Улаанбаатар /МОНЦАМЭ/. УИХ-ын чуулганы өнөөдрийн үдээс хойшхи хуралдаан эхэллээ.
 
Хуралдаанаар Үндсэн хуулийн цэцийн энэ оны 07 дугаар дүгнэлтийг хэлэлцсэн юм. Цэц энэ сарын 29-нд Дунд суудлын хуралдаж, Зөрчлийн тухай хуулийн 5.8 дугаар зүйлийн 5 дахь хэсэгт хөгжлийн бэрхшээлтэй иргэнийг жагсаал цуглаанд оролцуулсан, зохион байгуулсан этгээдэд хариуцлага хүлээлгэхээр хуульчилсан нь тайван жагсаал, цуглаан хийх иргэний  эрх чөлөө болон тэгш эрхийн талаарх зарчмыг хязгаарласан нь Үндсэн хуулийн холбогдох зүйл, заалтыг зөрчсөн гэх иргэний мэдээллийг авч хэлэлцсэн байна.
 
Чуулганы хуралдаанаар эл асуудлыг авч хэлэлцэх үед гишүүд аливаа улстөрийн хүчнүүд хөгжлийн бэрхшээлтэй иргэдийг намын хүсэл сонирхолд нийцүүлэн өөрсдийнх нь зорилгын эсрэг жагсаал цуглаан татан оролцуулахгүй байх нь зүйтэй гэсэн байр суурьтай байв. Ингээд хэлэлцэж буй асуудлаар санал хураалт явуулахад гишүүдийн олонх цэцийн дүгнэлтийг хүлээн авах нь зүйтэй гэж үзлээ.
 
 
Б.Туул
Эх сурвалж: "Монцамэ" агентлаг