арга хэмжээ авахыг шаардах болжээ. Тэдгээрийн төлөөлөл болгож ахмад гишүүн Л.Энхтөртэй уулзаж байр суурийг сонирхлоо.
 
-Та сайхан өвөлжиж байна уу. Юуны өмнө яагаад хэвлэлд хандах болсон тухайгаасаа ярилцлагаа эхлэх үү?
 
-Миний хувьд 1990 онд МАН-д элссэн эгэл жирийн гишүүний нэг. Намын удирдлагууд болон журмын олон нөхдөдөө дайж хүргэх үгс байгаа учраас ийнхүү хэвлэл мэдээлэл олон нийтэд хандаж байна. Үнэхээр намын удирдах дээд байгууллагын дарга нарт хүсэлт, өргөдөл өгдөг ч төдийлөн авч хэлэлцэхгүй өнөөдрийн хүрсэн учраас хэвлэл мэдээлэлд хандаж үүсээд байгаа нөхцөл байдалд дүн шинжилгээ хийж өгнө үү гэж энэхүү ярилцлагаараа дамжуулан хүргэе. Хэрхэхийг эрхэм дарга удирдлагуудын мэргэн ухаан тунгааж, үзнэ биз ээ.
 
-Таны хувьд яг ямар асуудлыг намын удирдлагууддаа хүргэх хүсэл сонирхолтой байгаа юм бэ?
 
-Ярианыхаа гол зүйлд орьё. Журмын олон нөхөд та бүхэндээ юуны өмнө 21-р зууны 2021 оны Шинэ оны мэндийг уламжилъя аа. Их жанжныхаа нэрээр овоглосон Сүхбаатар дүүргийн МАН-ын гишүүд, журмын нөхөд та нар бол үзэл бодол, итгэл үнэмшлээрээ нэгдсэн “улс төрийн намын тусгаар тогтнолын хил хязгаарыг” сэтгэл зүрх, итгэл үнэмшлээрээ манаж байгаа нийгмийн зүтгэлтнүүд. Харамсалтай нь манай дүүрэг 2020 оны Орон нутгийн сонгуульд “навс ялагдаж”, улмаар завсаргүй 12 жил дараалан “цэнхэртэх болж", АН тус дүүргийг 12 жил засаглах болж байгаа явдал бол тус дүүргийн МАН-ын хорооны удирдлагын баг ялзарч, эрх мэдэлдээ сагаж, намыг дотоод ардчилалгүй болгож, хэдхэн олигархижсан бүлэглэлийн гарт бүрэн орж, намын нэрээр хуурамч дүр эсгэсэн хоосон эв нэгдэл нь намынхаа төлөө үнэнч гишүүд, дэмжигчдийг дотор нь талцуулан хувааж бутаргах, тэдний итгэлийг өдрөөс өдөрт алдах болсонд намын ахмад гишүүний хувьд дуугүй хараад явж чадсангүй. Тиймээс Сүхбаатар дүүргийн МАН-ын хорооны үйл ажиллагаанд анхаарал хандуулж дорвитой шинэчлэл хийхгүй бол “тос дотроосоо өтдөг” шиг ялзарч муудаж дуусахаас өмнө анхаарал хандуулж амьд гэдгийг нь жирийн гишүүдэд нь мэдрүүлээсэй гэж хүсч байна.
 
-Тэгэхээр таны бодлоор Сүхбаатар дүүргийн МАН-ын хорооны одоогийн үйл ажиллагаа хангалтгүй гэж тодорхойлоод байна уу. Ялангуяа гишүүд дэмжигчдийгээ хооронд нь хагаралдуулж, талцуулдаг гэж байна. Энэ асуудалд шүүмжлэлтэй хандаад байгаа юм уу?
 
-Миний яриад байгаа асуудал болон дээр дурьдсан асуудлууд бол туйлын маргашгүй үнэн билээ. Дээр нь нэмээд хэлэхэд хоёр ч хүрэхгүй сарын дараа намынхаа түүхт 100 жилийн ойгоо тэмдэглэхээр зэхэж буй энэ түүхэн цаг мөчид Монгол төрийн тэргүүнээ сонгох сонголт тулаад ирчихсэн хаалга тогшиж байна.
 
 
 
Түүхэн үйл явц гэдэг бол ухрах гарцгүй, бас зогсоох боломжгүй цаг хугацааг хэлдэг. Тус дүүргийн ардын намын гишүүд бид алдаж онож, унаж босож, МАНАН дунд төөрч будилж явсаар энэ цаг дор “мөхөх үү, сэхэх үү” гэдэг салаа зам дээр ирчихжээ. Бид хүссэн ч, хүсээгүй ч энэ хоёр салаа замын аль нэгээр нь явахаас өөр сонголт гэж байхгүй ээ.
 
 
 
Харин аль замаар цааш явахаа сонгох эрх нь намын гишүүд дэмжигчдийн гарт байгаа. Энэ бол бидэнд байгаа цорын ганц боломж. Энэ боломжийг ашиглах зөв гарц нь дүүргийнхээ намын хороог “Эрс шинэчлэх” асуудал бол туйлын зөв шийдэл гэдгийг намын гишүүдийнхээ сонорт хүргэе.
 
-Сүхбаатар дүүргийн МАН-ын хорооны хувьд эв нэгдэлгүй хэсэг хүмүүсийн хувилдааны үүр болсон энэ байдлыг халья гэдэг саналаа жирийн намын гишүүддээ дайхыг хүссэн гэж ойлгож болох уу?
 
-Тийм. СБД-ийн МАН-ын хороонд шударга ёсыг тогтоож зүй ёсны шинэчлэлийг эхлүүлж, эрс шинэчлэх үйл хэргийг яаралтай эхлүүлэх цаг мөч иржээ. Энэ бүхэнд ачааны хүндийг үүрч чадна хэмээн намын журмын олон нөхдийн итгэлийг өвөртөлсөн дүүргийн намын хорооны удирдлага, баг үүнийгээ эрх мэдэл хэмээн эндүүрч, үнэнч журмын нөхдөө өөрийн боол мэт харж, өөрөөс нь өөр ухаантан байхгүй мэт дур зоргоороо аашилдаг “БИ”-гээр өвдсөн энэ нөхдийг “БИД” болтол нь хариуцлага тооцож эмчлэх цаг иржээ. Шинэчлэл үгүй намд, ирээдүй үгүй гэдгийг намын гишүүддээ хүргэхийг зорьлоо.
 
-Танай намын хорооны удирдлагын баг сонгуульд амжилтгүй оролцсон учраас хариуцлагаа хүлээж өргөдлөө өгсөн гэж сонссон. Тэгэхээр өнөөдрийг хүртэл шинэ удирдлагаар хангагдаагүй байгаа гэсэн үг үү?
 
-Манай намын дүрэмд сонгуульд амжилтгүй оролцуулбал намын удирдлагад хариуцлага тооцдог бичигдээгүй хуультай ч энэ журам Сүхбаатар дүүргийн МАН-ын хорооны удирдлагын багт үйлчлэхгүй байна. Өнөөдөр эзэнгүй талд төөрсөн хүмүүс шиг хаачихаа мэдэхээ больсон итгэл үнэмшилдээ хөтлөгдсөн эгэл жирийн гишүүд л гудамжинд байцгаана. Мөн намын түүхт ой тохиох гэж байгаа энэ түүхэн цаг мөчүүдэд ингэж унтаа байдалтай баймааргүй байна.
 
 
 
Сүхбаатар дүүргийн МАН-ын дарга Д.Цогтбаатар УИХ-ын сонгуульд гишүүд дэмжигчдийнхээ хүчээр сонгогдсон. Харин орон нутгийн сонгуулиар нэр дэвшсэн гишүүдээ бүрэн дүүрэн дэмжээгүйгээр барахгүй АН-д найр тавьсан байдалтай байсан. Үүгээр ч зогсохгүй Сүхбаатар дүүргийн МАН-ын хороо бүлэг фракцид өв залгамжлагдсан байдалтайгаар явж ирлээ. 
 
 
 
Намын дарга нь өөрийн фракцийн гишүүндээ даргын суудлаа залгамжлуулах хэлбэрээр өгч ирсэн нь шударга ёс, өрсөлдөөний зарчим алдагдахад хүрсэн. МАН-ын 100 жилийн ойг Монгол Улсын зүрх болсон дүүрэг ялагдалтай угтаж байгаадаа дүгнэлт хийхийн оронд фракци бүлэглэлийн зодоон үргэлжилж байгаа нь харамсалтай. Талцал хуваагдал намын эв нэгдлийг алдагдуулж нэг дүүргийн намын гишүүд хэд хэдэн албан тушаалтай байсан нөхдөд хуваагдан бага хаадын зовлон эдэлж буйд гүнээ харамсаж явдаг. Тиймээс намын даргын суудлыг өв залгамжлуулдагаа болих цаг ирсэн. Шуудхан хэлэхэд орон нутгийн сонгуульд дүүргийн МАН ялагддаг гол шалтгаан бол намын даргын суудлыг өв залгамжлуулж, шуудхан хэлэхэд “цус ойртуулж” гаарсны үр дагавараар жирийн гишүүд бид шат шатны сонгуулийн ялагдлын горыг амсч, хохирч байгаад шүүмжлэлтэй хандаж байна.